Ekišang Tumelo ya Bona

O Ile a “Akanya ka Tšona Pelong ya Gagwe”

MARIA o ile a šutha gaboima godimo ga pokolo. O be a e nametše ka nako e telele. Ka pele, Josefa o be a sepela ka go nanya a eteletše pele tseleng yeo e lebilego Betlelehema yeo e lego kgole. Maria o ile buša a kwa leseana le itšhikinya ka mpeng ya gagwe.

E be e šetše e le nako Maria a imile; mo nakong ye Beibele e mo hlalosa ka polelwana e gatelelago e rego “a goletšwe.” (Luka 2:5) Ge banyalani ba ba dutše ba feta mašemong, mohlomongwe balemi ba bangwe ba ile ba ba lebelela ge ba dutše ba lema goba ba bjala gomme ba ipotšiša leo ka lona mosadi yo a lego boemong bjoo a ka tšeago leeto le letelele. Ke’ng seo se dirilego gore Maria a tle Betlelehema kgole gakaaka le motse wa gabo wa Natsaretha?

Se ka moka se thomile dikgwedi pele ga gore kgarebe ye ya Mojuda e hwetše kabelo ya moswananoši historing ya batho. O be a swanetše go belega ngwana yo e bego e tla ba Mesia, Morwa wa Modimo! (Luka 1:35) Ge nako ya go belega e be e batamela, go ile gwa nyakega gore ba tšee leeto. Leetong leo Maria o ile a lebeletšana le diteko tšeo di lekago tumelo ya gagwe. Anke re bone gore ke eng seo se mo thušitšego gore a dule a tiile tumelong.

Leeto la go ya Betlelehema

Josefa le Maria e be e se bona feela bao ba tšerego leeto. Kesara Augustose o be a sa tšwa go laela gore batho ba ngwadišwe nageng gomme batho ba ile ba swanelwa ke go tšea maeto a go ya metseng yeo ba belegetšwego go yona e le gore ba ngwadišwe. Josefa o ile a arabela bjang? Pego e balega ka gore: “Josefa le yena a rotoga a e-tšwa Galilea, motseng wa Natsaretha, a ya Judea motseng wa Dafida o bitšwago Betlelehema ka ge e be e le setho sa ntlo le lapa la Dafida.”—Luka 2:1-4.

Ga go makatše gore Kesara o ntšhitše taelo ya gagwe ka nako ye. Boporofeta bjo bo ngwadilwego nywaga-kgolong e šupa pele ga moo bo be bo boletše e sa le pele gore Mesia o be a tla belegelwa Betlelehema. Bjale, ka nako yeo go be go e-na le motse o bitšwago Betlelehema wo o bego o le kgole le Natsaretha ka dikhilomithara tše 11 feela. Lega go le bjalo, boporofeta bo be bo boletše ka go lebanya gore “Betlehêma Efurata” ke yona yeo e bego e tla tšweletša Mesia. (Mika 5:1) Go ya ka ditsela tša lehono, Natsaretha e arogantšwe le motsana wo o lego ka leboa ka ditsela tša botelele bja dikhilomithara tše 150 tše nago le meboto. Ye ke yona Betlelehema yeo Josefa a bego a bileditšwe go yona, ka gobane lapa la Kgoši Dafida le be le belegetšwe gona—lapa leo Josefa le Maria ba bego ba e-tšwa go lona.

Na Maria o be a tla thekga Josefa phethong ya gagwe ya gore a ye Betlelehema? Ge e le gabotse, leeto leo le be le tlo mo thatafalela. Go ka direga gore e be e le mathomong a lehlabula, ka gona go be go e na le kgonagalo ya gore dipula tša mesara-sarane di ka na ka ge ganyenyane-ganyenyane sehla sa marega se be se fela. Ka godimo ga moo, polelwana e rego “a rotoga a e-tšwa Galilea” ke e swanetšego, ka gobane Betlelehema e be e phagame ka dimithara tše 760—mmoto o motelele woo e bego e le mafelelo a thata a leeto leo le tšerego matšatši a mmalwa. Mohlomongwe leeto leo le be le ka tšea nako e telele go feta ka mo go tlwaelegilego ka gobane boemo bja Maria bo be bo ka nyaka gore ba khutše gantši. Ga bjale, nakong ye  ya boimana bja gagwe, mosadi a ka hlologela go ba kgaufsi le gae moo ba lapa le bagwera ba tla bego ba le komana-madula-a-bapile go mo thuša ge lešoko le thoma. Ka ntle le pelaelo, go be go nyakega gore a be le sebete e le gore a tšee leeto le.

