Babadi ba Rena ba a Botšiša

Ge E-ba Adama a be a Phethagetše, go Tlile Bjang Gore a Dire Sebe?

Go be go kgonega gore Adama a dire sebe ka gobane Modimo o mmopile a e-na le tokologo ya boikgethelo. Mpho ye ya go ikgethela ga e ganetšane le taba ya gore Adama o be a phethagetše. Ge e le gabotse, ke Modimo a nnoši yo a phethagetšego ka mo go feletšego. (Doiteronomio 32:3, 4; Psalme 18:30; Mareka 10:18) Go phethagala ga motho goba selo le ge e le sefe go lekanyeditšwe. Ka mohlala, thipa e ka ba e loketšego bakeng sa go sega nama eupša na o ka e diriršetša go nwa sopo? Selo e ba seo se phethagetšego ge feela se phethagatša morero woo se o diretšwego.

Ka gona, Modimo o be a bopetše Adama morero ofe? Morero wa Modimo e be e le gore ka Adama a tšweletše batho ba bohlale bao ba nago le tokologo ya boikgethelo. Bao ba bego ba nyaka go hlagolela lerato go Modimo le ditsela tša gagwe ba be ba tla bontšha seo ka go kgetha go kwa melao ya gagwe. Ka baka leo, go kwa go be go se gwa tlemelelwa monaganong wa motho, eupša go be go tla dirwa ka boithatelo go tšwa pelong. (Doiteronomio 10:12, 13; 30:19, 20) Ka gona, ge e ba Adama a be a se na bokgoni bja go kgetha go se kwe, o be a tla ba yo a sego a felela—yo a sego a phethagala. Mabapi le kamoo Adama a kgethilego go diriša tokologo ya gagwe ya boikgethelo, pego ya Beibele e bontšha gore o ile a latela mosadi wa gagwe go se kweng molao wa Modimo wa mabapi le “sehlare sa xo tseba botse le bobe.”—Genesi 2:17; 3:1-6.

Ka gona, na Modimo o bopile Adama a e-na le bothata bja go kgetha se se nepagetšego le se se fošagetšego, ka go realo a se be le bokgoni bja go dira diphetho tše bohlale goba go ganetša teko? Pele ga go se kwe ga Adama, Jehofa Modimo o be a ile a hlahloba tlholo ya gagwe ka moka ya lefaseng go akaretša le batho ba babedi ba pele gomme o be a phethile ka gore ke e “botse kudu.” (Genesi 1:31) Ka gona, ge Adama a be a dira sebe ga se gwa nyakega gore Mmopi wa gagwe a lokiše bothata bjo itšego bjo bo bilego gona ge a bopša, eupša o ile a phara Adama molato ka mo go swanetšego. (Genesi 3:17-19) Adama o be a paletšwe ke go dumelela go rata Modimo le go rata se se nepagetšego go mo tutueletša go kwa Modimo ka godimo ga tšohle.

Le gona, gopola gore ge Jesu a be a le mo lefaseng o be a phethagetše go swana le Adama. Lega go le bjalo, Jesu, go fapana le ditlogolo tše dingwe tša Adama, o belegwe ka baka la moya o mokgethwa gomme ka go realo a se ke a abela bofokodi bjo bo bego bo ka mo palediša go ganetša teko. (Luka 1:30, 31; 2:21; 3:23, 38) Jesu o ile a dula a botegela Tatagwe ka go rata go sa šetšwe kgateletšo e šoro. Adama, ka go diriša tokologo ya gagwe ya boikgethelo, o be a ikarabela ka go palelwa ga gagwe ke go kwa taelo ya Jehofa.

Ka gona, ke ka baka la’ng Adama a ile a kgetha go se kwe Modimo? Na o be a nagana gore a ka kaonafatša boemo bja gagwe ka tsela e itšego? Aowa, ka gobane moapostola Paulo o ngwadile gore “Adama ga se a forwa.” (1 Timotheo 2:14) Lega go le bjalo, Adama o kgethile go ineela dikganyogong tša mosadi wa gagwe yo a bego a šetše a kgethile go ja sehlareng seo se ileditšwego. Kganyogo ya gagwe ya go mo kgahliša e be e feta ya go kgahliša Mmopi wa gagwe. Ka kgonthe, ge Adama a be a tlišetšwa seenywa se ileditšwego, o be a swanetše go ema go se nene gomme a naganišiše ka ditla-morago tšeo go se kwe go bego go tla ba le tšona tswalanong ya gagwe le Modimo. Ka ge a be a sa rate Modimo ka mo go tseneletšego, Adama o be a le kotsing ya go fenywa ke kgateletšo, go akaretša le e tšwago go mosadi wa gagwe.

Adama o ile a dira sebe pele a e-ba le bana, ka gona ditlogolo tša gagwe ka moka di belegwe di sa phethagala. Lega go le bjalo, go swana le Adama re na le tokologo ya boikgethelo. Eka re ka kgetha go naganišiša ka tebogo ka botho bja Jehofa gomme re rate Modimo ka mo go tseneletšego, yena yo a swanelwago ke gore re mo kwe gomme re mo rapele.—Psalme 63:6; Mateo 22:36, 37.