Jesu​—Mohlala o Phethagetšego wo re ka o Latelago

NA O nyaka go ba motho yo mokaone le yo a thabilego kudu? Moapostola Petro o hlalosa kamoo re ka dirago bjalo. O ngwala gore: “Kriste o ile a tlaišega bakeng sa lena, a le tlogelela mohlala gore le latele dikgato tša gagwe kgaufsi.” (1 Petro 2:21) Ka kgonthe, ka ge Jesu Kriste a phetše bophelo bjo bo sa tlwaelegago, re ka ithuta mo gontši go yena. Ka go ithuta ka Jesu le go latela mohlala wa gagwe, re ka ba batho ba bakaone le ba thabilego e le ka kgonthe. Anke re hlahlobeng tše dingwe tša dika tšeo motho yo yo a phagamego a bego a e-na le tšona gomme re bone kamoo mohlala wa gagwe o ka re holago ka gona.

Jesu o be a e-na le teka-tekano. Gaešita le ge Jesu a itše “ga a na mo a ka latšago hlogo ya gagwe gona,” o be a sa phele bophelo bja go itima dilo goba go kgothaletša ba bangwe go phela bjalo. (Mateo 8:20) O be a e-ya menyanyeng. (Luka 5:29) Mohlolo wa gagwe wa pele o begilwego—wa go fetoša meetse go ba beine monyanyeng wa lenyalo—o bontšha gore o be a sa ikarole bathong. (Johane 2:1-11) Lega go le bjalo, Jesu o dirile gore go bonale gore selo sa bohlokwa kudu go yena ke sefe. O itše: “Dijo tša-ka ke gore ke dire thato ya yo a nthomilego.”—Johane 4:34.

□ Na o hlahlobišitše bophelo bja gago go bona kamoo o ka bago le teka-tekano ka gona go phegeleleng dilo tša boiphedišo le go hlagoleleng tswalano le Modimo?

Jesu o be a batamelega. Beibele e hlalosa Jesu e le monna yo a bego a e-na le bogwera. O be a sa selekege ge batho ba mmotša mathata a bona goba ba mmotšiša dipotšišo tše gakantšhago. Lebakeng le lengwe ge a be a dikaneditšwe ke lešaba, mosadi yo a bego a tlaišwa ke bolwetši ka nywaga e 12 o ile a kgoma seaparo sa gagwe ka kholofelo ya gore o tla fodišwa. Jesu ga se a ka a mo nyatša ka baka la seo go bonalago e be e le tiro e fošagetšego eupša ka botho o ile a re: “Morwedi wa-ka, tumelo ya gago e go fodišitše.” (Mareka 5: 25-34) Bana le bona ba be ba lokologa ge ba be ba e-na le yena, ba sa boife gore o tla ba hlokomologa. (Mareka 10:13-16) Tsela yeo a bego a swara barutiwa ba gagwe ka yona e be e bonagatšwa ke go boledišana ga gagwe le bona ka bolokologi le ka tsela e nago le bogwera. Ba be ba sa dika-dike go mmatamela.—Mareka 6:30-32.

□ Na batho ba bangwe ba ikwa ba lokologile go bolela le wena?

O be a e-na le kwelobohloko. Se sengwe sa dika tše dikgolo tša Jesu e be e le bokgoni bja gagwe ba go ipea maemong a batho ba bangwe, go ikwa kamoo ba ikwago ka gona le go ba thuša. Moapostola Johane o bega gore ge Jesu a bona Maria a lla ka baka la lehu la kgaetšedi’agwe e lego Latsaro, Jesu o ile “a tsetsela moyeng gomme a huduega” a ba “a ntšha megokgo.” Bao ba bego ba le gona ba ile ba kgona go bona gabotse kamoo Jesu a bego a rata lapa leo, e lego maikwelo ao a bego a se na dihlong tša go a bontšha phatlalatša. Ruri o ile a bontšha kwelobohloko e tseneletšego ge a be a tsoša mogwera wa gagwe!—Johane 11:33-44.

Lebakeng le lengwe, monna yo a bego a swerwe ke lephera—bolwetši bjo sehlogo bjo bo bego bo dira gore a dule a ikarotše bathong—o ile a lopa Jesu ka gore: “Morena, ge feela o rata, o ka ntlhwekiša.” Jesu o arabetše ka tsela e kgomago pelo e le ruri. Beibele e re: “Ge a otlolotše letsogo la gagwe, o ile a mo kgwatha, a re: ‘Ke a rata. Hlweka.’” (Mateo 8:2, 3) Jesu ga se a ka a fodiša batho feela bakeng sa go phethagatša boporofeta. O be a nyaka go ba phumola megokgo. Sohle seo a bego a se dira se be se hlahlwa ke e nngwe ya dipolelo tša gagwe tše sa lebalegego, e rego: “Ka mo le nyakago batho ba le dira ka gona, le lena le ba direng ka wona mokgwa woo.”—Luka 6:31.

