Na go Fošagetše go Diriša Leina la Modimo?

MANGWALONG a Seheberu, ao gantši a bitšwago gore ke “Testamente ya Kgale,” leina la Modimo le tšwelela mo e nyakilego go ba ka makga a 7 000 ka sebopego sa יהוה (go bala go tloga go le letona go ya go le letshadi). Seo se bolela gore leina la Modimo le emelwa ke ditlhaka tše nne tša Seheberu e lego Yohdh, He, Waw le He, tšeo gantši di fetolelwago e le YHWH.

Go tloga kgale, Bajuda ba be ba e-na le kgopolo ya tumela-khwele ya gore go fošagetše go diriša leina la Modimo. Ka baka leo, ba ile ba gana go le bitša, gomme ditemaneng tša bona, ba thoma go diriša maina ao a le tšeelago legato. Lega go le bjalo, bafetoledi ba bantši ba Beibele ba dirišitše leina “Yahweh,” goba “Jehofa.” E nngwe ya diphetolelo tšeo di dirilego bjalo ke Beibele ya Sepedi ya Phetolelo ya Kgale. Go ya ka phetolelo ye, nakong ya ge Moše a botšiša Modimo gore o be a swanetše go araba bjang ge Baisiraele ba mmotšiša gore o be a romilwe ke mang go bona, Modimo o arabile ka gore: “O botše bana ba Isiraele o re: Jehofa, Modimo wa bo-tataweno, Modimo wa Aborahama, Modimo wa Isaka, Modimo wa Jakobo o nthometše go lena. Ke lona leina la-ka ka mo go sa felego, gomme ke tla bitšwa ka lona ditlogolong tša ditlogolwana.”—Ekisodo 3:15.

Ge a be a rapela, Jesu o boletše mabapi le go diriša ga gagwe leina la Modimo gore: “Ke ba tsebišitše leina la gago gomme ke tla le tsebatša.” Le gona thapelong yeo e tsebjago ke ba bantši e le Thapelo ya Tatawešo, Jesu o itše: “Tatago rena wa magodimong, leina la gago a le kgethagatšwe.”—Johane 17:26; Mateo 6:9.

Ka gona, go ka makatša go lemoga gore ka pukung ya gagwe ya morago-rago yeo e bitšwago Jesus of Nazareth, Mopapa Benedict XVI o boletše mabapi le go dirišwa ga leina la Modimo gore: “Baisiraele ba be . . . ba tloga ba nepile ka go gana go bolela leina le leo le hlaolago Modimo, bjalo ka ge le tšweleditšwe leineng la YHWH, e le go phema go le theošetša boemong bja maina a medimo ya baheitene. Ka tsela e swanago, diphetolelo tša morago-rago di be di fošitše ka go tloša leina le—leo ka mehla Baisiraele ba bego ba le lebelela e le la sephiri e bile le sa bolelwe—bjalo ka ge eka ke leina la kgale.”

O nagana bjang? Na go swanetše goba go fošagetše go diriša leina la Modimo? Ge e ba Jehofa ka noši a re: “Ke lona leina la-ka ka mo go sa felego, gomme ke tla bitšwa ka lona ditlogolong tša ditlogolwana,” na go na le yo a nago le tshwanelo ya go mo ganetša?

[Seswantšho go letlakala 30]

Jesu o dirišitše leina la Modimo thapelong