Lefase La​—Paradeise Kgaufsinyane!

“Tata-wešo wa maxodimong! Leina la xaxo a le kxêthwê; Mmušô wa xaxo a o tlê; thatô ya a xaxo a e dirwê mono lefaseng byalo ka xe e dirwa lexodimong.”​—Mateo 6:9, 10, Beibele ya Sepedi.

THAPELO ye e tumilego, yeo batho ba bantši ba e tsebago e le Thapelo ya Tatawešo goba Thapelo ya Morena, e nea batho kholofelo. Go bjalo bjang?

Bjalo ka ge Thapelo ya Morena e utolla, Mmušo wa Modimo o tla dira gore thato ya Modimo e phethagatšwe mo lefaseng bjalo ka ge e direga legodimong e le ka kgonthe. Le gona, thato ya Modimo ke gore Paradeise e tsošološwe. (Kutollo 21:1-5) Ge e le gabotse Mmušo wa Modimo ke’ng, gona o tla tsošološa lefase bjang gore e be Paradeise?

Mmušo wa Kgonthe

Mmušo wa Modimo ke pušo ya kgonthe. E le gore mmušo le ge e le ofe o šome gabotse, go nyakega babuši, melao le balata. Na Mmušo wa Modimo o fihlelela dinyakwa tše? Ela hloko dikarabo tša Beibele dipotšišong tše di latelago tše tharo:

Ke bomang bao e lego babuši Mmušong wa Modimo?(Jesaya 33:22) Jehofa Modimo o kgethile Morwa wa gagwe e lego Jesu Kriste, gore a buše Mmušong wa gagwe. (Mateo 28:18) Ka tlase ga tlhahlo ya Jehofa, Jesu o kgethile palo e lekanyeditšwego ya batho go tšwa “molokong o mongwe le o mongwe le lelemeng le lengwe le le lengwe le bathong ba bangwe le ba bangwe le setšhabeng se sengwe le se sengwe” bao ba tlago go buša le yena e le “dikgoši godimo ga lefase.”—Kutollo 5:9, 10.

Ke melao efe yeo Mmušo wa Modimo o e beetšego balata ba ona gore ba e kwe? E mengwe ya melao yeo goba ditaelo di nyaka gore balata ba ona ba gate mogato o itšego. Jesu o boletše ka molao o mogolo wa bohlokwa melaong yeo, ge a re: “O rate Jehofa Modimo wa gago ka pelo ya gago ka moka le ka moya wa gago ka moka le ka monagano wa gago ka moka. Ye ke taelo e kgolo-kgolo  le ya pele. Ya bobedi ya go swana le yona ke ye, ‘O rate moagišani wa gago go etša ge o ithata.’”—Mateo 22:37-39.

Melao e mengwe e nyaka gore balata ba Mmušo wa Modimo ba pheme go dira dilo tše itšego. Ka mohlala, Beibele e nea taelo ye e kwagalago: “Le se ke la timetšwa. Ge e le diotswa, goba barapedi ba medimo ya diswantšho, goba dihlotlolo, goba banna ba ba boloketšwego merero yeo e sego ya tlhago, goba banna ba ba robalago le banna, goba mahodu, goba batho ba megabaru, goba matagwa, goba ba maroga, goba bahlakodi ba ka se je bohwa bja mmušo wa Modimo.”—1 Bakorinthe 6:9, 10.

Ke bomang bao e lego balata ba Mmušo wa Modimo? Jesu o swantšhitše balata ba Mmušo wa Modimo le dinku. O itše: “Di tla theetša lentšu la-ka, ya ba mohlape o tee le modiši o tee.” (Johane 10:16) E le gore motho e be molata wa Mmušo wa Modimo, ga se a swanela go fo bolela gore o latela Modiši yo Bolo, Jesu, eupša gape o swanetše go dira seo Jesu a se laelago. Jesu o itše: “Ga se yo mongwe le yo mongwe yo a rego go nna, ‘Morena, Morena,’ a tlago go tsena mmušong wa magodimo, eupša go tla tsena yo a dirago thato ya Tate yo a lego magodimong.”—Mateo 7:21.

Ka gona, bao e lego balata ba Mmušo wa Modimo ba diriša leina la Modimo e lego Jehofa le go le hlompha, go etša ge Jesu a dirile. (Johane 17:26) Ba kwa taelo ya Jesu ya gore ba rute batho ba bangwe ka “ditaba tše tše dibotse tša mmušo.” (Mateo 24:14; 28:19, 20) Le gona, ba bontšhana lerato la kgonthe.—Johane 13:35.

Go Senya “Bao ba Senyago Lefase”

Maemo a lefase a gona bjale a bontšha gore kgaufsinyane Mmušo wa Modimo o tla tloga o tliša diphetogo tše dikgolo mo lefaseng. Re tseba seo bjang? Nywageng e dikete tše pedi e fetilego, Jesu o hlalositše pontšho yeo e akaretšago dibopego tše dintši tšeo di bego di tla bontšha gore “mmušo wa Modimo o batametše.” (Luka 21:31) Bjalo ka ge go bontšhitšwe sehlogong se se fetilego, dibopego tša pontšho yeo di bonagala gabotse lefaseng ka bophara lehono.

