Ge e le Gabotse go Direga’ng ge Motho a E-hwa?

“Meoya ka moka ga e hwe, go akaretša le ya ba kgopo . . . Ka ge ba otlwa ka tefetšo e sa kgaotšego ya mollo o sa timego gomme ba sa hwe, ga go kgonege gore tlaišego ya bona [e fele].”—Clement wa Alexandria, mongwadi wa lekgolong la bobedi le la boraro la nywaga C.E.

GO SWANA le Clement, bao ba rutago gore dihele ke lefelo la tlhokofatšo ba nagana gore moya wa motho ga o hwe. Na Beibele e thekga thuto ye? Ela hloko seo Lentšu la Modimo le se bolelago ge le araba dipotšišo tše latelago.

Na motho wa pele, Adama, o be a e-na le moya o sa hwego? Beibele e re: “Morêna Modimo a na a bopa motho, lerole la mmu; mo dinkong tša xaxwe a budulêla môya wa bophelô, motho a napa a ba môya o phelaxo.” (Genesi 2:7) Ela hloko gore temana ye ga e re Adama o ile a newa moya (soul).

Go diragetše’ng ka Adama mafelelong ka morago ga ge a dirile sebe? Kotlo yeo Modimo a laetšego gore a e newe e be e se tlhokofatšo ya ka mo go sa felego diheleng. Go e na le moo, Beibele e re: “Boxôbê O tlo bo ja ka dikudumêla tša sefahloxô sa xaxo; wa bá wa boêla mmung; ka xobane O nthšitšwe mmung; O lerole; ’me sa xaxo ké xo boêla leroleng.” (Genesi 3:19, Mongwalo o sekamego ke wa rena.) Kahlolo ya Modimo ga e fetiše kgopolo ya gore karolo le ge e le e fe ya Adama e ile ya phologa ge a e-hwa. Ge Adama a e-hwa, moya (soul) e lego Adama o ile wa hwa.

Na motho le ge e le ofe o na le moya o sa hwego? Modimo o ile a botša moporofeta Hesekiele gore: “Moya o senyago ona o tlo hwa.” (Hesekiele 18:4, PK) Moapostola Paulo o  ngwadile gore: “Ka xe sebe sè tsene lefaseng ka motho o tee, ’me lehu la tsêna ka sebe, lehu le aparetše batho bohle ka xe ba dirile dibe bohle.” (Baroma 5:12, Beibele ya Sepedi) Ge e ba batho ka moka ba dira dibe, gona phetho e nago le tlhaologanyo ke ya gore meoya ka moka e a hwa.

Na motho yo a hwilego o tseba goba go kwa selo le ge e le sefe? Lentšu la Modimo le re: “Ba ba phelaxo ba tseba xore ba tlo hwa; ’me xo bahu xa xo se se tsebyaxo.” (Mmoledi 9:5) Ge e hlalosa seo se diregago ge motho a e-hwa, Beibele e re: “Ó boêla mmung wa xaxwe; mohla woo ké mo xo fêlaxo maanô a motho.” (Psalme 146:4) Ge e ba go bahu “xa xo se se tsebyaxo” gomme maano a bona a a ‘fela,’ gona ke bjang ba ka kwago bohloko diheleng?