Batamela Kgaufsi le Modimo

Mmopi yo a Swanelwago ke Gore re mo Tumiše

Kutollo 4:11

NA O kile wa ipotšiša gore, ‘Ke ka baka la’ng re phela?’ Bao ba dumelago gore bophelo bo bile gona ka baka la tlhagelelo e se nago tlhaologanyo ga ba atlege lesolong la bona la go hwetša karabo ya potšišo ye. Ga go bjalo go bao ba dumelago therešo e kgonthišeditšwego ya gore Jehofa Modimo ke Mothopo wa bophelo. (Psalme 36:9) Ba a tseba gore o be a e-na le morero ge a be a re bopa. Morero wo o boletšwe go Kutollo 4:11. Anke re boneng kamoo mantšu a, ao a ngwadilwego ke moapostola Johane, a hlalosago lebaka leo ka lona re phelago.

Johane o ngwala ka kopelo ya legodimong yeo e tumišago Modimo e rego: “Jehofa, wena Modimo wa rena o swanelwa ke go amogela letago, kgodišo le matla, gobane o bopile dilo ka moka, gomme di bile gona le go bopša ka baka la thato ya gago.” Ke Jehofa feela yo a swanelwago ke tlhompho e bjalo. Ka baka la’ng? Ka gobane o “bopile dilo ka moka.” Ka gona, ke’ng seo dibopiwa tša gagwe tše bohlale di swanetšego go tutueletšaga go se dira?

Go thwe Jehofa o swanelwa ke go “amogela” letago, kgodišo le matla. Ka ntle le pelaelo, ke Motho yo a nago le letago, yo a hlomphegago le yo matla kudu legohleng. Lega go le bjalo, bontši bja batho bo tloga bo sa amogele gore ke Mmopi. Eupša go na le batho bao ba bonago gabotse “dika tša gagwe tše di sa bonagalego” ka go lebelela dilo tšeo a di bopilego. (Baroma 1:20) Ka dipelo tšeo di tletšego tebogo, ba tutueletšega go nea Jehofa letago le kgodišo. Ba botša batho ka moka bao ba kwago ka bohlatse bjo bontši bja gore Jehofa ke yena a bopilego dilo ka moka ka tsela e makatšago le gore ka baka leo o swanelwa ke gore re mo nee tlhompho ya borapedi.—Psalme 19:1, 2; 139:14.

Lega go le bjalo, barapedi ba Jehofa ba mo nea matla bjang? Ke therešo gore ga go sebopiwa seo se ka neago Mmopi ra-matla ohle matla. (Jesaya 40:25, 26) Lega go le bjalo, ka ge re bopilwe ka seswantšho sa Modimo, re neilwe tekanyo e itšego ya dika tša Modimo, tšeo se sengwe sa tšona e lego matla. (Genesi 1:27) Ge e ba re leboga seo Mmopi wa rena a re diretšego sona e le ka kgonthe, re tla tutueletšaga go diriša matla a rena go mo godiša le go mo nea letago. Go e na le go fetša matla a rena ka go tšwetša pele dilo tšeo re di ratago, re bona gore Jehofa Modimo o swanelwa ke go amogela matla a rena ka moka ge re mo hlankela.—Mareka 12:30.

Ka gona, ke ka baka la’ng re phela? Karolo ya mafelelo ya Kutollo 4:11 e araba ka gore: “[Dilo ka moka tše bopilwego] di bile gona le go bopša ka baka la thato ya gago.” Ga se ka thato ya rena re lego gona. Re gona ka baka la thato ya Modimo. Ka baka leo, go phelela go dira thato ya rena ke go phela bophelo bjo bo se nago morero. E le gore re be le khutšo ya monagano, lethabo le kgotsofalo, re swanetše go ithuta seo thato ya Modimo e lego sona gomme re dumelelanye maphelo a rena le yona. Ke feela ka go dira bjalo mo re ka hwetšago morero wa go bopša ga rena.—Psalme 40:8.

[Mothopo wa Seswantšho go letlakala 31]

NASA, ESA, and A. Nota (STScI)