Babadi ba Rena ba a Botšiša

Ke ka Baka La’ng re Swanetše go Diriša Leina la Modimo ge e ba re sa Kgonthišege Gore le Bitšwa Bjang?

Lehono ga go yo a tsebago gabotse gore leina la Modimo le be le bitšwa bjang Seheberung sa bogologolo. Lega go le bjalo, seo re se hlokomelago ke gore leina la Modimo le tšwelela ka makga a ka bago 7 000 tabeng e ngwadilwego ya Beibele. Jesu o ile a tsebatša leina la Modimo ge a be a le lefaseng, gomme o laetše barutiwa ba gagwe gore ba rapelele gore leina leo le kgethagatšwe. (Mateo 6:9; Johane 17:6) Ka gona, re kgodišegile ka selo se tee—go dirišwa ga leina la Modimo ke gabohlokwa kudu tumelong ya Bokriste. Ka gona, ke ka baka la’ng lehono re sa kgonthišege ka tsela yeo leina le le bego le bitšwa ka yona mathomong? Go na le mabaka a mabedi a magolo.

La pele, moo e ka bago nywageng e dikete tše pedi e fetilego, Bajuda ba ile ba thoma motlwae wa tumela-khwele wa gore go fošagetše go bitša leina la Modimo. Ge mmadi a be a kopana le leina leo ka Beibeleng, o be a tla bitša lentšu “Morena” legatong la lona. Ka tsela ye, ka morago ga go se sa dirišwa ga lona ka ngwaga-kgolo e mentši, batho ba ile ba lebala mmiletšo wa leina la Modimo.

La bobedi, Seheberu sa bogologolo se be se ngwalwa go sa dirišwe ditumanoši go swana le go khutsofatšwa ga mantšu lelemeng la Seisemane le malemeng a mangwe. Ge mmadi a be a bala taba e ngwadilwego, o be a tsenya modumo wa ditumanoši tšeo di se go gona ka hlogo. Ge nako e dutše e e-ya, go ile gwa hlangwa mokgwa wa go dira gore mmiletšo wa mantšu a Seheberu o se ke wa lebalwa ka mo go feletšego. Go ile gwa tsenywa ditumanoši lentšung le lengwe le le lengwe ka Beibeleng ya Seheberu. Lega go le bjalo, bakeng sa leina la Modimo, mohlomongwe go ile gwa tsenywa ditumanoši tša lentšu “Morena” e le go gopotša mmadi gore a bitše lentšu leo leina la Modimo le tšeetšwego legato ka lona goba gwa se tsenywe ditumanoši ka mo go feletšego.

Ka gona, go ile gwa phologa ditumammogo tše nne tšeo di bitšwago Tetragrammaton, tšeo pukuntšu e nngwe e di hlalosago e le “ditlhaka tše nne tša Seheberu tšeo ka tlwaelo di fetolelwago e le YHWH goba JHVH, tšeo di bopago leina la Modimo leo le dirišwago ka Beibeleng. Go bonolo go bona ka moo JHVH yeo e tsentšwego ditumanoši le medumo ya ditumanoši, e fetogago “Jehofa,” e lego leina leo le tlwaelegilego kudu ka Sepedi le leo le amogelwago ke batho ba bantši.

Lega go le bjalo, diithuti tše dingwe di kgothaletša gore le bitšwe “Yahweh.” Na mmiletšo wo o batametše kgaufsi kudu go wa mathomo? Ga go yo a ka kgonthišegago. Ge e le gabotse, diithuti tše dingwe di neile mabaka a gore go se ke gwa dirišwa mmiletšo wo. Ke therešo gore ge maina a ka Beibeleng a bitšwa ka maleme a lehono, mohlomongwe ga a kwagale ka mokgwa woo a bego a bitšwa ka ona ka Seheberu sa mathomo le gatee gomme ga go yo a ganetšago seo. Lebaka ke gore maina a a šetše a fetogile karolo ya maleme a rena gomme a lemogwa gabonolo. Go bjalo le ka leina Jehofa.

Bakriste ba lekgolong la pele la nywaga ba be ba bitšwa batho ba leina la Modimo. Ba be ba botša ba bangwe ka leina leo gomme ba ba kgothaletša go le bitša. (Ditiro 2:21; 15:14; Baroma 10:13-15) Go molaleng gore go bohlokwa go Modimo gore re diriše leina la gagwe ka leleme le ge e le lefe leo re le bolelago, re lemoge bohlokwa bja lona gomme re phele ka go dumelelana le seo le se emelago.

[Ntlhakgolo go letlakala 31]

Seo re se hlokomelago ke gore leina la Modimo le tšwelela ka makga a ka bago 7 000 tabeng e ngwadilwego ya Beibele