□ Na mediro ya gago e bonagatša kwelobohloko ya gago go ba bangwe?

Jesu o be a e-na le kwešišo le temogo. Gaešita le ge a be a se a ka a dira sebe, le ka mohla Jesu ga se a ka letela gore ba bangwe ba dire dilo ka tsela e phethagetšego goba a ba phagamela; le gona ga se a ka a dira dilo ka tsela e bontšhago go hloka kwešišo. Lebakeng le lengwe, mosadi “yo a bego a tsebja motseng gore ke modiradibe” o ile a bontšha tumelo ya gagwe le tebogo ka go hlapiša dinao tša Jesu ka megokgo ya gagwe. Jesu o ile a mo dumelela go dira bjalo, e lego seo se ilego sa makatša motho yo a bego a laleditše Jesu dijong, yo a bego a ahlotše mosadi yoo ka tsela e sehlogo. Ka ge a be a kwešiša potego ya gagwe, Jesu ga se a ka a nyatša mosadi yoo ka baka la dibe tša gagwe. Go e na le moo, o itše: “Tumelo ya gago e go phološitše; sepela ka khutšo.” Go ka direga gore mosadi yoo o ile a tlogela tsela ya gagwe ya pele ya bophelo ka baka la karabelo ya Jesu e borutho.—Luka 7:37-50.

□ Na o tsebja ka go akgofela go reta ba bangwe le go diega go ba nyatša?

O be a sa bebe sefahlego gomme a e-na le tlhompho. Jesu o be a rata morutiwa wa gagwe Johane, mohlomongwe ka gobane ba be ba rata dilo tše swanago le ka gobane go ka direga gore ba be  ba tswalana.  * Lega go le bjalo, ga se a ka a mo rata go fetiša barutiwa ba bangwe. (Johane 13:23) Ge e le gabotse, ge Johane le ngwanabo e lego Jakobo ba be ba kgopela maemo a phagamego Mmušong wa Modimo, Jesu o ile a araba ka gore: “Go dula mo ka go la-ka le letona goba ka go le letshadi ga se nna yo nka go neago.”—Mareka 10:35-40.

Ka mehla Jesu o be a hlompha batho ba bangwe. O be a sa kgetholle batho go etša ge go be go dirwa mehleng ya gagwe. Ka mohlala, ka tlwaelo basadi ba be ba swarwa bjalo ka batho ba tlasana go banna. Lega go le bjalo, Jesu o be a hlompha basadi. Lekga la pele ge a be a ipolela gore ke Mesia e bile go mosadi yoo e bego e se Mojuda eupša e le Mosamaria, e lego setšhaba seo Bajuda ka kakaretšo ba bego ba se nyatša e bile ba sa se dumediše. (Johane 4:7-26) Le gona, Jesu o neile basadi sebaka sa go ba dihlatse tša pele tša tsogo ya gagwe.—Mateo 28:9, 10.

□ Na o dirišana le batho ba morafo o fapanego, bong, leleme goba setšhaba ka tsela e se nago kgethollo?

Jesu o ile a phetha boikarabelo bja gagwe bjalo ka morwa le leitšibulo. Go bonala tatago Jesu wa mogodiši e lego Josefa a hwile ge Jesu e be e sa le mofsa. Go ka direga gore Jesu o ile a hlokomela mmagwe, barwarragwe le dikgaetšedi tša gagwe ka go šoma bjalo ka mmetli. (Mareka 6:3) Metsotsong ya mafelelo ya bophelo bja gagwe, o ile a laela morutiwa wa gagwe Johane gore a hlokomele Maria.—Johane 19:26, 27.

□ Na o ka ekiša Jesu ka go phetha boikarabelo bja gago ka lapeng go etša ge a dirile?

Jesu e be e le mogwera wa kgonthe. Bjalo ka mogwera, Jesu o be a kgethegile. Bjang? Ga se a ka a lahla bagwera ba gagwe feela ka gobane ba dira diphošo, gaešita le ge ba be ba dira diphošo tšeo kgafetša-kgafetša. Ga se ka mehla barutiwa ba gagwe ba bego ba dira dilo ka tsela yeo a bego a e nyaka. Eupša o ipontšhitše e le mogwera wa bona ka go lebiša tlhokomelo dikeng tša bona tše dibotse go e na le go phetha ka gore ba be ba e-na le maikemišetšo a mabe. (Mareka 9:33-35; Luka 22:24-27) Gaešita le ge a be a sa ba gapeletše gore ba dumelelane le yena, o be a ba kgothaletša go ntšha maikwelo a bona ka bolokologi.—Mateo 16:13-15.

