Babadi ba Rena ba a Botšiša

Na Dihlatse tša Jehofa di Amogela Testamente ya Kgale?

Dihlatse tša Jehofa di lebelela Beibele e le Lentšu la Modimo gomme di amogela bobedi Testamente ya Kgale le Testamente e Mpsha e le dikarolo tša bohlokwa tša Beibele. Lega go le bjalo, di kgetha go diriša maina a swanelegago kudu, e lego “Mangwalo a Seheberu” gotee le “Mangwalo a Bakriste a Segerika,” ka ge Seheberu le Segerika e le maleme ao Testamente ya Kgale le Testamente e mpsha di ngwadilwego ka ona mathomong.

Ka lehlakoreng le lengwe, batho ba bangwe bao ba ipolelago gore ke Bakriste ba dika-dika go amogela Testamente ya Kgale. Ba bolela gore e hlalosa Modimo e le yo bogale le yo a dumelelago dintwa, dipolao le ditiro tšeo go lego thata go di dumelelanya le ditiro tša Modimo yo lerato le yo a nago le ditekanyetšo yo a utollotšwego Testamenteng e Mpsha. Goba ba bolela gore ka ge Testamente ya Kgale e bolela kudu ka bodumedi bja Bajuda, ga e swanele Bakriste. Lega go le bjalo, ka baka la taelo ya Modimo yeo e lego go Doiteronomio 12:32 ya gore re se ke ra oketša goba ra fokotša lentšu la gagwe, na a ke mabaka a kwagalago a go gana mo e ka bago 75 lekgolong ya Beibele?

Nako e itšego ka 50 C.E. ge moapostola wa Mokriste e lego Paulo a be a etetše badudi ba Thesalonika kua Gerika, o ile “a ba fa mabaka ka Mangwalo, a hlalosa le go hlatsela ka ditšhupetšo gore go be go swanetše gore Kriste a tlaišege le go tsoga bahung.” (Ditiro 17:1-3) Ba bangwe ba batheetši ba gagwe ba ile ba fetoga Bakriste gomme ka morago Paulo o ile a ba reta ka gore: “Eitše ge le amogela lentšu la Modimo, leo le le kwelego go tšwa go rena, la le amogela, e sego e le lentšu la batho, eupša kamoo ruri le lego ka gona, e le lentšu la Modimo.” (1 Bathesalonika 2:13) Nakong ya ketelo ya gagwe, go bonala Ebangedi ya Mateo e le yona feela yeo e bego e ngwadilwe gare ga dipuku tše 27 tša Mangwalo a Bakriste a Segerika. Ka gona, go molaleng gore “Mangwalo” ao Paulo a a dirišitšego go hlatsela “ka ditšhupetšo” e be e le taba e ngwadilwego e tšwago Mangwalong a Seheberu.

Ge e le gabotse, bangwadi ba Mangwalo a Bakriste a Segerika ba ile ba tsopola taba e ngwadilwego ya Mangwalo a Seheberu ka go lebanya ka makga a ka bago 320 gomme ba e tsopola ka go se lebanye ka makga a mangwe gape a makgolo a mmalwa. Ka baka la’ng? “Gobane dilo tšohle tšeo di ilego tša ngwalwa e sa le pele di ile tša ngwalelwa go re ruta, gore ka kgotlelelo ya rena le ka khomotšo e tšwago Mangwalong re be le kholofelo.” (Baroma 15:4) Se se bontšha gabotse gore bao lehono ba amogelago Beibele ka moka ba holega kudu ka go dira bjalo.

Mangwalo a Bakriste a Segerika, ao a theilwego motheong wo o beilwego ke Mangwalo a Seheberu, ke tšwetšopele e bohlale ya Lentšu la Modimo yeo e bakilwego ke go utollwa ganyenyane-ganyenyane ga merero ya Modimo. Ga a nyatše bohlokwa bja Mangwalo a Seheberu ka tsela le ge e le efe. Moprofesara wa tša bodumedi Yunibesithing ya Cambridge e lego Herbert H. Farmer o re Diebangedi “di ka se ke tša kwešišwa ge e ba go hlokomologwa seo se diregilego pele historing ya batho bao Modimo a bego a e-na le kgwerano le bona, bjalo ka ge go hlalositšwe ka Testamenteng ya Kgale.”

Ga go nyakege gore Lentšu la Modimo le boeletšwe. Lega go le bjalo, “mmila wa baloki ó étša boka mahuba xe a hlatloxa, ’tšatši la bá la hlaba.” (Diema 4:18) Ka go tlaleletša ka Mangwalo a Bakriste a Segerika lelokelelong la dipuku tša Beibele, Modimo o ile a dira gore go kwešišege kamoo morero wa gagwe o bego o tla phethagala ka gona, ka ntle le go nyatša bohlokwa bja Mangwalo a Seheberu. Ka moka ke karolo ya “lentšu la Jehofa le [dulago] le le gona go ya go ile.”—1 Petro 1:24, 25.