Ge e le Gabotse Tatago Rena wa Legodimong ke Motho wa Mohuta Mang?

BATHO ba bantši ba kgona go boeletša ka hlogo thapelo ya Tatawešo goba Thapelo ya Morena, e lego thapelo ya mohlala yeo Jesu a e rutilego barutiwa ba gagwe. (Mateo 6:9-13) Nako le nako ge ba boeletša thapelo yeo ba bitša Modimo “Tata-wešo.” Lega go le bjalo, ke ba ba kae bao ba ka bolelago gore ba mo tseba gabotse?

Go thwe’ng ka wena? Na o tseba Modimo gabotse? Na o na le tswalano ya kgaufsi le yena, o bolela le yena le go mmotša dilo tšeo di go thabišago le tšeo di go nyamišago? Ge e le gabotse, go mo tseba go akaretša’ng?

“Jehofa ke Leina la Gagwe”

Ngwana yo monyenyane a ka tseba tatagwe e le feela Papa. Lega go le bjalo, ge a dutše a gola, o thoma go tseba leina tatagwe le botumo bja gagwe gomme mohlomongwe o thoma go ikgantšha ka yena. Go thwe’ng ka Monei-Bophelo wa rena wa legodimong? Na o tseba leina la gagwe le seo le se emelago?

Gaešita le ge batho ba bantši ba boeletša polelwana e rego “Leina la xaxo a le kxêthwe” ge ba rapela Thapelo ya Morena, go ka direga gore ba se be le karabo ge ba botšišwa gore, “Leina leo ke lefe?” (Beibele ya Sepedi) Magodimo a tletšego dinaledi, dithaba tše dikgolo, di-coral reef tšeo di tletšego ka bophelo—di re nea bohlatse bja go ba gona ga Modimo. Lega go le bjalo, ga di re botše leina la gagwe. E le gore re tsebe leina leo, re swanetše go bala Beibele. E re botša ka boripana gore: “Jehofa ke leina la gagwe.”—Ekisodo 15:3 PK.

Modimo o nyaka gore re mo tsebe ka leina la gagwe, Jehofa. Ka baka la’ng? Ka gore leina la gagwe le emela seo a lego sona. Leina leo le bolela gore “Yo a bakago go ba gona.” Ka mantšu a mangwe, o ba selo se sengwe le se sengwe seo a nyakago go ba sona bakeng sa go phethagatša morero  wa gagwe. Nagana ka se: E le gore tate a hlokomele lapa la gagwe, o tliša dijo ka gae, e ba moeletši, moahlodi, mmoleledi, mošireletši le morutiši, go ithekgile ka dinyakwa le maemo a lapa la gagwe. Ka mo go swanago, leina Jehofa le re kgonthišetša gore go sa šetšwe seo se diregago, Modimo a ka kgona go phethagatša morero wa gagwe wa go šegofatša batho ka moka bao ba mo hlankelago.

Anke re hlahlobe dikarolo tše di fapa-fapanego tšeo Modimo wa rena yo lerato a di phethago ka go dumelelana le seo leina la gagwe le se bolelago. Se se tla go thuša go tšeela godimo seo Jehofa a lego sona, go akaretša le go tseba seo o swanetšego go se dira gore o batamele kgaufsi le yena.

“Modimo wa Lerato le Khutšo”

Moapostola Paulo o boletše ka Mmopi wa rena gore ke “Modimo wa lerato le khutšo.” (2 Bakorinthe 13:11) Ka baka la’ng? Pejana Jesu Kriste o ile a re: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) Ka baka la lerato la gagwe go batho, Modimo o re neile Morwa wa gagwe yo a rategago e le topollo bakeng sa go dira gore go kgonege gore ka moka bao ba bontšhago tumelo go morwa wa gagwe ba thabele bophelo lefaseng ka mo go sa felego, go se bohloko le tlaišego tšeo di bakwago ke sebe. Ke ka lebaka leo Paulo a itšego: “Moputso woo sebe se o lefago ke lehu, eupša mpho yeo Modimo a e neago ke bophelo bjo bo sa felego ka Kriste Jesu Morena wa rena.” (Baroma 6:23) Na seo ga se a swanela go re tutueletša go rata Modimo le go batamela kgaufsi le yena?

Modimo ga a bontšhe lerato feela go batho ka kakaretšo eupša o le bontšha le go bao ba mmotegelago e le motho ka o tee ka o tee. Go Baisiraele ba bogologolo, bao ka dinako tše dingwe ba bego ba sa latele melao ya Modimo, Moše o ile a re: “Wêna Sethšaba sa bošilô, sehlôka-thlaloxanyô, a ké xôna xo leboxa Yêna Morêna? A xa se Yêna Tat’axo, Mong’a xaxo? A xa wa ka wa dirwa wa tsengwa ke Yêna?” (Doiteronomio 32:6) Na o kwešiša seo se bolelwago ke mantšu a? Bjalo ka Tate yo lerato, Jehofa o be a hlokomela batho ba gagwe, gaešita le ge a be a lemoga mafokodi a bona. Le gona, o ile a hlokomela dinyakwa tša bona tša bohlokwa—tša dilo tšeo ba di nyakago e le gore ba phele, tša maikwelo le tša moya.

