Na o be o Tseba?

Ke ka baka la’ng Bajuda ba be ba thoma go gopola ga bona Sabatha mantšiboa?

Ge Jehofa a be a nea batho ba gagwe molao wa mabapi le Letšatši la Poelano o itše: “Ka lôna ’tšatši leo Le se kê la bá la swara modirô . . . E bê Sabatha ya lena ya xo khutša . . . E bê Sabatha xo tloxa ka mantšibua xo fihla ka mantšibua a la ka moswana.” (Lefitiko 23:28, 32) Taelo ye e be e bontšha gore letšatši le lengwe le le lengwe le be le thoma mantšibua, ka morago ga ge letšatši le sobetše gomme le fela letšatšing le le latelago ge letšatši le sobela. Ka go rialo, go Bajuda letšatši le be le thoma mantšiboa gomme le tšwela pele go fihla mantšiboeng a latelago.

Mokgwa wo wa go bala matšatši o be o latela tsela yeo e thomilwego ke Modimo ka boyena. Pego ya mabapi le letšatši la pele la tlholo la seswantšhetšo e re: “Ya ba mantšibua; ya ba mosô, ’tšatši la pele.” “Matšatši” a latelago le ona a balwa ka tsela e swanago, e lego go thoma “mantšibua.”—Genesi 1:5, 8, 13, 19, 23, 31.

Bajuda e be e se bona feela bao ba bego ba bala matšatši ka tsela ye. Baathene, ma-Namdia le ma-Phoenicia le bona ba be ba bala matšatši ka tsela ye. Ka lehlakoreng le lengwe, Bababilona ba be ba tšea meso e le mathomo a letšatši le lefsa mola Baegipita le Baroma ba be ba bala matšatši a bona go tloga bošego-gare go ya bošego-gareng bjo bo latelago bjalo ka ge e le tlwaelo lehono. Lega go le bjalo, Bajuda ba lehono ba sa dutše ba thoma go gopola ga bona Sabatha ka morago ga ge letšatši le sobetše.

“Leeto la letšatši la sabatha” e be e le eng?

Ka morago ga go bona Jesu a rotogela legodimong go tšwa Thabeng ya Mehlware, barutiwa ba gagwe ba ile ba boela Jerusalema, yeo e bego e le bokgole bja “leeto la letšatši la sabatha.” (Ditiro 1:12) Mosepedi o be a ka sepela leeto la dikhilomithara tše 30 goba go feta moo ka letšatši. Lega go le bjalo, Thaba ya Mehlware e kgaufsi le Jerusalema. Ka gona, “leeto la letšatši la sabatha” le bolela’ng?

Sabatha e be e le letšatši leo ka lona Baisiraele ba bego ba swanetše go khutša medirong ya bona e tlwaelegilego. Ba be ba sa swanela le go ka gotša mollo ka magaeng a bona letšatšing leo. (Ekisodo 20:10; 35:2, 3) Jehofa o ile a laela gore: “Byale motho a a dulê xa xaxwe xê; xo se kê xwa ba le e a tšwaxo ka ’tšatši la xo šupa.” (Ekisodo 16:29) Molao wo o be o tla nea Baisiraele sebaka sa go khutša medirong ya bona e tlwaelegilego le go lebiša tlhokomelo e oketšegilego dilong tšeo di sepedišanago le borapedi bja bona go Modimo.

Ka baka la go se kgotsofalele melao ya motheo yeo e lego ka Molaong wa Jehofa, bo-rabi bao ba ratago melao ba ile ba thea melao e lebanyago—yeo mo gongwe e bego e sa thewa melaong ya motheo—ya gore motho o be a swanetše go sepela monabo o mokaakaang ka Sabatha, ka mohlala bakeng sa go ya lefelong la borapedi. Mo tabeng ye, Cyclopedia of Biblical, Theological, and Ecclesiastical Literature e re: “Ka baka la melao e lebanyago ya Sabatha . . . , go ile gwa laelwa gore ga go Moisiraele yo a swanetšego go sepela go feta monabo o itšego ka Sabatha, e lego monabo o bitšwago “leeto la letšatši la Sabatha.” Go ile gwa bewa monabo wa dikubiti tše 2 000, e lego monabo wa dikhilomithara tša magareng ga tše 0,8 le tše 1,1.

[Seswantšho go letlakala 11]

Jerusalema ge e bonwa go tšwa Thabeng ya Mehlware