Kamoo o ka bago Tate yo Botse

“Lena bo-tate, le se ke la befediša bana ba lena, e le gore ba se nyame.”​—Bakolose 3:21.

KE BJANG tate a ka efogago go befediša bana ba gagwe? Go bohlokwa gore a lemoge kamoo karolo ya gagwe bjalo ka tate e lego bohlokwa ka gona. Puku ye nngwe ya bophelo bjo bobotse bja monagano e re: “Go ba tate go ka ba le ditla-morago tše dikgolo ka tsela e raraganego le ya moswana-noši kgolong ya ngwana ya maikwelo le monagano.”

Karolo ya tate ke efe? Malapeng a mantši tate o lebelelwa e le yo a kgalemelago bana. Ke mo go tlwaelegilego gore o kwe mma a botša ngwana yo a sa kwego gore, ‘Tatago o e-tla, o tlo mo tseba gabotse.’ Ge e le gabotse, batswadi ba swanetše go nea bana tayo e leka-lekanego gomme ba e phethe ka go tia e le gore bana ba bona e be batho ba bagolo bao ba nago le teka-tekano. Lega go le bjalo, go na le mo gontši mo go nyakegago gore o be tate yo botse.

Ka manyami, ga se bo-tate ka moka bao ba bilego le mohlala o mobotse bakeng sa go ba thuša. Banna ba bangwe ba godišitšwe ba se na tate ka lapeng. Eupša maemong a mangwe, banna bao ba godišitšwego ke tate yo hlogo-thata le yo bogale le bona ba godiša bana ba bona ka tsela e swanago. Tate yo bjalo a ka efoga bjang go latela kgodišo e bjalo gomme a kaonafatša bokgoni bja gagwe bja go ba tate?

Go na le mothopo wa keletšo e šomago le yeo e ka botwago ya kamoo o ka bago tate yo botse. Beibele e-na le keletšo e botse ya mabapi le bophelo bja lapa. Keletšo ya yona ga se taba ya boikgopolelo e bile ga se ya rerelwa go re gobatša. Keletšo ya Beibele e bontšha bohlale bja Mongwadi wa yona, Jehofa Modimo, e lego mothomi wa bophelo bja lapa. (Baefeso 3:14, 15) Ge e ba o le tate, o tla be o dira gabotse go naganišiša ka seo Beibele e se bolelago ka go ba motswadi. *

Go ba tate yo botse ga go bohlokwa feela bakeng sa gore bana ba gago ba phele gabotse mmeleng le maikwelong, eupša go bohlokwa gape bakeng sa gore ba gole tswalanong ya bona le Modimo. Ngwana yo a nago le tswalano ya kgaufsi le e lerato le tatagwe a ka hwetša go le bonolo go ba le tswalano ya kgaufsi kudu le Modimo. Go oketša moo, Beibele e bontšha gore ka tsela e itšego Jehofa, Mmopi wa rena, ke tatago rena. (Jesaya 64:8) Ga bjale a nke re ahla-ahleng dilo tše tshela tšeo bana ba di nyakago go bo-tatago bona. Karolong e nngwe le e nngwe re tla bona kamoo go diriša melao ya motheo ya Beibele go ka thušago tate go kgotsofatša dinyakwa tšeo.

 1 Bana ba Nyaka Gore Tatago Bona a ba Rate

Jehofa ke mohlala o mobotse bakeng sa bo-tate. Ge e hlalosa kamoo Modimo a ikwago ka gona ka Jesu, morwa wa gagwe wa leitšibulo, Beibele e re: “Tate o rata Morwa.” (Johane 3:35; Bakolose 1:15) Jehofa o ile a bontšha Morwa wa gagwe lerato le gore o a mo amogela ka makga a fetago le tee. Ge Jesu a be a kolobetšwa, Jehofa o ile a bolela go tšwa legodimong gore: “O Morwa wa-ka, morategi; ke go amogetše.” (Luka 3:22) Jesu ga se a ka a belaela gore Tatagwe o a mo rata. Ke’ng seo tate yo e lego motho a ka ithutago sona mohlaleng wa Modimo?

