Na o Tseba Tatago wa Legodimong?

NA O tseba tatago gabotse? Potšišo ye e ka bonala e le e makatšago ge e ba o godišeditšwe lapeng leo le nago le lerato. O ka araba ka gore: ‘Ee, ke mo tseba gabotse!’ Ee, batho ba bantši ba tseba seo botatago bona ba se ratago le seo ba sa se ratego, kamoo ba itshwarago ka gona maemong a itšego le kamoo ba hlokomelago malapa a bona ka gona.

Lega go le bjalo, go ka ba go bile le dinako tšeo ka tšona o ilego wa makatšwa ke go bona sebopego se sa letelwago sa semelo sa tatago. Ka mohlala, morwa a ka tseba tatagwe e le motho yo a homotšego le yo bonolo—go fihlela go e ba le boemo bja tšhoganetšo. Go sa letelwa, o bona tatagwe a šireletša lapa la gagwe ka sebete.

Go thwe’ng ka Mmopi wa rena? Re botšwa mabapi le yena gore: “Ka yena re na le bophelo, re a sepela e bile re gona.” (Ditiro 17:28) Modimo o re neile bophelo, ka kgopolo yeo ke tatago bohle bao ba phelago. (Jesaya 64:8) Mohlomongwe ke kamoo o ikwago ka gona ka Modimo, le gona ke mo go swanetšego go ikwa bjalo. Lega go le bjalo, gona le mo gontši mo re swanetšego go go tseba le go ithuta ka yena—bakeng sa gore re holege le gore re thabe.

Tsela yeo o ikwago ka yona ka tatago le go mo hlompha e ithekgile kamoo o mo tsebago gabotse ka gona. Ka mo go swanago, ge o dutše o tseba Modimo gakaone, ke moo tswalano ya gago le yena e bago ya kgaufsi kudu. Modimo a ka go thuša go lebeletšana le mathata a bophelo ge e ba o tšwela pele go mo tseba le go ithuta go dira thato ya gagwe.

Modimo ke motho wa mohuta mang? Dika tša gagwe di swanetše go kgoma tsela yeo o ikwago ka yena bjang? Na go mo tseba go go nea boikarabelo bjo itšego? O tla hwetša dikarabo tša dipotšišo tše sehlogong se se latelago.

[Ntlhakgolo go letlakala 3]

Tsela yeo o ikwago ka yona ka ba bangwe e ka kgongwa ke kamoo o ba tsebago gabotse ka gona