Lega go le bjalo, Luka o ngwala gore Josefa o ile a ya e le gore “a ngwadišwe le Maria.” Le gona, o ngwala gape gore Maria ‘o be a nyetšwe ke Josefa go etša ge go be go holofeditšwe.’ (Luka 2:4, 5) Go ba mosadi wa Josefa go ile gwa tutuetša diphetho tša Maria kudu. O be a lebelela monna wa gagwe e le hlogo ya gagwe ditabeng tša borapedi, a amogela karolo ya gagwe yeo a e neilwego ke Modimo ya go ba mothuši wa gagwe ka go thekga diphetho tša Josefa. * Ka gona, o ile a fenya selo se seo e bego e tla ba tlhohlo tumelong ya gagwe ka go fo ikokobetša.

Ke’ng se sengwe seo se ka bago se tutueditše Maria gore a ikokobeletše Josefa? Na o be a tseba boporofeta bja mabapi le Betlelehema e le motse woo Mesia a bego a tla belegwa go ona? Beibele ga e bolele. Re ka se ke ra re o be a sa bo tsebe ka gobane go bonala baetapele ba bodumedi le batho ka kakaretšo ba be ba bo tseba. (Mateo 2:1-7; Johane 7:40-42) Ge go tliwa Mangwalong, Maria e be e se motho yo a se nago tsebo. (Luka 1:46-55) Go sa šetšwe gore Maria o ile a phetha ka gore a tšee leeto e le gore a kwe monna wa gagwe, taelo ya mmušo goba boporofeta bja Jehofa—goba ka baka la mabaka a ka moka—o beile mohlala o mobotse. Jehofa o tšeela godimo kudu moya wa boikokobetšo go banna le basadi. Mehleng ya rena moo gantši boikokobetšo bo bonalago bo le gare ga dika tše hlokomologilwego kudu, mohlala wa Maria ke tutuetšo e botse go batho ba botegago kae le kae.

Go Tswalwa ga Kriste

Maria o swanetše go ba a ile a imologa ge a thoma go bona Betlelehema. Ge ba dutše ba namela meboto gomme ba feta dihlare tša mehlware—yeo e bego e le gare ga dibjalo tša mafelelo tšeo di bunwago—Maria le Josefa ba ka ba ba ile ba nagana ka histori ya motsana wo. E be e le o monyenyane kudu gore o ka balwa gare ga metse ya Juda, go etša ge moporofeta Mika a be a boletše; lega go le bjalo, e be e le moo Boase, Naomi gomme ka morago Dafida ba belegetšwego gona nywageng e dikete e fetilego.

Maria le Josefa ba hweditše motse o tletše batho. Ba bangwe ba be ba tlile go tlo ngwadišwa pele ga bona, ka gona go be go se na moo ba ka robalago gona ka phapošing ya go robala. * Ba be ba se na kgetho ge e se go robala ka setaleng. Re ka akanya kamoo Josefa a ilego a tshwenyega ka gona ge a bona mosadi wa gagwe a e-kwa bohloko bjo a sa kago a bo kwa pele bjoo bo ilego bja gakala. Lešoko le ile la gakala ge a be a le lefelong le leo le sa swanelegego gore mosadi wa moimana a be go lona.

Lefaseng ka bophara basadi ba ka kwešiša bohloko bja Maria. Nywageng e ka bago 4 000 e fetilego Jehofa o be a boletše e sa le pele gore basadi ka moka ba be ba tla kwa bohloko ge ba belega ka baka la sebe sa leabela. (Genesi 3:16) Ga go na bohlatse bjo bo bontšhago gore Maria ga se a kwa bohloko. Pego ya Luka ga e hlalose bohloko bjo a bo kwelego ka go lebanya, e fo re: “A belega morwa wa gagwe wa leitšibulo.” (Luka 2:7) Ee, “leitšibolo” la gagwe le be le gorogile—ngwana wa  mathomo baneng ba Maria ba bantši, bonyenyane ka moka e be e le ba šupa. (Mareka 6:3) Lega go le bjalo, yo o be a tla fapana le bona. Morwa yo e be e se feela leitšibulo la Maria, eupša e be e le “leitšibulo la tlholo yohle” ya Jehofa, Morwa yo a tswetšwego a nnoši wa Modimo!—Bakolose 1:15.

