Na Diphodišo Tšeo Lehono go Thwego ke tša Mohlolo di tšwa go Modimo?

DINAGENG tše itšego, go tlwaelegile go bona ditho tša madumedi di etela mafelo a makgethwa ao go ona batho ba bantši ba bolelago gore ba ile ba fodišwa malwetši ao go thwego ga a alafege. Dinageng tše dingwe, bafodiši ba bangwe ba bolela gore ba alafa batho ka matla a phagametšego a tlhago. Mafelong a mangwe le gona, go swarwa dipokano tša bodumedi tše tletšego lešata tšeo go tšona batho ba babjago ba ka emelelago ditulong tša bona tša digole goba ba lahla dipatla tša bona gomme ba bolela gore ba fodišitšwe.

Gantši bao ba dirago diphodišo tše bjalo ba tšwa madumeding a fapa-fapanego gomme gantši ba latofatšana ka gore ke bahlanogi, ke ba bofora goba ke baheitene. Ka gona go ka botšišwa gore, Na Modimo o dira mehlolo ka go diriša mekero e mentši yeo gantši e ganetšanago? Ge e le gabotse, Beibele e re: “Modimo ga se Modimo wa tlhakatlhakano eupša ke wa khutšo.” (1 Bakorinthe 14:33) Ka gona, na diphodišo tšeo go thwego ke tša mohlolo di tšwa go Modimo e le ka kgonthe? Bafodiši ba bangwe ba bolela gore ba fodiša ka matla a Jesu. Anke re hlahlobeng kamoo Jesu a bego a fodiša batho ka gona.

Kamoo Jesu a Bego a Fodiša Batho ka Gona

Jesu o be a fodiša balwetši ka tsela e fapanego kudu le ya bafodiši ba mehleng ya lehono. Ka mohlala, Jesu o be a fodiša bohle bao ba bego ba e-tla go yena bakeng sa thušo. O be a sa fodiše batho ba itšego bao ba kgethilwego lešabeng gomme a gomišetše ba bangwe gae ba sa fodišwa. Le gona, Jesu o be a fodiša batho ka mo go feletšego gomme ka mehla a dira bjalo mo e nyakilego go ba gatee-tee. Beibele e re: “Lešaba ka moka le be le nyaka go mo kgwatha, gobane matla a be a e-tšwa go yena gomme a ba fodiša ka moka.”—Luka 6:19.

Go fapana le bafodiši ba mehleng ya lehono bao ba fodišago ka tumelo bao gantši ba pharago balwetši molato wa go hloka tumelo ge ba sa fole, Jesu o be a fodiša gaešita le batho bao ba bego ba sešo ba ba le tumelo go yena. Ka mohlala, ka nako e nngwe Jesu o ile a ya go monna yo a bego a foufetše gomme a mo fodiša ntle le gore monna yoo a mo kgopele. Ka morago, Jesu o ile a mmotšiša gore: “Na o dumela go Morwa wa motho?” Monna yoo o ile a araba ka gore: “Ke mang, morena, e le gore ke dumele go yena?” Jesu o ile a mmotša gore: “Yo a bolelago le wena ke yena yoo.”—Johane 9:1-7, 35-38.

O ka ipotšiša gore, ‘Ge e ba tumelo e be e sa nyakege e le gore motho a fodišwe ke Jesu, gona ke ka baka la’ng gantši Jesu a ile a botša bao a ba fodišitšego gore: “Tumelo ya gago e go fodišitše”?’ (Luka 8:48; 17:19; 18:42) Ka go bolela bjalo, Jesu o be a bontšha gore bao ba bego ba tutuetšwa ke tumelo gore ba mo nyake ba be ba fodišwa, mola bao ba bego ba gana go tla go yena ba ile ba se hwetše sebaka sa go fodišwa. Bao ba fodišitšwego ga se ba fodišwa ke tumelo ya bona; ba fodišitšwe ke matla a Modimo. Beibele e bolela ka Jesu gore: ‘Modimo o mo tloditše ka moya o mokgethwa le ka matla, gomme a sepela le naga ka moka a dira botse le go fodiša bohle bao ba gateletšwego ke Diabolo; gobane Modimo o be a e-na le yena.’—Ditiro 10:38.

Gantši go bonala tšhelete e bapala karolo e kgolo go seo go bonalago eka ke phodišo lehono. Batho bao ba fodišago ka tumelo ba tsebja ka go ba le bokgoni bja go kgoboketša tšhelete. Go begilwe gore mofodiši yo mongwe o kgobokeditše diranta tše dimilione tše 684 ka ngwaga o tee ka mediro ya gagwe lefaseng ka bophara. Mekgatlo ya dikereke le yona e dira tšhelete ka ditho tša yona tšeo di tlago mafelong a makgethwa a bodumedi ka kholofelo ya gore di tla fodišwa. Ka mo go fapanego, Jesu ga se a ka a lefiša batho bao a ba fodišitšego. Nakong e nngwe o ile a ba a ba nea dijo. (Mateo 15:30-38) Ge Jesu a be a roma barutiwa ba gagwe go ya go bolela le batho ka Modimo, o ba boditše gore: “Le fodiše balwetši, le tsoše bahu, le hlwekiše balephera, le leleke batemona. Le amogetše feela, neang feela.” (Mateo 10:8) Ke ka baka la’ng diphodišo  tša bafodiši ba lehono di fapane gakaaka le tša Jesu?