Ke’ng seo se tlago go latela? Jesu o araba ka gore: “Ka nako yeo go tla ba le masetlapelo a magolo a sa kago a ba gona ga e sa le go tloga mathomong a lefase go ba go fihla gona bjale, aowa, le go ba gona a ka se sa ba gona gape.” (Mateo 24:21) Ye ga se kotsi yeo e tlago go tlišwa ke motho. Go e na le moo, ke Modimo yo a gatago mogato wa go “senya bao ba senyago lefase.” (Kutollo 11:18) Batho ba kgopo, bao ditiro tša bona tša boithati di nyakilego go dira gore lefase le be kgaufsi le go senyega, “ba tlo fedišwa naxeng.” Eupša bao ba se nago molato le bao ba hlankelago Modimo ka mo go amogelegago ‘ba tla šala ba le gona.’—Diema 2:21, 22.

Jehofa Modimo o na le mabaka a swanetšego a go gata kgato e bjalo e kgolo. Ka baka la’ng? Ela hloko papišo ye: Akanya o e-na le moago o monyenyane wo o o hirišago. Bahiri ba bangwe ba itshwara gabotse e bile ke bao ba šetšago; ba lefa rente gomme ba hlokomela magae a bona. Lega go le bjalo, bahiri ba bangwe ba a senya e bile ba na le boithati; ba gana go lefa rente gomme ba senya moago wa gago. Go sa šetšwe gore o ba lemoša gantši gakaakang, ba tšwela pele ka boitshwaro bja bona bjo bobe. O be o tla dira’ng? Bjalo ka mong wa moago, ga go pelaelo gore o be o tla raka bahiri bao ba babe.

Ka mo go swanago, Jehofa Modimo, bjalo ka Mmopi wa lefase le dilo ka moka tše di lego go lona, o na le tshwanelo ya go kgetha gore ke bomang bao a tlago go ba dumelela go dula mo lefaseng. (Kutollo 4:11) Morero wo Jehofa a o boletšego ke go fediša batho ba kgopo mo lefaseng bao ba hlokomologago thato ya gagwe gomme ba leka go tsena-tsenana le maphelo a ba bangwe.—Psalme 37:9-11.

Paradeise e Tsošološitšwego

Kgaufsinyane, Mmušo wa Modimo ka Jesu Kriste o tla buša lefase. Jesu o biditše mathomo a a mafsa gore ke “go bopša lefsa ga dilo.” (Mateo 19:28) Maemo a tla ba bjang? Ela hloko dikholofetšo tše di latelago tša Beibele:

 Psalme 46:9. ‘O fediša dintwa go fihla mafelelong a lefase.’

Jesaya 35:1. “A xo thabê lešoka le naxa ye e omilexo; le lehanata a le hlalalê, le taxê byalo ka letšoba.”

Jesaya 65:21-23. “Bahlaolwa ba-ka ba tlo phela ka tše ba itiretšexo tšôna, tša tlo bá tša ba ônalêla diatleng. Ba ka se itapiše, ’me ya ba lefêla; ba ka se tswale bana ba xo tlo hwa ka pela.”

Johane 5:28, 29. “Nako e a tla yeo ka yona bohle bao ba lego mabitleng a kgopotšo ba tlago go kwa lentšu la [Jesu] gomme ba tšwa.”

Kutollo 21:4. “[Modimo] o tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.”

Mabaka a go ba le Tumelo

Na o dumela dikholofetšo tša Beibele? Beibele e boletše e sa le pele gore batho ba bantši ba ka se di dumele. E re: “Mehleng ya bofelo go tla tla bakweri  . . ba yago ka dikganyogo tša bona ba re: ‘Go ba gona mo ga gagwe mo go holofeditšwego go kae? Ruri, ga e sa le go tloga letšatšing leo bo-rakgolokhukhu ba rena ba robetšego ka lona lehung, dilo tšohle di tšwela pele gabotse-botse go etša mathomong a tlholo.’” (2 Petro 3:3, 4) Eupša bakweri ba bjalo ba fošitše o šoro. Ela hloko mabaka a mane feela ao ka ona o ka dumelago seo Beibele e se bolelago:

(1) Modimo o kile a tsena ditaba tša lefase gare nakong e fetilego. Mohlala o mogolo ke Meetse-fula a mehleng ya Noa.​—2 Petro 3:5-7.

(2) Lentšu la Modimo le boletše e sa le pele ka mo go nepagetšego ka maemo ao a lego gona lehono mo lefaseng.

(3) Dilo ka moka ga di “[tšwele] pele gabotse-botse go etša mathomong a tlholo.” Ka tsela yeo e sa kago ya bonwa historing, lefase la rena le hlaselwa ke go phuhlama ga moloko wa batho, boitshwaro le tikologo.

(4) Ga bjale ‘ditaba tše dibotse tša mmušo’ di bolelwa lefaseng ka bophara, go bontšha gore “bofelo” bo tla tla kgaufsinyane.​—Mateo 24:14.

Dihlatse tša Jehofa di go laletša gore o ithute le tšona Lentšu la Modimo, Beibele, e le gore o ithute ka mo go oketšegilego ka kholofelo ya bophelo bjo bo sa felego ka tlase ga pušo ya Mmušo wa Modimo. (Johane 17:3) Ee, batho ba letetšwe ke bokamoso bjo bo kgahlišago. Dinako tše di kgahlišago kudu di a tla! Na o tla ba karolo ya bokamoso bjo?

[Ntlhakgolo go letlakala 7]

Batho bao ba bolelago gore dilo di tla dula di le ka tsela yeo di lego ka yona gona bjale, ba fošitše o šoro

[Seswantšho go letlakala 8]

Na o tla ba karolo ya bokamoso bjo?