Na o be o Tseba?

Ke mošomo wa mohuta ofe woo Jesu a bego a ka o dira bjalo ka mmetli?

Tatago Jesu wa mogodiši e be e le mmetli. Jesu le yena o ile a ithuta modiro woo. Ge a be a thoma bodiredi bja gagwe a e-na le nywaga “e ka bago e masome-tharo,” o be a sa lebelelwe feela e le “morwa wa mmetli” eupša o be a lebelelwa e le mmetli ka boyena.—Luka 3:23; Mateo 13:55; Mareka 6:3.

Motseng wa gabo Jesu, go ka ba go be go nyakega ditlabakelo tša go lema tše bjalo ka megoma le dijoko tšeo di bego di dirwa ka legong. Gare ga dilo tše dingwe tšeo mmetli a bego a di betla ka mehla go ka ba go be go e na le dithoto tša ka ntlong—ditafola, ditulo le diraka—go akaretša le dilo tše bjalo ka mabati, mafasetere, dikgonyu tšeo di dirilwego ka legong gotee le dikota tša marulelo. Ge e le gabotse, mošomo wa mmetli o be o akaretša go aga.

Papišong e nngwe, Johane Mokolobetši o boletše ka selepe, e lego sedirišwa seo Jesu gotee le babetli ba bangwe ba ka bego ba ile ba se diriša go rema dihlare. Ka morago ga moo, ba be ba ka betla dikota tšeo gore e be dikota tša go thekga marulelo ba le gona moo sethokgweng goba ba be ba ka di iša moo ba šomelago gona. Ga go pelaelo gore karolo ye ya modiro e be e nyaka matla a mantši. (Mateo 3:10) Jesaya o lokeletša ditlabakelo tše dingwe tšeo di bego di dirišwa ke babetli mehleng ya gagwe ka gore: “Mmetli ó êla kwata ka lenti, a swaya ka kwádi, a betla ka petlwana a lekanya, a dira motho à swanthša monna, ya ba wa xo dula ka ntlong.” (Jesaya 44:13) Dilo tšeo di epolotšwego di kgonthišetša go dirišwa ga disaga, dinoto tšeo di dirilwego ka mafsika gotee le dipikiri mehleng ya Beibele. (Ekisodo 21:6; Jesaya 10:15, PK; Jeremia 10:4) Ke mo go kwagalago go nagana gore Jesu a ka be a ile a diriša dilo tše bjalo.

“Bo-radipanka” bao Jesu a boletšego ka bona go e nngwe ya dipapišo tša gagwe e be le bomang, gona ba be ba šoma bjang?

Jesu o boletše ka mong wa makgoba yo a ilego a kgalema lekgoba leo le bego le sa tšweletše ka gore: “O ka be o ile wa bea ditšhelete tša-ka tša silifera go bo-radipanka gomme ge ke fihla ke be ke tla hwetša se e lego sa-ka se na le tswalo.”—Mateo 25:27.

Mehleng ya Jesu go be go se na dipanka tše dikgolo tšeo di lego gona lehono. Lega go le bjalo, nako e telele pele Jesu a e-tla lefaseng, baadimiši ba ditšhelete ba be ba lefa tswalo tšheleteng yeo ba e swarišitšwego gomme ba adimiša tšhelete yeo ka tswalo ya godimo kudu. Go ya ka The Anchor Bible Dictionary, ditšhelete tša kadimo tšeo di lefšago ka tswalo di be di tlwaelegile kua Gerika lekgolong la bone la nywaga B.C.E. Le gona, nakong ya khutšo yeo e bego e theilwe ke Mmušo wa Roma, tekanyo ya tswalo yeo e bego e lefša ka ngwaga bakeng sa tšhelete ya kadimo e be e le magareng ga nne le tshela lekgolong.

Molao wa Moše o be o sa dumele gore Baisiraele ba badiidi ba adingwe tšhelete yeo e lefšago ka tswalo. (Ekisodo 22:24) Go bonala molao wo o be o dirišwa kudu-kudu tšheleteng yeo e adingwago badiidi. Lega go le bjalo, go etša ge papišo ya Jesu e bontšhitše, go be go tlwaelegile gore motho a lefše tswalo tšheleteng yeo a e swarišitšego baadimiši ba tšhelete goba “bo-radipanka.” Ka gona, ka tlwaelo Jesu o dirišitše selo seo batheetši ba gagwe ba bego ba se tlwaetše.