Le ka mohla o se ke wa tšwafa go botša bana ba gago gore o a ba rata. Kelvin, e lego tatago bana ba bahlano o re: “Ka mehla ke be ke leka go bontšha bana ba-ka lerato, e sego feela ka go ba botša gore ke a ba rata, eupša gape le ka go ba bontšha gore ke kgahlegela yo mongwe le yo mongwe wa bona. Ke be ke thuša ka go ba apeša mengato le go ba hlapiša.” Go oketša moo, bana ba gago ba swanetše go tseba gore o a ba amogela. Ka gona, o se ke wa ba swaya diphošo kgafetša-kgafetša, ka mehla o ba kgalemela. Go e na le moo, e-ba le seatla se se bulegilego le go ba reta. Donizete yo a nago le banenyana ba lego mahlalagading o eletša ka gore: “Tate o swanetše go dira maiteko a go nyaka dibaka tša go reta bana ba gagwe.” Go tseba gore o a ba amogela go ka thuša bana ba gago go ba le boikholofelo. Seo ka bo sona se ka ba thuša go batamela kgaufsi le Modimo.

2 Bana ba Nyaka Mohlala o Mobotse

Johane 5:19 e re Jesu o kgona go dira “feela seo a bonago Tate a se dira.” Hlokomela gore lengwalo le re Jesu o ile a bona le go dira seo Tata’gwe a bego a se “dira.” Gantši le bana ba dira se swanago. Ka mohlala, ge e ba tate a swara mosadi wa gagwe ka tlhompho le seriti, le bana ba gagwe ba ka swara basadi ka tlhompho le seriti ge ba godile. Ga se feela gore boemo bja bašemane bja kgopolo bo kgongwa ke mohlala wa tatago bona, eupša le pono ya banenyana ka banna e ka tutuetšwa ke mohlala wa tatago bona.

Na bana ba gago ba hwetša go le thata go kgopela tshwarelo? Mo le gona ke gabohlokwa gore o bee mohlala. Kelvin o gopola nakong ya ge bašemane ba gagwe ba babedi ba thuba khamera yeo e bitšago kudu. O ile a galefa kudu moo a ilego a phatloganya tafola ya lepolanka gomme ya tšwa diripa tše pedi. Ka morago Kelvin o ile a ikwa a nyamile gomme a kgopela tshwarelo go bohle go akaretša le mosadi wa gagwe bakeng sa go galefa ka tsela yeo. O nagana gore go kgopela ga gagwe tshwarelo go bile le mafelelo a mabotse kudu baneng ba gagwe; ga ba na bothata bja go kgopela tshwarelo.

3 Bana ba Nyaka Lapa le Thabilego

Jehofa ke “Modimo yo a thabilego.” (1 Timotheo 1:11) Ga go makatše ge Morwa wa gagwe, Jesu, a ile a thabišwa ke go ba le Tata’gwe. Diema  8:30 (NW) e re thuša go kwešiša tswalano magareng ga Jesu le Tatagwe ge e re: “Ke ge ke be ke le hleng ga gagwe ke le mošomi yo a nago le bokgoni, . . . ke dula ke thabile pele ga gagwe ka mehla.” Ruri e be e le tswalano e borutho magareng ga Tate le Morwa!

Bana ba gago ba nyaka lefelo la khutšo. Go ipha nako ya go bapala le bana ba gago go ka thuša go tšweletša boemo bjo bjalo. Go bapala gotee go thuša batswadi le bana go ba le tswalano ya kgaufsi. Felix o dumelelana le seo. O na le morwa yo a lego mahlalagading gomme o re: “Go ipha nako ya go itapološa le morwa wa-ka go bile bohlokwa kudu tswalanong ya rena. Re bapala dipapadi gotee, re ithabiša le bagwera le go etela mafelong a thabišago gotee. Se se tiišitše tswalano e borutho ka lapeng.”

