Kamoo Tumelo Ya-ka e Nthušitšego go Lebeletšana le Mathata ●

Bjalo ka ge go anega Soledad Castillo

Bodutu bo ka ba bo ile bja mphenya ka makga a mmalwa bophelong bja-ka —eupša ga se bja ka bja dira bjalo. Ge ke be ke e-na le nywaga e 34 ke ile ka hwelwa ke monna. Nywaga e tshela ka morago, ka hwela ke tate. Dikgwedi tše seswai ka morago ga go hwelwa ke tate, ke ile hwetša gore morwa wa-ka o swerwe ke bolwetši bjo bo sa alafegego.

LEINA la-ka ke Soledad, gomme le bolela “Bodutu.” Gaešita le ge go bonala go makatša, ga se ka ka ka lewa ke bodutu ka mo go feletšego. Ge ke be ke lebeletšane le mathata, ke be ke dumela gore Jehofa Modimo o be a le e-na le nna gomme a ‘ntshwere ka seatla sa-ka sa le letona, e le gore ke se boife.’ (Jesaya 41:13) E-re ke hlalose gore ke ile ka phologa bjang mathata a ka le gore ke bjang a ilego a dira gore ke batamele kgaufsi le Jehofa.

Bophelo bjo Thabilego ke E-na le Mathata a Sego Kae Feela

Ke belegetšwe Barcelona, kua Spain ka May 3 1961, ke le ngwana a nnoši wa batswadi ba-ka e lego, José le Soledad. Ge ke be ke e-na le nywaga e senyane, mma o ile a ithuta ditherešo tša Lentšu la Modimo. O be nyakile a dikarabo tša dipotšišo tša gagwe tša bodumedi eupša a sa ka a kgotsofatšwa ke kereke ya gagwe. Ka letšatši le lengwe, Dihlatse tša Jehofa tše pedi di ile tša etela mma ka gae gomme tša araba dipotšišo tša gagwe go tšwa Mangwalong. O ile a amogela thuto ya Beibele ka mafolofolo.

Ka nakwana e nyenyane, mma o ile a ba Hlatse e kolobeditšwego ya Jehofa gomme nywaga e sego kae ka morago tate o ile a latela mohlala wa gagwe. Go se go ye kae, Eliana yo a bego a ithuta le mma, o ile a lemoga kganyogo ya-ka ka Lentšu la Modimo. Gaešita le ge ke be e le yo monyenyane, Eliana o ile a šišinya gore ke be le thuto ya-ka. Ka baka la thušo ya gagwe le kgothatšo ya mma ke ile ka kolobetšwa ke e-na le nywaga e 13.

Nywageng ya-ka ya mahlalagadi ke ile ka rapela Jehofa gantši—kudu-kudu ge ke be ke swanetše go dira diphetho. Ka boripana, ke be ke e-na le mathata a sego kae feela ge ke be ke sa le nywageng ya mahlalagadi. Ka phuthegong, ke be ke e-na le bagwera ba bantši gomme ke be ke e-na le tswalano ya kgaufsi le batswadi ba-ka. Ka 1982, ke ile ka nywalwa ke Felipe, e lego Hlatse yeo e bego e nyaka go fihlelela dilo tše swanago le tšeo ke nyakago go di fihlelela borapeding bja-ka.

Go Godiša Ngwana wa Rena Gore a Rate Jehofa

Nywaga e mehlano ka morago, ke ila ka belega ngwana yo mobotse wa mošemanyana yoo re ilego ra mo rea Saúl. Nna le Felipe re be re thabetše go ba le ngwana. Re be re holofetše gore Saúl o tla gola a phetše gabotse mmeleng le go ba ngwana yo ratago Jehofa Modimo. Nna le Felipe re feditše nako le Saúl, re bolela le yena ka Jehofa, re e-ja gotee,  re mo iša phakeng le go bapala le yena. Saúl o be a rata go sepela le Felipe ge a e-ya go bolela le ba bangwe ka ditherešo tša Beibele gomme o ile a mo ruta gore a tšee karolo modirong woo e sa le yo monyenyane, a mo ruta go kokota mejakong le go nea batho dipampišana.

Saúl o ile a arabela gabotse leratong la rena le tlwaetšong ya rena. Ge a šetše a e-na le nywaga e tshela o be a šetše a sepela le rena ka mehla go ya go bolela le batho ka Beibele. O be a thabela go theetša dikanegelo tša Beibele gomme a fagahlela thuto ya rena ya lapa ya Beibele. Ka pejana ka morago ga gore a thome go tsena sekolo, o ile a thoma go dira diphetho tše dinyenyane tšeo di theilwego tsebong ya gagwe ya Beibele.