Ke nakong ye mo pego e oketšago ka taba ye e tsebjago kudu: “A mo phuthela ka mašela a mo latša legopong.” (Luka 2:7) Ditiragatšo tša matswalo a Jesu, diswantšho tša bokgabo gotee le ditiragalo lefaseng ka bophara di tšweletša tiragalo ye e le e kwešago bohloko le ka tsela e sego ya kgonthe. Lega go le bjalo, naganišiša ka seo se diregilego e le ka kgonthe. Legopo ke sejelo sa diruiwa. Ka gona, lapa leo le be le robetše ka setaleng e lego lefelo leo—ka nako yeo le gona bjale—le tsebjago le se na moya o hlwekilego goba leo le sa hlwekago. Ruri ke batswadi bafe bao ba ka kgethago lefelo la mohuta woo bakeng sa go belegwa ga ngwana ge e-ba ba be ba e-na le kgetho e kaone? Batswadi ba bantši ba nyaka selo se kaone bakeng sa bana ba bona. Ka tsela e swanago, Maria le Josefa ba be ba tloga ba nyaka se sekaone-kaone bakeng sa Morwa wa Modimo!

Lega go le bjalo, ga se ba ka ba tlogelela go fokola ga maemo a bona go dira gore ba nyame; ba ile ba fo dira seo ba ka se kgonago go ya ka seo ba bego ba e-na le sona. Ka mohlala, ela hloko gore Maria o ile a hlokomela lesea leo, a le phuthela ka mašela gomme a le robatša ka kelohloko ka legopong a kgonthišetša gore le be le tla ruthela le go šireletšega. Maria le gatee o be a ke se dumelele go tshwenyega ka maemo a gagwe go mo šitiša go dira sohle seo a ka se kgonago go hlokomela lesea la gagwe. Le gona, Maria le Josefa ba be ba tseba gore go thekga ngwana yo borapeding bja gagwe go Modimo e be e tla selo sa bohlokwa kudu seo ba ka mo direlago sona. (Doiteronomio 6:6-8) Ka tsela e swanago, lehono batswadi ba bohlale ba hlagolela dika tše swanago ge ba dutše ba godiša bana ba bona lefaseng le leo le sa bonego bohlokwa bja go hlankela Modimo.

Ketelo Yeo e Kgothatšago

Tiragalo e sa letelwago e ile ya šitiša boemo bja khutšo. Badiši ba ile ba akgofela ka setaleng, ba fagahletše go bona lapa gomme ka mo go kgethegilego ba nyaka go bona ngwana. Banna ba ba be ba thabile kudu gomme difahlego tša bona di bonagatša lethabo. Ba be ba tlile ka go akgofa go tšwa dithabeng moo ba bego ba dula le mehlape ya bona. * Ba ile ba botša batswadi bao ba maketšego selo se kgahlišago seo se ba diragaletšego. Ge ba le kua dithabeng bošego, morongwa o ile a tšwelela go bona go sa letelwa. Letago la Jehofa le ile la phadima go ba dikologa gomme morongwa a ba botša gore Kriste goba Mesia o sa tšwa go belegwa kua Betlelehema. Ba be ba tla hwetša ngwana yoo a robetše legopong, a phuthetšwe ka mašela. Ke moka, go ile gwa bonala selo se makatšago le go feta—sehlopha sa diopedi tše matla tša barongwa se ile sa bonala se opela ka letago la Jehofa!

Ga go makatše ge banna ba ba ikokobeditšego ba ile ba akgofela Betlelehema! Ba swanetše go ba ba ile ba thabela go bona lesea le robetše moo go etša ge morongwa a be a hlalositše. Ga se ba ka ba uta ditaba tše tše dibotse. “Ba tsebatša polelo yeo . . . Bohle ba ba kwelego ba ile ba kgotsa dilo tšeo ba di boditšwego ke badiši.” (Luka 2:17, 18) Go bonala baetapele ba bodumedi ba mehleng yeo ba be ba nyatša badiši. Eupša go molaleng gore Jehofa o be a ba tšeela godimo banna ba bao ba ikokobeditšego le ba botegago. Lega go le bjalo, ketelo yeo e ile ya kgoma Maria bjang?

Ka kgonthe Maria o be a lapišitšwe ke bohloko bja go belega, eupša o ile a theetša lentšu le lengwe le le lengwe ka kelohloko. Le gona o ile a dira seo se oketšegilego: “Maria a thoma go boloka dipolelo tše ka moka, a akanya ka tšona pelong ya gagwe.” (Luka 2:19) Kgarebe ye e be e le motho yo a naganišišago ka mo go tseneletšego e le ka kgonthe. O be a tseba gore molaetša wo wa morongwa o bohlokwa. Modimo wa gagwe, Jehofa, o be a nyaka gore a tsebe le go kwešiša gore morwa wa gagwe ke mang le kamoo a lego bohlokwa ka gona. Ga se a ka a fo theetša. O ile a boloka mantšu ao ka moka ka pelong ya gagwe e le gore a ka naganišiša ka ona kgafetša-kgafetša dikgweding le nywageng e tlago. Ye ke tsela e kgahlišago yeo e thušitšego Maria go ba le tumelo  yeo a e bontšhitšego bophelong bja gagwe ka moka.

