Lesolo la go Nyaka Diphošo le Lebišitše Therešong

Bjalo ka ge go anega R. Stuart Marshall

Moruti wa mo-Jesuit o ile a re: “Ga re bolele le Dihlatse tša Jehofa. Di diriša Beibele.” Karabo ya gagwe e ile ya mmakatša, ka ge ke be ke sa tšwa go mo kgopela gore a thuše mosadi wa-ka ka go mmontšha go se dumelelane ga dithuto tša Dihlatse tša Jehofa. Ke ile ka phetha ka go ithuta Beibele le Dihlatse e le gore ke kgone go bontšha mosadi wa-ka go se dumelelane ga dithuto tša tšona.

KE NAKONG ye, ge ke be ke e-na le nywaga e 43, moo ke ilego ka thoma lesolo la go ganetša dithuto tša Dihlatse tša Jehofa, ke diriša bokgoni bja-ka bja go bea mabaka le tsebo ya thutatumelo. Ke ithutile dikolong tša Makatholika go tloga mephatong ya tlasana go fihla kholetšheng. Gaešita le ge ke hweditše degree ya bachelor of arts thutong ya tša boiphedišo (economics) ka 1969 le go ithuta filosofi le thutatumelo, ga go le e tee ya dithuto tša-ka tša Khatolika yeo e bego e akaretša thuto ya Beibele.

Ka morago ga gore ke aloge kholetšheng ke ile ka nyala Patricia McGinn, yo e bego e le Mokhatolika gotee le nna. Bobedi bja rena re ile ra hwetša di-degree tša doctorate Yunibesithing ya Stanford. Morwa wa rena e lego Stuart, o ile a belegwa ka 1977 gomme mafelelong re ile ra hudugela Sacramento, California kua U.S.A. Nywageng e 23 e latetšego ke be ke šomela mmušo wa California Ofising ya Baseka-seki ba Molao [Legislative Analyst’s Office (LAO)], ke seka-seka mafelelo ao kabo ya ditšhelete tša mmušo go tša thuto e bago le ona. Ke be ke šoma ka thata gomme ke thabela bophelo. Ke be ke thabela go bapala karolo ya-ka bjalo ka tate wa morwa wa rena ge a dutše a gola. Mosadi wa-ka yo a rategago e be e le mothekgi wa-ka yo a botegago kudu gomme le nna ke be ke mo thekga.

Karabo e Bitšago Disente tše 25

Ge morwa wa rena a be a e-na le nywaga e mebedi, Dihlatse tša Jehofa di ile tša nea Patricia Beibele gomme o ile a thoma go ithuta yona le tšona. O ile a kolobetšwa nywaga e meraro ka morago ga moo. Ke be ke nagana gore Dihlatse Jehofa di na le pono e lekanyeditšwego ditabeng tša matšatši a maikhutšo le tšhelo ya madi, eupša ke ile ka hwetša gore mabaka a tšona ditabeng tše dingwe a a kgodiša. Ke ile ka makatšwa ke gore letšatšing le lengwe ka 1987, ge ke be ke biditšwe gore ke tlo hlatsela pele ga komiti ya tša thuto ya senate sa Amerika le lekgotla le legolo la mmušo mabapi le go kgethwa ga-ka go ba setho sa lekgotla-thera-molao, ke ile ka tšweletša maikwelo a-ka phatlalatša.

Yunibesithi ya California e be e nyaka go thekgwa ka ditšhelete gore e phadišane le dilete tše dingwe e le gore e newe mošomo wa mmušo woo ditshenyagalelo tša ona di bego di bitša ditolara tše dimilione tše dikete tše tshela. Modiro woo e be e le wa go aga sedirišwa se segolo kudu sa tša thutamahlale. Ke be ke boletše gore yunibesithi e se ke ya thekgwa ka ditšhelete, ke hlalosa gore modiro wo o ka se hole selete sa rena go tša ditšhelete. Yunibesithi e ile ya arabela ka go tliša banna ba babedi bao ba thopilego sefoka sa Nobel go tša thutamahlale gore ba hlatsele  pele ga lekgotla-thera-molao. Yo mongwe le yo mongwe wa bona o ile a hlalosa tsebo yeo e tlago go tlišwa ke modiro wo. Yo mongwe o boletše gore modiro wo o tla araba dipotšišo tša mabapi le mathomo a legohle. Yo mongwe yena o boletše gore modiro wo o ka re thuša go kwešiša gore bophelo bo thomile bjang polaneteng ya rena.