4 Bana ba Swanetše go Rutwa ka Modimo

Jesu o rutilwe ke Tatagwe. Ka gona, Jesu o be a ka re: “Dilo tšeo ke di kwelego go yena [Tate] ke di botša lefase.” (Johane 8:26) Mahlong a Jehofa, tate o ikarabela ka go ruta bana ba gagwe ka boitshwaro le ka Modimo. Bjo bongwe bja boikarabelo bja lena bjalo ka bo-tate ke go bjala melao ya motheo dipelong tša bana ba lena. Tlwaetšo e bjalo e swanetše go thoma e sa le ka pela. (2 Timotheo 3:14, 15) Felix o ile a thoma go balela ngwana wa gagwe dikanegelo tšeo di kgahlišago tša Beibele e sa le yo monyenyane. Felix o be a diriša diswantšho tša mebalabala le ditaba tše kgahlišago go akaretša le tšeo di hwetšwago pukung ya Puku Ya-ka ya Ditaba Tša Beibele. * Ge ngwana wa gagwe a dutše a gola, Felix o ile a kgetha tše dingwe tša dikgatišo tše theilwego Beibeleng tšeo di bego di swanetše nywaga ya morwa wa gagwe.

Donizete o re: “E tloga e le tlhohlo go dira gore thuto ya legae ya Beibele e be e thabišago. Go bohlokwa gore batswadi ba bontšhe go tšeela godimo ditaba tša mabapi le Modimo ka ge bana ba kgona go lemoga ka pela ge batswadi ba sa dire seo ba ba laelago gore ba se dire. Setho se sengwe le se sengwe sa lapa se na le sebaka sa go kgetha taba yeo e tlago go ahla-ahlwa nakong e tlago.” Kelvin o be a dutše a bolela le bana ba gagwe ka Modimo gohle mo ba bego ba le gona le ge ba be ba dira selo le ge e le sefe. Seo se re gopotša mantšu a Moše ge a re: “Mantšu a ke Xo laetšaxo lehono a a dulê a le pelong ya xaxo. O a tiišetšê bana ba xaxo; O bolêlê ôna Ò dutše ngwakong wa xaxo, le xe O le tseleng, xe O y’o rôbala le xe Ò tsoxa.”—Doiteronomio 6:6, 7.

5 Bana ba Nyaka Tayo

Bana ba nyaka tayo e le gore ba ka gola gore e be batho ba godilego bao ba tšwelago pele gabotse bophelong le go ba le boikarabelo. Batswadi ba bangwe ba nagana gore go laya bana go akaretša go ba betha ka tsela e sehlogo, go akaretša le go ba tšhošetša ka bošoro goba dipolelo tšeo di ba nyamišago. Lega go le bjalo, Beibele ga e tswalanye tayo ya motswadi le bogale. Go fapana le seo, batswadi ba swanetše go laya ka lerato go swana le ge Jehofa Modimo a dira. (Baheberu 12:4-11) Beibele e re: “Bo-tate, le se ke la befediša bana ba lena, eupša tšwelang pele le ba godiša  ka tayo le tlhahlo ya monagano ya Jehofa.”—Baefeso 6:4.

Ka dinako tše dingwe go ka nyakega gore ba otlwe. Lega go le bjalo, ngwana o swanetše go kwešiša lebaka leo ka lona a swanetšego go bethwa. Le ka mohla tayo ya batswadi ga se ya swanela go tlogela ngwana a ikwa a sa ratwe. Beibele ga e dumele gore bana ba bethwe ka tsela e šoro moo ba ka gobatšwago. (Diema 16:32) Kelvin o bega gore, “Ge go be go nyakega gore ke phošolle bana ba-ka ge ba dirile molato o mogolo, ka mehla ke be ke leka go ba bontšha gore lebaka la gore ke ba phošolle ke gobane ke a ba rata.”

