Ke Mang yo a ka Tsebago Bokamoso?

‘Modimo ke Nna. Ke Nna ke kwaditšego tša mafelelo mola di sa thoma, di sešo tša direga.’—Jesaya 46:9, 10.

MEHLENG ye ya khuduego, banyakišiši ba tša dipolitiki, ba tša ditšhelete le ba tša leago ba ithuta histori le mekgwa ya lehono ka maiteko a go ba le ponelo-pele ya bokamoso. Ba bangwe, ka go fagahlela go tseba seo bokamoso bo ba swaretšego sona, ba tsoma dikarabo go balepi ba dinaledi goba ka go dirišana le batemona. Gantši batho ba bjalo ba nyamišwa ke mafelelo ao a bago gona. Na ruri go tloga go sa kgonege go tseba seo se tla diregago ka lefase le, malapa a rena le rena re le motho ka o tee ka o tee? Mafelelong, na ruri go na le motho yo a ka bago le ponelo-pele ya bokamoso?

Ge a bolela le moporofeta Jesaya mantšung a boletšwego ka mo godimo, Modimo Yo Matla-ohle, Jehofa, o hlalositše bokgoni bja go porofeta bokamoso. Ka Jesaya, Modimo o boletše e sa le pele ka go lokollwa ga Baisiraele ba bogologolo bokgobeng bja Babilona le go boela ga bona Jerusalema e le gore ba e age lefsa gotee le tempele ya yona. Boporofeta bjo e be e le bjo bo nepago gakaaka’ng? Mo e ka bago nywaga e 200 pele ga moo, Jesaya o ile a bolela ka mo go nepagetšego leina la yo e bego e tla ba mofenyi wa Babilona, e lego Korese. Go feta moo, Jesaya o boleletše ka mo go nepagetšego mokgwa woo Korese a tlago go o šomiša—wa go aroša Noka ya Eforate yeo e bego e šireleditše motse. O bile gape le ponelo-pele ya gore Korese o tla hwetša mejako e mebedi e megolo motseng woo e tlogetšwe e butšwe ka go se šetše, e lego seo se lebišitšego phenyong e bonolo ya Korese.—Jesaya 44:24–45:7.

Ge a bapetšwa le Modimo, motho ga a kgone go bona bokamoso. Kgoši e bohlale Solomone o ngwadile gore: “Se fadišê tša ka mosô; le tša lehono xa O di tsebe.” (Diema 27:1) Taba yeo e sa dutše e le therešo. Ga go na motho yo a ka bonago gaešita le bokamoso bja gagwe. Ke’ng seo se dirago gore Modimo e be yo a fapanego? O kwešiša sohle seo a se bopilego ka mo go feletšego, go akaretša dika le tshekamelo ya motho. Modimo o kgona go bonela pele ka mo go nepagetšego seo batho le ditšhaba ka moka ba tlago go se dira, ge e ba a nyaka go dira bjalo. Go feta moo, o na le bokgoni bjo bo sa lekanywego bja go laola mafelelo a ditiragalo. Ge a bolelela pele ka baporofeta ba gagwe gore selo se itšego se tla direga, o tla ba yo a ‘emelago taba ya mohlanka wa gagwe gomme a tšweletša tše batseta ba gagwe ba di boletšego.’ (Jesaya 44:26) Ke Jehofa Modimo feela yo a bolelago bjalo a rereša.

Jesaya o phetše nywaga e fetago e 700 pele ga Jesu, Mesia. Lega go le bjalo, o porofetile mabapi le go tla ga Mesia. Eupša baswaya-diphošo ba Beibele ba ile ba hlasela go ngwalwa ga puku ya Jesaya, kudu-kudu go tloga lekgolong la bo-18 la nywaga. Ba boletše gore boporofeta bja Jesaya bo be bo sa bolele dilo e sa le pele e le ka kgonthe, eupša bo ile bja ngwalwa ka morago ga ge dilo tšeo di diregile gomme mongwadi yoo ka morago a ngwadilego puku yeo o ile a fo ngwala dilo tšeo di bego di šetše di diregile. Na seo ke therešo? Ka 1947 kopi ya puku ya Jesaya e ile ya hwetšwa, go akaretša mangwalo a mangwe a bogologolo a go phuthwa, ka leweng leo le lego kgaufsi le Lewatle le le Hwilego. Diithuti di lemogile gore kopi ye e ile ya dirwa ka  morago ga nywaga e makgolo pele ga go belegwa ga Mesia, goba Kriste, yo a bego a boletšwe e sa le pele. Ee, Beibele e utollotše bokamoso!

Jesaya le bangwadi ba bangwe ba Beibele ba be ba ka se porofete ka bokamoso ba ithekgile ka bohlale bja bona. Go e na le moo, “ba boletše se se tšwago go Modimo ge ba be ba išwa ke moya o mokgethwa.” (2 Petro 1:21) Dihlogong tše di latelago, re tla lebiša tlhokomelo ditabeng tše dingwe tša mabapi le bophelo bja Jesu tšeo di porofetilwego ke Jesaya. Ke moka, re tla ela hloko ditiragalo tšeo Jesu le barutiwa ba gagwe ba porofetilego ka tšona mabapi le mehla ya rena le ya nakong e tlago.