Modula-setulo wa komiti o ile a retologela go nna.

O ile botšiša gore: “Na o nagana gore ditolara tše dimilione tše dikete tše tshela ke tšhelete e ntši kudu e ka lefšago bakeng sa dikarabo tša dipotšišo tše?”

Ke ile ka araba ka gore: “Ke a dumela gore dipotšišo tše ke tša bohlokwa. Lega go le bjalo, Dihlatse tša Jehofa di tla legaeng la-ka mesong ya Mokibelo o mongwe le o mongwe gomme di nnea makasine wo o ka arabago dipotšišo tše swanago le tše ka moneelo wa disente tše 25. Le gona, ga ke kgonthišege gore dikarabo tšeo di bitšago ditolara tše dimilione tše dikete tše tshela tšeo re ka di hwetšago modirong wo di phala karabo e bitšago disente tše 25.”

Batho ka moka ka phapošing ba ile ba hwa ka disego, go akaretša le banna ba babedi bao ba thopilego sefoka sa Nobel. Gaešita le ge lekgotla-thera-molao le ile la thekga yunibesithi ka ditšhelete, ga go yo a ilego a ganetšana le taba ya-ka.

Ge nako e dutše e e-ya, ke ile ka bona go nyakega gore ke lokiše bothata bjo bo bego bo tšwelela ka gae. Ka morago ga go boledišana le Patricia ka Beibele le Dihlatse tša Jehofa ka nywaga e tshela, ke ile ka nyama ge a be a nyaka go fetša nako e ntši modirong wa go bolela le batho ka Beibele. Se se be se tla bolela gore a fokotše nako yeo a e fetšago mošomong wa gagwe yunibesithing. Ke ile ka se kwešiše lebaka leo ka lona motho yo a naganago gabotse a ka bago le boikemišetšo bjo bjalo, le gona go bonala go be go se na seo nka se bolelago goba go se dira seo se bego se ka fetoša monagano wa gagwe.

Ke ile ka leka go hwetša thušo ya setsebi, motho yo a bego a e-na le tsebo e ntši ya Beibele go mpheta le yo ke bego ke nagana gore o tla kgona go bontšha mosadi wa-ka go se dumelelane ga dithuto tša dihlatse tša Jehofa le Beibele gabonolo. Go bontšha gore thuto e tee feela e fošagetše go be go tla dira gore a belaele tše dingwe ka moka. Se ke sona seo ke bego ke tla se nyaka go fihlelela pelo ya mosadi wa-ka yo bohlale. Ke ile ka kgopela moruti wa mo-Jesuit wa kereke yeo nna le Patricia re bego re le ditho tša yona. Poledišano ya rena e fedile ka mantšu ao a boletšwego mathomong a sehlogo se. Ge moruti a be a gana go boledišana le mosadi wa-ka, ke ile ka lemoga gore gaešita le ge go be go tla ntšea nako e teletšana, ke nna ke bego ke tla swanelwa ke go hwetša diphošo gomme ke di bontšhe Patricia.

Lesolo La-ka la go Nyaka Diphošo

Ge ke be ke ithuta Beibele le Dihlatse, seo se ilego sa nkgahla kudu e bile boporofeta bja Beibele. Ke ile ka bala boporofeteng bja Jesaya ditaba ka botlalo tša mabapi le go wa ga Babilona tšeo di ngwadilwego mo e ka bago nywaga e 200 pele ga tiragalo yeo, tšeo gape di šupago Korese ka go lebanya e le mofenyi gomme di hlalosago maano a go gopiša Noka ya Eforate e le gore a fenye Babilona. (Jesaya 44: 27–45:4) Nywageng e fetilego ke be ke ile ka ithuta ka go wa ga Babilona ge re be re rutwa mekgwa ya go lwa ya bošole. Ke ithutile gape le gore moporofeta Daniele o be a boletše e sa le pele, mo e ka bago nywaga e 200 e sa le pele, ka ditaba ka botlalo tša mabapi le kgoši e matla ya Gerika yeo mmušo wa yona o bego o tla arolwa go ba mebušo e menyenyane e mene ka morago ga lehu la yona. (Daniele 8:21, 22) Ke ile ka gopola taba ya Aleksandere yo Mogolo go tšwa thutong ya-ka ya histori ya bogologolo. Go tšwa nyakišišong ya-ka, ke ile ka hlatsela gore dipuku tše tša Beibele ge e le gabotse di be di ngwadilwe pele ga ditiragalo tšeo di bolelago ka tšona.