Ka moka re lebeletšana le maemo a fapa-fapanego a bophelo gomme ka dinako tše dingwe re ikwa re nyamile. Re nyaka motho yo a ka re thušago go kwešiša maemo le mathata a rena. Ke mang yo a ka re thušago? Ka Lentšu la gagwe e lego Beibele, Jehofa o ipontšha e le Moahlodi le Mohlokomedi yo lerato. Puku yeo e Kgethwa e hlalosa lebaka leo ka lona re bago le mathata a mantši le kamoo re ka lebeletšanago le ona ka katlego. Bjalo ka ge tate yo lerato a thuša morwa wa gagwe yo a welego gomme a gobala, Jehofa le yena ka lerato o inama ka tsela ya seswantšhetšo bakeng sa go re nea thušo yeo re e nyakago. Ka kgonthe, Jehofa o kgona go thuša bao ba bontšhago tumelo go yena.—Jesaya 59:1.

Lerato la Jehofa go rena le bonagala gape ka go ba ga gagwe “Mokwi wa dithapêlô.” (Psalme 65:2) Go bjalo bjang? Moapostola Paulo o hlalosa gore: “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga; gomme khutšo ya Modimo ye e fetago kgopolo yohle e tla diša dipelo tša lena le matla a lena a monagano ka Kriste Jesu.” (Bafilipi 4:6, 7) Ka go retologela go Modimo ka thapelo e tšwago pelong le go latela tlhahlo yeo a e neago ka Lentšung la gagwe, le wena o ka ba le “khutšo ya Modimo ye e fetago kgopolo yohle.”

“Modimo wa Temogo”

Jehofa Modimo o hlaloswa ka Beibeleng e le yo a nago le “tsebô e se naxo bosodi.” Bjalo ka “Modimo wa temogo,” o kwešiša batho gomme  o tseba dinyakwa tša bona gakaone go feta motho le ge e le ofe yo mongwe. (Jobo 36:4; 1 Samuele 2:3, PK) O ile a bolela ka mohlanka wa gagwe Moše gore “motho xa a phele ka boxôbê fêla; ka xobane motho ó phela ka ohle ma-tšwa-molomong wa Morêna.” (Doiteronomio 8:3; Mateo 4:4) Se se bolela gore e le gore re kgotsofale e le ka kgonthe bophelong, re nyaka se se fetago dilo tšeo re iphedišago ka tšona.

Mmopi wa rena o re nea tlhahlo e bohlokwa le keletšo ka Lentšu la gagwe e lego Beibele. Ge re ithuta Beibele le go diriša keletšo ya gagwe maphelong a rena, re holwa ke ‘matšwa-molomong wa Jehofa ka moka.’ Ka mohlala, Zuzanna, e lego mosadi wa Mokriste, o boletše se mabapi le bophelo bja lapa la gagwe: “Lenyalo la rena le ile la matlafatšwa ke go bala ga rena Beibele gotee, go ya dibokeng tša Bokriste gotee gaešita le go botša ba bangwe seo re ithutilego sona. Ka baka la tlhahlo ya Modimo re phegelela dilo tše di swanago bophelong gomme re thabela tswalano e tiilego.”

Na o ka rata go holwa ke keletšo le thlahlo tšeo di tšwago go Modimo? Ka go ithuta Beibele ka mehla le go diriša keletšo ya yona, o ka hwetša ditšhegofatšo tšeo di tšwago go Modimo.—Baheberu 12:9.

‘Modimo wa Phološo’

Lehono lefase le tletše dintwa. Batho ga ba kgonthišege ka seo bokamoso bo ba swaretšego sona. Ge e ba o phela nageng yeo e sentšwego ke ntwa, o ka hlologela khutšo. Dikarolong tše dingwe tše dintši tša lefase, batho ba dula ba boifa bosenyi le bošoro, go se tsepame ga maemo a tša ditšhelete le botšhošetši. Ke mang yo a ka re phološago dilong tše ka moka? Ga bjale, go feta le ge e le neng pele, batho ba nyaka tšhireletšo le tlhakodišo.

Beibele e re: “Leina la Jehofa ke sebo se se thata; e a lokilego o tšhabela go sona, gomme o a hlakodišwa.” (Diema 18:10, PK) Go tseba leina la Modimo le go ithekga ka lona go ka lebiša tlhokomelo ya rena go seo a se dirilego le seo a tlago go se dira go phološa bao ba bontšhago tumelo go yena. Ka ntle le pelaelo, Jehofa Modimo o bontšhitše gore o kgona go phološa batho ba gagwe. ka mohlala, o phološitše Baisiraele ka go fediša dikoloi tša Farao tša ntwa le mašole a gagwe. Jehofa o ipontšhitše gore ke Modimo yo a ka botwago, Modimo yo a gopolago bao ba tlaišegago le yo a kganyogago go ba thuša.—Ekisodo 15:1-4.

