Seo re Ithutago Sona go Jesu

Mabapi le Tsela ya go Swara ba Bangwe

Ke ka baka la’ng re swanetše go ba botho?

Na o bontšha botho gaešita le ge batho ba sa go sware ka botho? Ge e ba re nyaka go ekiša Jesu, re swanetše go ba botho gaešita le go bao ba re hloilego. Jesu o itše: “Ge e ba le rata bao ba le ratago, seo se tla le hola ka’ng? Gobane gaešita le badiradibe ba rata bao ba ba ratago. . . . Ka mo go fapanego, tšwelang pele le rata manaba a lena . . . , gomme le tla ba barwa ba Yo Godimo-dimo, gobane ke yo botho go ba sa lebogego le ba kgopo.”—Luka 6:32-36; 10:25-37.

Ke ka baka la’ng re swanetše go ba bao ba lebalelago?

Ge re dira diphošo, re nyaka gore Modimo a re lebalele. Jesu o rutile gore ke mo go swanetšego go rapelela gore Modimo a re lebalele. (Mateo 6:12) Lega go le bjalo, Jesu o boletše gape gore Modimo o tla re lebalela feela go fihla bokgoleng bjo re lebalelago ba bangwe. O itše: “Ge e ba le lebalela batho dikarogo tša bona, Tatago lena wa legodimong le yena o tla le lebalela; anthe ge e ba le sa lebalele batho dikarogo tša bona, Tatago lena le yena a ka se le lebalele dikarogo tša lena.”—Mateo 6:14, 15.

 Malapa a ka thaba bjang?

Gaešita le ge Jesu a be a se a nyala, re ka ithuta mo gontši go yena mabapi le kamoo re ka dirago gore bophelo bja lapa e be bjo bo thabilego. O re beetše mohlala wo re swanetšego go o latela, ka mantšu a gagwe le ditiro. Ela hloko dintlha tše tharo tše di latelago:

1. Monna o swanetše go rata mosadi wa gagwe bjalo ka mmele wa gagwe. Jesu o beetše banna mohlala. O boditše barutiwa ba gagwe gore: “Ke le nea taelo e mpsha ya gore le ratane.” Go fihla bokgoleng bofe? O itše: “Go etša ge ke le ratile.” (Johane 13:34) Ge Beibele e diriša molao wo wa motheo go banna e re: “Banna, tšwelang pele le rata basadi ba lena go etša ge Kriste le yena a ratile phuthego gomme a ikgafela yona . . . Ka tsela ye banna ba swanetše go rata basadi ba bona bjalo ka mebele ya bona. Yo a ratago mosadi wa gagwe o a ithata, gobane ga go na motho yo a kilego a hloya nama ya gagwe; eupša o a e fepa le go e babalela, go etša ge Kriste le yena a dira phuthego bjalo.”—Baefeso 5:25, 28, 29.

2. Banyalani ba swanetše go botegelana. Go robala le motho yo mongwe ka ntle ga lenyalo ke sebe kgahlanong le Modimo e bile go thuba malapa. Jesu o itše: “Na ga se la bala . . . ‘Ka lebaka le monna o tla tlogela tatagwe le mmagwe a kgomarele mosadi wa gagwe, gomme ba babedi ba e tla ba nama e tee’? Ka gona, ga e sa le ba babedi, eupša ke nama e tee. Ka baka leo, se Modimo a se tlemagantšego jokong go se be le motho yo a se aroganyago. . . . Ke re go lena mang le mang yo a hlalago mosadi wa gagwe ge e se ka lebaka la bootswa, a nyala yo mongwe, o a hlotlola.”—Mateo 19:4-9.

3. Bana ba swanetše go kwa batswadi ba bona. Gaešita le ge Jesu a be a phethagetše gomme batswadi ba gagwe ba sa phethagala, o ile a ba kwa ge e be e sa le ngwana. Beibele e bolela ka Jesu ge a be a e-na le nywaga e 12 gore: “A theoga le bona [batswadi ba gagwe] a tla Natsaretha gomme a tšwela pele a ikokobeleditše bona.”—Luka 2:51; Baefeso 6:1-3.

Ke ka baka la’ng re swanetše go diriša melao ye ya motheo?

Mabapi le dithuto tšeo a di rutilego barutiwa ba gagwe, Jesu o itše: “Ge e ba le tseba dilo tše, le a thaba ge e ba le di dira.” (Johane 13:17) E le gore re be Bakriste ba therešo, re swanetše go diriša keletšo yeo Jesu a re neilego yona mabapi le tsela yeo re swanetšego go swara ba bangwe. O itše: “Bohle ba tla tseba ka se gore le barutiwa ba-ka, ge e ba le ratana.”—Johane 13:35.

Bakeng sa tsebišo e oketšegilego, bona kgaolo 14 pukung ya Ke Eng Seo ge e le Gabotse Beibele e se Rutago? *

[Mongwalo wa ka tlase]

[Seswantšho go letlakala 16, 17]

Seswantšho sa Jesu sa morwa wa lehlaswa se re ruta bohlokwa bja go ba botho le go ba bao ba lebalelago.—Luka 15:11-32

[Seswantšho go letlakala 17]

Banyalani ba swanetše go botegelana