Ge ke dutše ke tšwela pele go ithuta le Dihlatse, ke mo ke bego ke kgodišega gore Beibele ke Lentšu la Modimo, e lego selo seo go ithuta ga-ka thutatumelo ya Khatolika ka nywaga e mentši go sa kago gwa ntirela sona. Ke be ke tla dira’ng ka tsebo ye? Ke ile ka phetha ka go neela bophelo bja-ka go Jehofa gomme ka ba yo mongwe wa Dihlatse tša gagwe. (Jesaya 43:10) Ke ile ka kolobetšwa ka 1991, nywaga e mebedi feela ka morago ga poledišano ya-ka le moruti. Morwa wa rena o ile a kolobetšwa ngwageng o latelago.

Ka ge re be re e-na le morero o mofsa, re ile ra fetoša dilo tšeo re di phegelelago re le lapa. Se sengwe sa dilo tša mathomo tšeo ke ilego ka di dira ka morago ga go kolobetšwa e bile go dira ditokišetšo tša gore ka morago ga nywaga e mehlano, mosadi wa-ka a tlogele modiro wa go ruta yunibesithing a e-na le nywaga e 50. O be a nyaka go ba modiredi wa ka mehla yo a bolelago le batho ka Beibele, e lego mošomo woo ka nako yeo o bego o akaretša go šoma diiri tše 1 000 ka ngwaga goba diiri tše 83 ka kgwedi bakeng sa go thuša ba bangwe go ithuta ditherešo tša Beibele. Ka 1994, o be a fokoditše nako yeo a e fetšago mošomong wa gagwe e le gore a ka thoma modiro wa go bolela le batho ka Beibele ka mehla. Dilo tša mathomo tšeo ke bego ke nyaka go di fihlelela di be di akaretša go kaonafatša bodiredi bja-ka, go thuša mo nka kgonago phuthegong ya gabo rena le go ithapela go thuša ka go hlokomela dipuku tša ditšhelete tša kago ya Diholo tša Mmušo tikologong ya gabo rena.

Ka dinako tše dingwe ke be ke e-ba le sebaka sa go bolela ka Beibele mošomong. Moseka-seki yo mofsa wa kabo ya ditšhelete wa LAO e be le Hlatse yeo e bego e fodile tumelong. Go belaela ga gagwe Beibele go be go dirile gore tumelo ya gagwe e fokole. Ke ile ka thabela go mo thuša tumelong. O ile a boela seleteng sa gabo gomme a thoma modiro wa go bolela le batho ka Beibele ka mehla.

Ka 1995, ke be le sebokeng se kgethegilego sa komiti ya tša thuto ya senate sa Amerika le lekgotla le legolo la mmušo sa mabapi le nyakišišo yeo e thekgwago ke mmušo ka ditšhelete. Modula-setulo wa komiti o ile a botšiša moemedi wa mmušo gore go diregile eng ka modiro wa go aga sedirišwa se segolo kudu sa tša thutamahlale. Ge a araba, moemedi wa mmušo o ile a bolela gore modiro wo o ile wa newa selete sa Texas eupša ga se wa ka wa fetšwa ka baka la mabaka a mararo. La pele, ditshenyagalelo tša modiro wo di oketšegile go tloga go ditolara tše dimilione tše dikete tše tshela go ya go tše dimilione tše dikete tše senyane pele o ka thongwa. La bobedi, mmušo o be o nyaka gore tšhelete yeo e dirišetšwe ntwa ya Iraq ya 1991. La boraro, ba hweditše gore ba ka hwetša dikarabo tša dipotšišo tša bophelo go Dihlatse tša Jehofa ka go lefa disente tše 25! Go bonala mantšu a-ka a ile a boeletšwa ke batho ba bantši gomme ga bjale a boeletšwa ke dikomiti tša tša thuto.