Lega go le bjalo, ge Saúl a be a e-na le nywaga e šupa, bophelo bja rena bja lapa bo ile bja fetoga ka tsela e makatšago. Felipe o ile a swarwa ke bolwetši bja maswafo. O ile a swanelwa ke go katana le bolwetši bjoo ka dikgwedi tše tshela, a sa kgone go šoma gomme gantši a dula a le malaong. Monna wa-ka o ile a e-hwa a e-na le nywaga e 36.

Ke sa dutše ke lla ge ke nagana ka ngwaga woo o boima. Ke ile ka bona monna wa-ka a e-hwa ganyenyane-ganyenyane gomme go be go se seo nka se dirago. Nakong yeo ka moka ke be ke leka go nea Felipe kgothatšo eupša ka gare-gare ke be ke tseba gore dipakane tša-ka di be di senyegile. Ke be ke mmalela dihlogo tšeo di theilwego Mangwalong gomme di ile tša re matlafatša ge re be re sa kgone go ba gona dibokeng tša Bokriste. Ge a be a e-hwa ke ile ka tlelwa ke bodutu bjo šoro.

Lega go le bjalo, Jehofa o ile a nthekga. Ke be ke mo kgopela ka mehla go nnea moya wa gagwe. Ke ile ka mo leboga bakeng sa nywaga e thabišago yeo ke bilego le yona le Felipe go akaretša le kholofelo ya go bona Felipe gape nakong ya tsogo. Ke ile ka kgopela Jehofa gore a nthuše go thabela dinako tše fetilego tšeo nna le monna wa-ka re di thabetšego gotee le gore a nnee bohlale bja go godiša ngwana wa rena gore a be Mokriste wa therešo. Go sa šetšwe bohloko bjo bjo bogolo, ke ile ka kwa ke homotšwa.

Batswadi ba-ka le bao ba lego ka phuthegong ba ile ba nnea thekgo e kgolo kudu. Lega go le bjalo, ke be ke sa dutše ke swanetše ke go tšwela pele ke ruta Saúl Beibele le go mo ruta go tsela ya go hlankela Jehofa. Mothwadi wa-ka wa kgale o ile a nnea mošomo o mobotse wa ka ofising eupša ke ile ka kgetha go šoma mošomo wa go hlwekiša e le gore ke fetše nako e ntši le Saúl le go ba le yena ge a boa gae go tšwa sekolong.

Lengwalo le tee le ile la gatelela bohlokwa bja go tlwaetša Saúl ge le re: “Ngwana mo eteletše tsela y’axwe ké mo a tl’o xo tšofala à sa ka a e lahla.” (Diema 22:6) Lengwalo le le ile la nnea kholofelo ya gore ge e ba nka dira sohle seo ke se kgonago go bolela le Saúl ka melao ya motheo, gona Jehofa o be a tla šegofatša maiteko a-ka. Ke therešo gore ke ile ka swanelwa ke go dira boikgafo bja tša ditšhelete, eupša ke be ke nyaka go fetša nako le morwa wa-ka gomme seo se be se le bohlokwa go nna go feta go hwetša mahumo.

Ge Saúl a be a e-na le nywaga e 14, tate o ile a hwa. Saúl o ile a nyama kudu ka ge lehu la rakgolo’agwe le ile la mo gopotša bohloko bjo a ilego a bo kwa ge a be a lahlegelwa ke tatagwe. Tate le yena o be a beile mohlala o mobotse wa go rata Jehofa. Ka morago ga tahlegelo ye, Saúl o ile a phetha ka gore ke yena “monna” a nnoši ka  lapeng gomme ga bjale o be a swanetše ke go hlokomela mmagwe le makgolo’agwe.

Go Lwantšha Bolwetši bja Kankere ya Madi

Dikgwedi tše seswai ka morago ga gore tate a hwe, ngaka yeo e bego e hlahloba lapa lešo e ile ya mpotša gore ke iše Saúl sepetlele ka ge a be a tshwenywa ke go lapa mo go šoro. Ka morago ga diteko tša go latelana, ngaka e ile ya ntsebiša gore Saúl o swere ke bolwetši bja kankere ya madi (leukemia). *

Nywaga e mebedi le seripa e latetšego, Saúl o be a dula a tsena le go tšwa ka sepetlele ka ge a be a thatafalelwa ke go phela ka kankere yeo le dihlare tšeo dingaka di bego di di diriša maitekong a go lwantšha bolwetši bjoo. Kalafo yeo ya dikgwedi tše tshela e ile ya tliša go okobala ga bolwetši moo go ilego gwa tšwela pele ka dikgwedi tše 18. Lega go le bjalo, kankere e ile ya tsoga gomme Saúl o ile a newa tlhokomelo e nngwe ya tša kalafo ya go lwantšha kankere yeo e ilego ya mo dira gore a fokole kudu. Kankere e ile ya okobala ka nakwana gomme Saúl ga se a ka a kgona go tšwela pele ka tlhokomelo ya tša kalafo ka lekga la boraro. Saúl o be a neetše bophelo bja gagwe go Modimo gomme a bontšhitše kganyogo ya gagwe ya go kolobetšwa bjalo ka yo mongwe wa Dihlatse tša Jehofa eupša o ile a hwa ka morago ga go ba le nywaga e 17.

