Taletšo Yeo e Dirilwego ka Morero

“GO DIRWA’NG mo?” Batho ba bantši bao ba fetago ka dikoloi kgaufsi le meago ya lekala la Dihlatse tša Jehofa yeo e lego Mogale City (Krugersdorp) kgaufsi le Johannesburg, Afrika Borwa ba ipotšiša potšišo ye. Ka gona, Dihlatse di ile tša dira phetho ya go laletša batho go tla meagong ya lekala ka October 12 le 13, 2007. Morero wa taletšo ye o be o le gabedi—go fediša mabare-bare a maaka le go bontšha batho ka kakaretšo seo ofisi ya lekala e se dirago go thekga mošomo woo Jesu Kriste a laetšego gore o dirwe.—Mateo 28:19, 20.

Bao ba hlankelago ofising ya lekala ba ile ba ngwala maswao a magolo ao a amogelago batho dikgorong tša meago gomme ba nea baagišani ba bona ditaletšo tše kgethegilego. Batho ba šomago dikhamphaning tšeo ofisi ya lekala e rekago dilo go tšona gotee le malapa a bona ba be ba laleditšwe. Ba ile ba arabela bjang? Baeng ba fetago 500 bao e sego Dihlatse ba ile ba tla go bona meago ya lekala.

Selo seo ba ilego ba thabela go se bona kudu ke motšhene wa go gatiša wa MAN Roland Lithoman woo o gatišago dimakasine tše ka bago 90 000 ka iri. Lefapha la tša thomelo ya dikgatišo leo le swaraganago le ditoni tše fetago 14 tša dikgatišo ka letšatši le lona le ile la kgahla baeng gotee le lefelo la go tlemaganya dipuku. Dihlatse tše šomago mafapheng a fapa-fapanego di ile tša rulaganya dipontšho tše kgahlišago, go akaretša yeo e bontšhago histori ya metšhene ya go gatiša, go tloga ka motšhene wa Gutenberg go fihla go yeo e šomišago thekinolotši ya mehleng yeno. Pontšho e nngwe e be e bontšha kamoo ofisi ya lekala e hlokomelago tikologo. Ka mohlala, karolo e kgethegilego e fediša dikgase tše kotsi le menkgo e tšwago metšheneng gomme e kgoboketša lerole le tšwago dipampiring e le gore le lahlwe.

Kuranta ya lefelong le e bile le sehlogo seo se bolelago gore baithapi ba 700 bao ba dulago ofising ya lekala “ke bahlanka ba kgethilwego bao ba ineetšego e le Dihlatse tša Jehofa.” Se boletše le ka “tekanyo e phagamego kudu ya bohlweki le kamoo dilo ka moka di sepetšwago ka nako” lefapheng la kgatišo. Monna yo a bego a ganetša modiro wa Dihlatse tša Jehofa o ile a tla go tlo bona meago ya lekala. Ka morago ga moo o ile a ngwala lengwalo leo le balegago ka gore: “Re a le lebogiša. Ga se gantši motho a ka bonago bothakga bja maemo a godimo ka tsela ye.”

Baeng ba bantši bao ba bego ba tlile ba lebogile go bontšhwa meago ya lekala gomme ba makatšwa ke go bona gore ofisi ya lekala e tletše ka dikgatišo tšeo di theilwego Beibeleng tša maleme a 151 le gore e gatiša dikgatišo bakeng sa dinaga tše 18 tša borwa le bogareng bja Afrika. Batho ba ka kgona go bona meago ya makala ya Dihlatse tša Jehofa go dikologa lefase nakong ya mošomo. Ke ka baka la’ng o sa botšiše nako yeo ka yona o ka kgonago go etela lekala ka go ikgokaganya le ofisi ya lekala yeo e lego lefelong la geno?

[Seswantšho go letlakala 14]

Baeng ba goroga meagong ya lekala

[Seswantšho go letlakala 14]

Taletšo

 [Diswantšho go letlakala 15]

Meago ya lekala ya Afrika Borwa yeo e lego Mogale City, Afrika Borwa

[Seswantšho go letlakala 15]

Motšhene wa go gatiša wa MAN Roland Lithoman

[Seswantšho go letlakala 15]

Lefapha la go tlemaganya dipuku

[Seswantšho go letlakala 15]

Lefapha la tša thomelo