Ge batho ka moka ba be ba sega, ditho tše dingwe tša komiti di ile tša ntebelela. Ke ile ka bolela bakeng sa go tsebiša ka moka bao ba bego ba le gona ka thulaganyo e mpsha ka gore: “Ga bjale le ka hwetša dikarabo ntle le tefo ka go fo bala dikgatišo tšeo.”

Bophelo bjo bo Kgotsofatšago le bjo bo Nago le Morero

Gatee-tee ge mosadi wa-ka a se na go rola modiro, re ile ra dira thulaganyo ya-ka ya nywaga e mehlano. Ka bohlale ke ile ka botšiša batho bao ba nyakelago ba bangwe mošomo ge e ba go ka kgonega gore ke šome ka nakwana, ka ge ga bjale ke be ke nyaka go fetša nako e oketšegilego ke ruta ba bangwe ditherešo tša Beibele. Go sa letelwa, LAO e ile ya nnea sebaka sa go šoma ka nako e fokoditšwego. Ka gona, ka 1998 le nna ke ile ka ba modiredi wa nako e tletšego yo a bolelago le batho ka Beibele.

Mesong e mengwe ge nna le mosadi wa-ka re be re itokišetša go yo bolela le batho ka Beibele, ke ile ka hwetša mogala o tšwago ofising ya lekala ya Dihlatse tša Jehofa ya United States kua Brooklyn, New York. Ka ge a be a nteleditše mogala ka baka la nyakišišo yeo e bego e dirilwe pejana, motho yo o  ile ba mpotšiša ge e ba nka thabela go šoma modirong o itšego kua Brooklyn. Ke ile ka araba ka gore ee. Seo se ile sa dira gore re šome ntlong-kgolo ka dikgwedi tše 18. Ke ila ka feleletša ke rola modiro pele ga nako seleteng sa California e le gore ke fetše modiro woo. Ka morago ga moo, re ile ra ithapela go thuša modirong wa go aga Holo ya Kopano ya Dihlatse tša Jehofa kua Fairfield, California. Re ile ra rekiša ntlo ya rena kua Sacramento gomme ra hudugela phapošing e nyenyane kua Palo Alto. Go rola ga-ka modiro pele ga nako go ile gwa tliša ditšhegofatšo tše oketšegilego. Go tloga ka nako yeo re šomile medirong e mengwe diofising tša makala tša Dihlatse tša Jehofa kua Nigeria, Afrika Borwa, Canada, Brithania le Jeremane.

Go swana le Dihlatse tšeo di re thušitšego, nna le mosadi wa-ka re thabela go thuša ba bangwe go ithuta ditherešo tša Beibele. Ruri ke nagana gore thuto e tšwago go Jehofa ke e putsago kudu go feta thuto ka moka e phagamego yeo ke e hweditšego. Ga e swane le thuto le ge e le efe lefaseng ka baka la dilo tše fapa-fapanego tšeo di rutwago le ka tsela e tseneletšego yeo di rutwago ka yona. Jehofa o tlwaeditše Dihlatse tša gagwe go ruta Beibele ka tsela yeo e kgomago monagano le pelo. Se ke seo se ntutueletšago go tšwela pele ke ithuta. Nna le mosadi wa-ka re leboga bophelo bjo re bo phelago le sebaka se se kgethegilego seo re nago le sona sa go diriša thuto ya rena bakeng sa go hlankela Mmuši wa Legohle, Jehofa Modimo.

[Ntlhakgolo go letlakala 27]

Ge ke be ke ithuta Beibele le Dihlatse, seo se ilego sa nkgahla kudu e bile boporofeta bja Beibele

[Seswantšho go letlakala 27]

Ke e-na le Patricia ka letšatši la rena la lenyalo

[Tlhaloso ya seswantšho go letlakala 29]

Re thabela go thuša ba bangwe go ithuta ditherešo tša Beibele