Go Porofeta ka Mesia

KA GE setšhaba sa Bajuda se be se tseba seo Jesaya le baporofeta ba bangwe ba se ngwadilego ka Mesia, se be se fagahletše go tla ga gagwe. Ge e le gabotse, mehleng ya Jesu Bajuda ba bantši “ba be ba letile” go tšwelela mo go lego kgaufsi ga Mesia. (Luka 3:15) Seo se hlokomelegago ke gore boporofeta bjo bontši bja Beibele bo akaretša ditaba tše di makatšago tša mabapi le bophelo bja Mesia. Ga go motho yo a bego a ka porofeta ka ditiragalo tše bjalo goba a rulaganya gore di diragalele Jesu.

Ditaba ka Botlalo tša Mabapi le go Belegwa ga Mesia. Jesaya o porofetile gore Mesia goba Kriste o be a tla belegwa ke kgarebe. Ka morago ga go hlalosa maemo a mohlolo ao Jesu a bego a tla belegwa ka tlase ga ona, moapostola Mateo o ngwadile gore: “Ge e le gabotse, se ka moka se diregile gore go phethagale seo se ilego sa bolelwa ke Jehofa ka moporofeta wa gagwe, ge a be a re: ‘Bonang! Kgarebe e tla ima gomme e tla belega morwa.’” (Mateo 1:22, 23; Jesaya 7:14) Le gona,  Jesaya o porofetile gore Kriste e be e tla ba setlogolo sa Dafida gomme ka mo go kgethegilego a bolela ka Jese e lego tatago Dafida. Jesu e bile setlogolo sa Dafida ka go lebanya e le ka kgonthe. (Mateo 1:6, 16; Luka 3:23, 31, 32) Ka gona, pele Jesu a belegwa, morongwa Gabriele o boditše mmago Jesu e lego Maria gore: “Modimo o tla mo nea sedulo sa bogoši sa Dafida tatagwe.”—Luka 1:32, 33; Jesaya 11:1-5, 10; Baroma 15:12.

Ditaba ka Botlalo tša Mabapi le Bophelo bja Mesia. Ge a le ka sinagogeng kua Natsaretha, Jesu yo a godilego o ile a bala ka go hlaboša go tšwa boporofeteng bja Jesaya bjo bo akaretšago mantšu a: “Moya wa Jehofa o go nna, gobane o ntloleditše go tsebiša badiidi ditaba tše dibotse.” Ge a diriša boporofeta bjo go yena, Jesu o itše: “Lehono lengwalo le leo le sa tšwago go le kwa le phethagetše.” (Luka 4:17-21; Jesaya 61:1, 2) Le gona, Jesaya o boletše e sa le pele ka tsela ya Jesu e nago le botho, bonolo le go se ikgodiše ge a dirišana le bao ba nyakago go fodišwa. Mateo o ngwala gore: “Ba bantši le bona ba mo latela, gomme a ba fodiša ka moka, eupša a ba laela ka thata gore ba se ke ba mo tsebatša; e le gore go tle go phethagale se se boletšwego ka Jesaya moporofeta . . . ‘A ka se ke a tsoša kgang, goba go hlaba mokgoši . . . Ga go lehlaka le le thinyegilego le a tlago go le robaganya.’”—Mateo 8:16, 17; 12:10-21; Jesaya 42:1-4; 53:4, 5.

Ditaba ka Botlalo tša Mabapi le Tlaišego ya Mesia. Jesaya o porofetile gore Mesia o be a ka se amogelwe ke ba bantši kua Isiraele eupša go e na le moo o be a tla ba “lebyè la sekxopi” go bona. (1 Petro 2:6-8; Jesaya 8:14, 15) Le gona, go sa šetšwe mehlolo ya Jesu e mentši, ka kgonthe batho “ba be ba sa dumele go yena, moo lentšu la Jesaya moporofeta le ilego la phethagala le a le boletšego ge a re: ‘Jehofa, ke mang yo a dumetšego dilo tšeo re di kwelego?’” (Johane 12:37, 38; Jesaya 53:1) Seo se tlaleleditšego go hlokeng tumelo ga Bajuda e bile tumelo e fošagetšego yeo ba bantši ba bego ba e-na le yona ya gore Mesia o be a tla imolla setšhaba pušong ya Baroma gatee-tee gomme a tsošološa mmušo wa Dafida mo lefaseng. Ka gobane Jesu a ile a tlaišega gomme a hwa, Bajuda ba bantši ba be ba sa dumele gore ke Mesia. Eupša, ge e le gabotse, Jesaya o be a boletše e sa le pele gore Mesia o be a tla tlaišega pele a e-ba Kgoši.