6 Bana ba Nyaka go Šireletšwa

Bana ba nyaka go šireletšwa ditutuetšong tše kotsi le bagwereng ba babe. Ka manyami, lefaseng le go na le “batho ba kgopo” bao ba ikemišeditšego go gobatša bana ba se nago molato. (2 Timotheo 3:1-5, 13) O ka šireletša bjang bana ba gago? Beibele e nea keletšo e bohlale ge e re: “Mohlale ó bôna dikotsi di s’e-tla, a khuta; ba mašilô ba a feta, ba y’o hlaka.” (Diema 22:3) E le gore o šireletše bana ba gago kotsing, o swanetše go lemoga dikotsi. Lemoga maemo ao a ka lebišago mathateng gomme o dire sohle seo o ka se kgonago go šireletša bana ba gago. Ka mohlala, ge e ba o dumelela bana ba gago go diriša Inthanete, kgonthišetša gore ba tseba kamoo ba ka e dirišago ka tšhireletšego. E ka ba mo go holago go bea khomphutha lefelong le bulegilego mo o ka kgonago go šetša go dirišwa ga yona.

Tate o swanetše go lokišeletša le go tlwaetša bana ba gagwe bakeng sa dikotsi tšeo ba ka lebeletšanago le tšona lefaseng le le gobogilego. Na bana ba gago ba tseba seo ba swanetšego go se dira ge motho a leka go ba goboša gaešita le ge o se gona? * Bana ba gago ba swanetše go tseba tirišo e swanetšego le e sa swanelago ya ditho tša bona tša pelego. Kelvin o re: “Ga se ka ka ka tlogelela batho ba bangwe go ruta bana ba-ka ka seo, gaešita le barutiši ba bona. Ke be ke ikwa e le boikarabelo bja-ka go ruta bana ba-ka ka thobalano le dikotsi tšeo di bakwago ke batho bao ba gobošago bana ka thobalano.” Bana ba gagwe ka moka ba fetile mahlalagading ka tšhireletšego gomme ga bjale ba thabile manyalong a bona.

Tsoma Thušo ya Modimo

Mpho e kgolo kudu yeo tate a ka e neago bana ba gagwe ke go ba thuša gore ba age tswalano ya kgaufsi le e tiilego le Modimo. Mohlala wa tate ke wa bohlokwa kudu. Donizete o re: “Bo-tate ba swanetše go bontšha kamoo ba tšeago tswalano ya bona le Modimo e le ya bohlokwa ka gona. Se se swanetše go bonala kudu ge ba lebane le mathata a motho ka noši goba dikgateletšo. Maemong a bjalo, tate o bontšha tekanyo yeo a holofelago Jehofa ka yona. Go rapela bjalo ka lapa go dutše go bušeletšwa mantšu ao a bontšhago go leboga Modimo ka baka la botho bja gagwe go tla ruta bana bohlokwa bja gore Modimo e be mogwera wa bona.”

Ka gona, senotlelo sa go ba tate yo botse ke sefe? Tsoma keletšo go motho yo a tsebago go godiša bana gabotse—Jehofa Modimo. Ge e ba o tlwaetša bana ba gago go ya ka keletšo e tšwago Lentšung la Modimo, gona o tla ba le mafelelo ao a bolelwago go Diema 22:6 ge e re: “Ké mo a tl’o xo tšofala à sa ka a e lahla.”

[Mengwalo ya tlase]

[Seswantšho go letlakala 19]

Tate o swanetše go beela bana ba gagwe mohlala o mobotse

[Seswantšho go letlakala 20]

Tate o swanetše go ruta bana ba gagwe dinyakwa tša Modimo

[Seswantšho go letlakala 21]

Bana ba nyaka tayo e lerato