Gantši dingaka di kgothaletša gore molwetši a tšhelwe madi go lwantšha tsela yeo kalafo ya kankere e lego šoro ka yona. Ke therešo gore tšhelo ya madi ga e fodiše bolwetši. Ge dingaka di lemoga bolwetši bja Saúl, nna le yena re ile ra bolela ka mo go kwagalago gore re be re ka se amogele kalafo yeo ka ge re be re nyaka go boloka molao wa Jehofa wa gore re “ile . . . madi.” (Ditiro 15:19, 20) Saúl o ile a swanela ke go kgodiša dingaka dinakong tše dintši ge ke be ke se gona gore o be a itirela phetho ya gagwe ka nnoši tabeng ye. (Bona lepokisi go letlakala 31.)

Dingaka di ile tša feleletša ka go re Saúl o be a godile ka mo go lekanego go kwešiša gabotse bogolo bja bolwetši bja gagwe. Di ile tša dumela go hlompha boemo bja rena gomme tša re nea kalafo yeo e sa akaretšego tšhelo ya madi, gaešita le ge re be re dula re le ka tlase ga kgateletšo ya gore re fetoše phetho ya rena. Ke ile ka ikwa ke thabišwa ke Saúl ge ke be ke mo theetša a hlalosetša dingaka boemo bja gagwe mabapi le tšhelo ya madi. Go molaleng gore o be a hlagoletše tswalano ya kgaufsi le Jehofa.

Selemong seo ka sona re lemogilego bolwetši bja Saúl ka lekga la pele, puku ya Batamela Kgaufsi le Jehofa e ile ya lokollwa kopanong ya selete kua Barcelona. Puku yeo e bohlokwa kudu e ile ya ba bjalo ka tshetledi yeo e dirago gore re eme re tiile ge re lebeletšane le bokamoso bja rena bjo sa kgonthišegago le bjo bo nolago moko. Diiring tšeo re di feditšego re le sepetlele, re be re bala dikarolo tša yona gotee. Gantši re ile ra gopola dikagare tša yona dinakong tše dintši tše thata tšeo re ilego ra lebeletšana le tšona ka morago. Ke ka nako yeo moo lengwalo la Jesaya 41:13 leo le tsopotšwego ketapeleng ya puku yeo le thomilego go ba le mohola o kgethegilego go rena. Le re: “Nna Morêna ké Modimo w’axo; ke Xo swere ka seatla sa-ka sa le letona, me ke bolêla naxô ke re: Se boifê, ké Nna ke Xo phološaxo!”

Tumelo ya Saúl e Kgoma Dipelo tša ba Bangwe

Kgolo le kholofelo tša Saúl di ile tša kgahla dingaka le baoki sepetleleng sa Vall d’Hebrón. O ile a ratwa ke sehlopha ka moka sa bao ba bego ba mo hlokometše. Ngaka e phagamego e šomago ka malwetši a madi yeo e bego e hlokomela balwetši ba kankere, e ile ya alafa bana ba bangwe ba Dihlatse bao ba nago le kankere ya madi go tloga ka nako yeo gomme e ba swara ka tlhompho le seriti. E gopola phetho ya Saúl ya go swarelela tumelong ya gagwe, sebete sa gagwe ge a be a lebeletšane le lehu le pono ya gagwe e kgahlišago ka bophelo. Sehlopha sa baoki se ile sa botša  Saúl gore e be e le molwetši yo kgahlišago kudu yo ba kilego ba mo hlokomela ka phapošing yeo. Se boletše gore ga se a ka a belaela goba go kgaotša go sega dilo tše segišago gaešita le ge a be a le kgaufsi le go hwa.

Ngaka ya tša monagano e mpoditše gore bana ba bantši bao ba ilego ba lebeletšana le bolwetši bjo bjalo bjo bo bolayago nywageng ya tlasana ba rabela kgahlanong le dingaka le batswadi ka lebaka la go se iketle le go gakanega. E lemogile gore se ga se sa ka sa diregalela Saúl. E ile ya makatšwa ke go bona Saúl a theošitše maswafo e bile a e-na le pono e botse ka bophelo. Seo se ile sa nea nna le Saúl sebaka sa go boledišana le yona ka tumelo ya rena.