Sa bohlokwa le go feta, Jesu o be a rata bagwera ba gagwe. (Johane 13:1) Go fihla bokgoleng bofe? O itše: “Ga go yo a nago le lerato le le fetago le, gore motho a gafe moya wa gagwe ka baka la bagwera ba gagwe.” (Johane 15:13) Na go na le motho le ge e le ofe yo a ka neago bagwera ba gagwe selo se bohlokwa kudu go feta bophelo bja gagwe?

□ Na o dula o le mogwera gaešita le ge ba bangwe ba go selekiša goba ba go kgopiša?

O be a e-na le sebete le boikarabelo. Jesu o be a tloga a fapane le motho yo a fokolago le yo a se nago taba yo a tšweletšwago ke bathadi ba bangwe ba diswantšho. Jesu o ile a ntšha bagwebi le dithoto tša bona ka tempeleng ka makga a mabedi. (Mareka 11:15-17; Johane 2:14-17) Ge lešaba le be le tlo golega “Jesu wa Monatsaretha,” o ile a itšweletša ka sebete gomme a šireletša barutiwa ba gagwe ka go bolela ka go tia gore: “Ke nna yena. Ka gona, ge e ba le nyaka nna, lesang ba ba sepele.” (Johane 18:4-9) Ga go makatše gore ge Pontio Pilato a bona sebete sa Jesu ge a be a golegilwe le go swarwa gampe o ile a re: “Bonang! Motho yo!”—Johane 19:4, 5.

□ Na o gata mogato ka go tia le ka sebete ge o bona gore ke’ng seo o swanetšego go se dira?

Dika tše gotee le tše dingwe tše kgahlišago di dira gore Jesu e be mohlala o phethagetšego bakeng sa rena. Ge e ba re ka itumelela go tutuetšwa ke boitshwaro bja gagwe, re tla ba batho ba bakaone le ba thabilego kudu. Le ke lebaka leo ka lona moapostola Petro a kgothaletšago Bakriste go latela dikgato tša Jesu kgaufsi. Na o leka go latela dikgato tša Jesu kgaufsi-ufsi ka mo go ka kgonegago?

Ga se Feela Mohlala o Swanetšego go Latelwa

Lega go le bjalo, Jesu e be e se feela mohlala o swanetšego go latelwa. O itše: “Ke nna tsela le therešo le bophelo. Ga go yo a tlago go Tate ge e se ka nna.” (Johane 14:6) Ka ntle le go tsebatša therešo  ka Modimo, ka go rialo a bula tsela ya go batamela kgaufsi le Yena, Jesu o dirile gore go kgonege gore bao ba botegago ba hwetše bophelo.—Johane 3:16.

Mabapi le karolo ye ya lebaka la go tla ga gagwe lefaseng, Jesu o itše: “Morwa wa motho a se a tlela go direlwa, eupša a tletše go direla le go nea moya wa gagwe gore e be topollo bakeng sa ba bantši.” (Mateo 20:28) Ka go neela bophelo bja gagwe gore e be sehlabelo, Jesu o ile a thea motheo wa gore batho ba hwetše bophelo bjo bo sa felego. Ke’ng seo re swanetšego go se dira re le motho ka o tee ka o tee gore re holwe ke tokišetšo yeo? Jesu o hlalositše gore: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.”—Johane 17:3.

Ee, go hwetša tsebo ka Jesu, go ekiša tsela ya gagwe ya bophelo le go ba le tumelo lehung la gagwe la sehlabelo ke dinyakwa tša go hwetša bophelo bjo bo sa felego. Re go laletša gore o iphe nako ya go ithuta mothopo wa tsebo e bjalo e lego Beibele le go katanela go dira seo e se bolelago go etša ge Jesu a dirile. *

Bophelo bja Jesu bjo e lego mohlala bo re ruta gore re swanetše go ba batho ba mohuta ofe. Lehu la gagwe la sehlabelo le ka re lokolla sebeng le moputsong wa sona e lego lehu. (Baroma 6:23) Ruri boemo bja rena e be e tla ba bjo nyamišago ge nkabe re se na tutuetšo e matla ya Jesu Kriste! Le ka mohla o se ke wa dumelela mediro ya letšatši le letšatši le dipelaelo tša bophelo di go amoga sebaka sa go ithuta le go latela kgaufsi-ufsi mohlala wa motho yo phagamego kudu yo a kilego a phela—Jesu Kriste.

[Mengwalo ya tlase]

[Box/​Pictures on page 7]

▪ Jesu o be a sa bebe sefahlego gomme a hlompha batho ka moka

▪ E bile mogwera wa kgonthe go fihla mafelelong

▪ O be a e-na le sebete

▪ Na o leka go latela dikgato tša Jesu kgaufsi-ufsi ka mo go ka kgonegago?

[Diswantšho go letlakala 5]

Jesu o be a e-na le teka-tekano . . . 

a batamelega . . 

a e-na le kwelobohloko