Bokamoso bja rena bja ka mo go sa felego bo ithekgile ka gore re be le tumelo go Jehofa Modimo e le Mophološi. Kgoši Dafida wa Isiraele ya bogologolo, yoo a ilego a lebeletšana le mathata a mantši, o ile a bontšha tumelo e swanago ge a be a ngwala ka Jehofa gore: “Modimo wa xo mphološa ke Wene.” (Psalme 25:5) Moapostola Petro o boletše ka kgodišego gore: “Jehofa o tseba go hlakodiša batho ba boineelo go Modimo molekong.”—2 Petro 2:9.

Mabapi le motho yo a lebelago go yena bakeng sa thušo, Modimo o holofeditše gore: “Ke tlo mo khutiša xobane ó tseba ’ina la-ka.” (Psalme 91:14) Bahlanka ba Modimo ba lehono ba hweditše gore kholofetšo ye ke ya therešo. Henryk yo a dulago kua Poland, o hlanketše Jehofa ka potego ka nywaga e 70 go sa šetšwe mathata  le tlaišo. Ge Henryk a be a e-na le nywaga e 16 feela, tatagwe o ile a išwa kampeng ya tshwenyo ya Auschwitz. Henryk le mogolo’agwe ba ile ba išwa kgolegong ya bafsa ya Nazi. Ka morago ga moo, o be a dula a tlošwa kampeng e nngwe ya tshwenyo a išwa go e nngwe. Mabapi le ditiragalo tša nakong yeo, Henryk o gopola gore: “Jehofa ga se a ka a ntahla dinakong ka moka tše thata. Ka mehla o ile a nthuša gore ke dule ke botega, gaešita le ge ka dinako tše dingwe ke be ke lebeletšana le lehu.” Ee, Jehofa o nea bahlanka ba gagwe tumelo le matla e le gore ba kgotlelele.

Kgaufsinyane Modimo o tla ipontšha e le mophološi go bohle bao ba bontšhago tumelo go yena le go lebelela go yena bakeng sa tlhakodišo. O re: “Ke Nna Jehofa, Nna, ga go mophološi ka ntle ga ka.” (Jesaya 43:11, PK) “Ntweng ya letšatši le legolo la Modimo Ra-matla-ohle,” o tla fediša ba kgopo lefaseng gomme a phološa baloki. (Kutollo 16:14, 16; Diema 2:21, 22) Jehofa o re kgonthišetša gore: “Ba bolêta e tlo ba bôná beng ba naxa; ba tlo thaba ka botlalô bya moláô.”—Psalme 37:11.

Go ba “Bana ba Modimo”

Mehleng ya moporofeta Maleaki Baisiraele ba be ba bolela gore Jehofa ke Tatago bona. Lega go le bjalo, ge go tliwa tabeng ya go mo nea tlhompho le boineelo, ba be ba neela ka dinkgwa tše di šilafetšego le diphoofolo tše di foufefetšego le tše di hlotšago e le dihlabelo. Ke ka baka leo Jehofa a ilego a ba botšiša gore: “Byale, Nna kè le tata-weno, ke xodišwa kae?”—Maleaki 1:6.

O se ke wa dira phošo e swanago le ya Baisiraele bao ba sa botegego. Go e na le moo, re go kgothaletša go ithuta ka Jehofa le go batamela kgaufsi le yena. Morutiwa Jakobo o kgothaleditše ka gore: “Batamelang Modimo, gomme o tla le batamela.”—Jakobo 4:8.

Go ba le Jehofa bjalo ka Tate go tliša boikarabelo bjo itšego. Ge e ba o katanela go hlompha Modimo ka go kgomarela ditekanyetšo tša gagwe dikarolong ka moka tša bophelo bja gago, a ka se ke a lebala maiteko a gago. Go e na le moo, o tla go thuša go sepela tseleng e otlologilego e lebišago lefaseng le lefsa leo le holofeditšwego leo go lona ‘lehu le ka se hlwego le sa ba gona, le ge e le manyami goba sello goba bohloko di ka se hlwego di sa ba gona.’ (Kutollo 21:4) Ka nako yeo batho bohle bao ba kwago ba tla ‘lokollwa bokgobeng bja tshenyego gomme ba ba le tokologo ya letago ya bana ba Modimo.’—Baroma 8:21.

[Ntlhakgolo go letlakala 5]

Modimo o nyaka gore re mo tsebe ka leina la gagwe, Jehofa, leo ka go lebanya le bolelago “Yo bakago go ba gona”

[Ntlhakgolo go letlakala 6]

“Jehofa ga se a ka a ntahla dinakong ka moka tše thata.”​—HENRYK

[Ntlhakgolo go letlakala 7]

“Lenyalo la rena le ile la matlafatšwa ke go bala ga rena Beibele gotee, go ya dibokeng tša Bokriste gotee gaešita le go botša ba bangwe seo re ithutilego sona.”​—ZUZANNA