Ka pukung ya Jesaya, Mesia o bolela ka tsela ya boporofeta gore: “Mokôkôtlô wa-ka ke o neetše baotli . . . sefahloxô sa-ka xa k’a se šexêla mahlapa le mare.” Mateo o bega seo se diregilego ge Jesu a be a sekišwa ka gore: “Ba mo tshwela ka mare sefahlegong gomme ba mo itia ka matswele. Ba bangwe ba mo phasola sefahlego.” (Jesaya 50:6; Mateo 26:67) Jesaya o ngwadile gore: “A tlaišwa, . . . a se kê a ba a ahlama.” Ka gona, ge Pilato a be a botšiša Jesu ka ditatofatšo tša Bajuda, Jesu ‘ga se a mo araba, aowa, le ge e le ka lentšu le tee, moo mmuši yo a ilego a makala kudu.’—Jesaya 53:7; Mateo 27:12-14; Ditiro 8:28, 32-35.

Ditaba ka Botlalo tša Mabapi le Lehu la Mesia. Boporofeta bja Jesaya bo ile bja tšwela pele go phethagala nakong ya lehu la Jesu gaešita le ka morago ga lona. Jesaya o boletše e sa le pele gore: “Ba mo laeletše xo fihlwa le ba babe, lebitla l’axwe le xo bahumi.” (Jesaya 53:9) Boporofeta bjo, bjoo go bonalago bo ikganetša, bo be bo ka phethagala bjang? Ge Jesu a e-hwa, o ile a kokotelwa koteng a le gare ga disenyi tše pedi. (Mateo 27:38) Eupša ka morago, Josefa wa Arimathea wa mohumi o ile a bea setopo sa Jesu ka lebitleng la gagwe leo le bego le sa tšwa go epša. (Mateo 27:57-60) Mafelelong, lehu la Jesu le phethagaditše e nngwe ya dikarolo tša bohlokwa tša boporofeta bja Jesaya. Ge a bolela ka Mesia, Jesaya o re: “Yêna mohlanka wa-ka moloki, . . . ó tlo lokafatša ba bantši, ’me molato wa bôná  ó tlo rwalwa ke yêna.” Ka kgonthe, lehu la Jesu le re neile topollo e le gore batho ka moka ba botegago ba ka imollwa morwalo wa sebe.—Jesaya 53:8, 11; Baroma 4:25.

Boporofeta bjo go Nago le Kgonthišetšo ya Gore bo tla Phethagatšwa

E le gore ba bone gore go ya ka Mangwalo Mesisa ke mang, baapostola le Jesu ka boyena ba ile ba tsopola gantši go tšwa boporofeteng bja Jesaya go feta puku le ge e le efe e nngwe ya Beibele. Lega go le bjalo, puku ya Jesaya e be e se yona feela yeo e porofetago ka bokamoso. Boporofeta bjo bongwe bjo bontši bja Mangwalo a Seheberu le bjona bo tla phethagala go Jesu, Mmušo wa gagwe le dilong tše dibotse tšeo Mmušo wo o tlago go di fihlelela nakong e tlago. * (Ditiro 28:23; Kutollo 19:10) Go be go e-na le kgonthišetšo e kaaka’ng ya gore boporofeta bjo bo tla phethagala? Jesu o boditše batheetši ba gagwe ba Bajuda gore: “Le se ke la nagana gore ke tletše go fediša Molao goba Baporofeta [ke gore, Mangwalo a Seheberu]. Ke tletše go phethagatša, e sego go fediša; gobane ruri ke a le botša, legodimo le lefase di be di tla feta kapejana go e na le gore tlhaka e tee e nyenyane-nyenyane goba karolwana e tee ya tlhaka e fete Molaong ka mokgwa le ge e le ofe, gomme dilo tšohle tša se ke tša direga.”—Mateo 5:17, 18.

Le gona, Jesu o boletše ka go phethagala ga boporofeta bja Beibele ditiragalong tšeo di diregilego mehleng ya gagwe le tša nakong e tlago. (Daniele 9:27; Mateo 15:7-9; 24:15) Go oketša moo, Jesu le baapostola ba gagwe ka bobona ba porofetile ditiragalo tšeo di bego di tla direga ka morago ga mehla ya bona, go akaretša le tše dintši tšeo re di bonego di phethagala lehono. Sehlogo se se latelago se tla ahla-ahla ditiragalo tše gotee le tše dingwe tša nakong e tlago tšeo di phethagatšago boporofeta bja Beibele.

[Mongwalo wa tlase]

[Seswantšho go letlakala 4]

“Kgarebe e tla . . . belega morwa”

[Seswantšho go letlakala 5]

“Sefahloxô sa-ka xa k’a se šexêla mahlapa”