Na o tla latela mohlala wa Maria? Jehofa o ngwadile ditherešo tša bohlokwa ka Lentšung la gagwe. Lega go le bjalo, ditherešo tšeo di ka se re hole ge e ba re sa di ele hloko. Re dira bjalo ka go bala Beibele ka mehla—e sego go e bala feela bjalo ka dipuku tše dingwe, eupša re e bala bjalo ka Lentšu la Modimo le buduletšwego. (2 Timotheo 3:16) Ke moka, go swana le Maria, re swanetše go boloka ditherešo tšeo ka dipelong tša rena e le gore re di kwešiše ka mo go tseneletšego. Ge e ba re naganišiša ka seo re se balago ka Beibeleng gomme re tsoma ditsela tšeo ka tšona re ka dirišago keletšo ya Jehofa ka mo go feletšego, re tla nea tumelo ya rena phepo yeo e nyakegago e le gore e gole.

Dipolelo tše Oketšegilego Tšeo a Tlago go di Boloka

Letšatšing la bo-seswai ka morago ga ge lesela le belegwe, Maria le Josefa ba ile ba le bolotša go ya ka dinyakwa tša Molao wa Moše gomme ba le rea leina la Jesu go etša ge ba be ba laetšwe. (Luka 1:31) Ke moka, letšatšing la bo-40 ba ile ba iša lesea tempeleng Betlelehema kua Jerusalema, yeo e bego e le bokgole bja dikhilomithara tše mmalwa, gomme ba tliša neo ya tlhwekišo yeo Molao o bego o dumelela badiidi gore ba e tliše—maebakgorwana a mabedi goba mekurwana e mebedi. Ge e ba ba be ba lešwa dihlong ke go ntšha neo e nyenyane go feta kgapa le mokurwanyana tšeo batswadi ba bangwe ba bego ba di neela, ba ile ba phaela maikwelo a bjalo ka thoko. Go sa šetšwe gore ba be ba ikwa bjang, ba ile ba newa kgothatšo e matla ge ba be ba sa le moo.—Luka 2:21-24.

Mokgalabje yo a bitšwago Simeone o ile a ba batamela gomme a botša Maria mantšu a oketšegilego e le gore a a boloke ka pelong ya gagwe. O be a holofeditšwe gore o tla bona Mesia pele a e-hwa gomme moya wa Jehofa o ile wa mmontšha gore Jesu yoo yo monyenyane e be e le Mophološi yo a holofeditšwego. Le gona, Simeone o ile a lemoša Maria ka bohloko bjoo a bego a tla bo kwa ka letšatši le lengwe. O ile a mmotša gore o tla ikwa eka o hlabilwe ka tšhoša e telele. (Luka 2:25-35) Gaešita le mantšu a a boifišago a swanetše go ba a ile a thuša Maria go kgotlelela ge nako yeo e thata e fihla nywageng e masome a mararo ka morago. Ka morago ga ge Simeone a feditše, moporofeta wa mosadi e lego Anna o ile a tla go bona Jesu yo monyenyane gomme a thoma go bolela ka yena go bohle bao ba bego ba holofetše tlhakodišo ya Jerusalema.—Luka 2:36-38.

Ruri Josefa le Maria ba be ba dirile phetho e botse ka go tliša ngwana wa bona tempeleng ya Jehofa kua Jerusalema! Ditiragalo tše e bile mathomo a tsela ya bophelo ka moka ya morwa wa bona ya go ya ntlong ya Jehofa ka mehla. Ge ba be ba le moo, ba ile ba ikgafa go ya ka bokgoni bja bona gomme ba newa ditaelo le kgothatšo. Letšatšing leo ruri Maria o tlogile tempeleng a matlafetše tumelong gomme pelo ya gagwe e tletše ditherešo tša bohlokwa tšeo a ka naganišišago ka tšona le go di botša ba bangwe.

Ke mo gobotse lehono go bona batswadi ba latela mohlala woo. Batswadi ba Dihlatse tša Jehofa ba tliša bana ba bona ka potego dibokeng tša Bokriste. Batswadi ba bjalo ba dira sohle seo ba ka se kgonago gomme ba kgothatša badumedi-gotee le bona. Le gona, ba tloga ba matlafetše kudu, ba thabile gomme ba e-na le dilo tše dintši tše dibotse tšeo ba ka di botšago ba bangwe. O laletšwa ka borutho gore o kopanele le bona. Ge e ba o dira bjalo, o tla hwetša gore tumelo ya gago, go etša ya Maria, e matlafala kudu.

[Mengwalo ya tlase]

[Seswantšho go letlakala 25]

Simeone o ile a šegofatšwa ka go bona Mophološi yo a holofeditšwego