Ke gopola gape le kamoo Saúl a ilego a thuša Hlatse e nngwe ka phuthegong ya gabo rena ka tsela e sa lebanyago. E be e gateletšegile ka nywaga e ka bago e tshela gomme dihlare di be di sa ka tša thuša go kaonafatša boemo bja yona. E feditše mašego a mantši e hlokometše Saúl sepetlele. E ile ya mpotša gore boemo bja Saúl bja kgopolo ge a be a lebeletšane le bolwetši bja kankere ya madi bo ile bja mo kgahla kudu. E ile ya lemoga gore go sa šetšwe gore Saúl o lapile kudu, o be a leka go kgothatša ka moka bao ba bego ba e-tla go mmona. Hlatse yeo e itše: “Mohlala wa Saúl o nneile sebete sa go lwantšha kgateletšego ya-ka.”

Nywaga e meraro e fetile ga e sa le Saúl a e-hwa. Ke therešo gore bohloko bo sa dutše bo le gona. Ga ke a tia, eupša Jehofa o nneile “matla a fetago a tlwaelegilego.” (2 Bakorinthe 4:7) Ke ithutile gore gaešita le phihlelo e boima le e bohloko e ka ba le ditla-morago tše botse. Go ithuta go lebeletšana le lehu la monna wa-ka, tate le morwa wa-ka go nthušitše gore ke se be le boithati le go ba yo a kwešišago batho ba bangwe. Godimo ga tšohle, go ntirile gore ke batamele kgaufsi le Jehofa. Nka kgona go lebeletšana le bokamoso ka ntle le poifo ka gobane Tate wa-ka wa legodimong o sa dutše a nthuša. O sa dutše a ntshwara ka seatla sa gagwe.

[Mongwalo wa tlase]

[Box/​Picture on page 31]

NA O ILE WA IPOTŠIŠA?

O ka ba o ile wa kwa gore Dihlatse tša Jehofa ga di amogele tšhelo ya madi. Na o ile wa ipotšiša gore ke ka baka la’ng?

Gantši kgetho ye yeo e theilwego Mangwalong ga e kwešišwe. Ka dinako tše dingwe batho ba phetha ka gore Dihlatse tša Jehofa di gana mekgwa ka moka ya kalafo goba ga di tšee bophelo e le bja bohlokwa. Seo ga se therešo. Dihlatse tša Jehofa di nyaka kalafo e kaone-kaone bakeng sa tšona le ditho tša malapa a tšona. Lega go le bjalo, di nyaka kalafo yeo e sa dirišego tšhelo ya madi. Ka baka la’ng?

Boemo bja tšona bo theilwe molaong wa motheo wo Modimo a o neilego batho. Nakwana ka morago ga Meetse-fula a mehleng ya Noa, Modimo o ile a nea Noa le lapa la gagwe tokelo ya go ja nama ya diphoofolo. Modimo o ile a ba nea thibelo e tee feela: Ba be ba sa swanela go ja madi. (Genesi 9:3, 4) Batho ba merafo ka moka ba tšwa go Noa, ka gona molao wo o šoma go batho ka moka. Ga se wa ka wa fedišwa. Ka morago ga nywaga-kgolo e seswai, Modimo o ile a tiiša molao woo setšhabeng sa Baisiraele ka go hlalosa gore madi ke a makgethwa gomme a emela bophelo ka bobjona. (Lefitiko 17:14) Nywageng e 1 500 e fetilego, baapostola ba Bakriste ba laetše Bakriste ka moka gore ba “dule [ba] ila . . . madi.”—Ditiro 15:29.

Go Dihlatse tša Jehofa, ga go kgonege gore o ile madi mola o a amogela ka tšhelo ya madi. Ka gona di phegelela gore di newe kalafo yeo e sa dirišego tšhelo ya madi. Gantši boemo bjo, bjo bo theilwego Mangwalong bo feleletša ka gore di newe kalafo ya maemo a godimo kudu. Ka ntle le pelaelo, le ke lebaka leo ka lona batho ba bantši bao e sego Dihlatse tša Jehofa ba kgopelago kalafo yeo e sa dirišego tšhelo ya madi.

[Seswantšho go letlakala 29]

Ke e-na le monna wa-ka Felipe le morwa wa rena Saúl

[Seswantšho go letlakala 29]

Batswadi ba-ka, José le Soledad

[Seswantšho go letlakala 30]

Saúl, kgwedi pele ga lehu la gagwe