Seo go Thwego ke Phodišo se tšwa Mothopong Ofe?

Go theoša le nywaga, ditsebi tše dingwe tša tša kalafo di ile tša hlahloba seo se bolelwago ke bafodiši ba bodumedi. Ke’ng seo ba se hweditšego? Go ya ka Daily Telegraph ya London, ngaka ya kua Engelane yeo e feditšego nywaga e 20 e nyakišiša taba ye e itše: “Ga go na bohlatse bja tša kalafo bjo bo thekgago dipego tše kgahlišago tša go fodišwa ga batho ka mohlolo.” Lega go le bjalo, batho ba bantši ba dumela e le ka kgonthe gore ba fodišitšwe ke matla a dilo tše rapelwago tšeo di bego di dirišwa ke bakgethwa, mafelo a makgethwa goba bafodiši ba tumelo. Na go ka direga gore ba forilwe?

Thutong ya gagwe yeo e tsebjago kudu ya Thabeng, Jesu o itše baetapele ba maaka ba bodumedi ba tla re go yena: “Morena, Morena, na ga se ra ka ra . . . dira mediro e mentši e matla ka leina la gago?” Lega go le bjalo, o tla ba araba ka gore: “Ga se ka ka ka le tseba! Tlogang go nna lena badiri ba go hloka molao.” (Mateo 7:22, 23) Mabapi le mothopo wa matla ao baetapele ba ba rego ba na le ona, moapostola Paulo o lemošitše gore: “Go ba gona ga motho wa go hloka molao ke ka baka la go šoma ga Sathane ka modiro o mongwe le o mongwe o matla le dipontšho le dika tša bofora le ka bofora bjo bongwe le bjo bongwe bjo bo sa lokago.”—2 Bathesalonika 2:9, 10.

Go oketša moo, diphodišo tšeo go thwego ke tša tumelo tšeo di tswalanago le dilo tšeo di rapelwago ka gobane di be di dirišwa ke bakgethwa, medimo le diswantšho ga di tšwe go Modimo. Ka baka la’ng? Ka gobane Lentšu la Modimo le re laela ka mo go kwagalago gore: “Tšhabang borapedi bja medimo ya diswantšho” le gore “Itišeng medimong ya diswantšho.” (1 Bakorinthe 10:14; 1 Johane 5:21) Diphodišo tše bjalo tšeo go thwego ke tša tumelo ke karolo ya makatika a Diabolo a go kgeloša batho borapeding bja therešo. Beibele e re: “Sathane ka boyena o dula a itira morongwa wa seetša.”—2 Bakorinthe 11:14.

Lebaka Leo ka Lona Jesu le Baapostola ba Bego ba Fodiša Batho

Diphodišo tša kgonthe tša mohlolo tšeo di begilwego ka Mangwalong a Bakriste a Segerika di bontšhitše gabotse gore Jesu le baapostola ba be ba e-tšwa go Modimo. (Johane 3:2; Baheberu 2:3, 4) Le gona, diphodišo tša Jesu tša mohlolo di be di thekga molaetša woo a bego a o bolela. Beibele e re: “A sepela le Galilea ka moka ga yona, a ruta disinagogeng tša bona a bolela ditaba tše dibotse tša mmušo e bile a fodiša mohuta o mongwe le o mongwe wa bolwetši.” (Mateo 4:23) Mediro ya Jesu e matla—yeo e bego e sa akaretše go fodiša balwetši feela eupša e bego e akaretša le go fepa mašaba, go laola matla a tlhago gaešita le go tsoša bahu—e be e bontšha seo a tlago go se direla batho ba kwago ka tlase ga pušo ya gagwe ya Mmušo. Ruri tšeo e be e le ditaba tše dibotse!

Mediro e bjalo e matla goba dimpho tša moya di ile tša fela ge Jesu le baapostola ba gagwe go akaretša le batho le ge e le bafe bao ba ilego ba ba nea dimpho tšeo ba e-hwa. Moapostola Paulo o ngwadile gore: “Le ge go e-na le dimpho tša go porofeta, di tla fedišwa; le ge go e-na le maleme [ao a bolelwago ka mohlolo], a tla kgaotša; le ge go e-na le tsebo [yeo e utolotšwego ke Modimo] e tla fedišwa.” (1 Bakorinthe 13:8) Ka baka la’ng? Ka ge e phethile morero wa yona—go bontšha gore Jesu ke Mesia yo a holofeditšwego le gore phuthego ya Bokriste e amogelwa ke Modimo—mediro e bjalo e matla, go akaretša le go fodiša batho, ga e sa nyakega; e ‘fedišitšwe.’

Lega go le bjalo, mehlolo ya Jesu ya go fodiša batho e na le molaetša wa bohlokwa go rena lehono. Ge e ba re lebiša tlhokomelo go Jesu gomme re bontšha tumelo go seo a se boletšego ka Mmušo wa Modimo, re ka fagahlela nako yeo ka yona boporofeta bjo bo buduletšwego bo tlago go phethagala go rena gaešita le tswalanong ya rena le Modimo ge bo re: “Xo ka se bê le e a rexo: Ke a babya!”—Jesaya 33:24; 35:5, 6; Kutollo 21:4.