Seo Batho ba se Bolelago ka Jesu

“Ka ntle le pelaelo . . . Jesu wa Natsaretha ke motho yo a nago le tutuetšo e kgolo kudu historing.”—H. G. Wells, radihistori wa Leisemane.

“Kriste ke wa moswana-noši . . . gare ga bagale ka moka ba kilego ba ba gona historing.”—Philip Schaff, rathutatumelo le radihistori yo a belegetšwego Switzerland.

KE MANG yo a swanelwago ke go bitšwa motho yo phagamego kudu yo a kilego a phela? Bogolo bja motho bo swanetše go elwa bjang? Ka bokgoni bja gagwe bja tša bohlabani? Ka matla a gagwe a mmele? Ka matla a gagwe a monagano? Goba na bo swanetše go elwa kamoo mantšu le ditiro tša gagwe di kgomago batho ka gona le ka mohlala woo a ba beelago ona?

Ela hloko seo bo-radihistori, bo-rathutamahlale, diithuti, bangwadi, baetapele ba dipolitiki le ba bangwe—ba nakong e fetilego le ba gona bjale—ba se boletšego ka monna yo a tšwago Natsaretha e lego Jesu Kriste:

“Lega go le bjalo, go tla nyakega mabaka a sa tlwaelegago go ganetša gore motho yo a bilego le tutuetšo e matla kudu—e sego feela nywageng ye e dikete tše pedi e fetilego eupša historing ka moka ya batho—e be e dutše e le Jesu wa Natsaretha.”—Reynolds Price, Mongwadi wa Moamerika le seithuti sa Beibele.

“Monna yo a bego a se na molato ka mo go feletšego o ile a ineela bjalo ka sehlabelo bakeng sa go hola ba bangwe, go akaretša le manaba a gagwe gomme a ba topollo ya lefase. E be e le tiro e phethagetšego.”—Mohandas K. Gandhi, moetapele wa dipolitiki le wa bodumedi wa India.

“Ge ke be ke sa le ngwana ke ile ka rutwa ka Beibele le Talmud. Ke Mojuda, eupša ke kgahlwa ke semelo se sebotse kudu sa Monatsaretha.”—Albert Einstein, rathutamahlale yo a belegetšwego Jeremane.

“Go ya ka nna Jesu Kriste ke motho yo a kgahlišago kudu yo a kilego a phela historing ka moka, bobedi bjalo ka Morwa wa Modimo le Morwa wa Motho. Dilo ka moka tšeo a kilego A di bolela le go di dira di na le mohola go rena lehono gomme seo ke selo seo o ka se kego wa se bolela ka motho le ge e le ofe yo mongwe, yo a phelago goba yo a hwilego.”—Sho·lem Asch, mongwadi yo a belegetšwego Poland bjalo ka ge a tsopotšwe ka go Christian Herald; mongwalo o sekamego ke wa bona.

“Ke be ke le motho yo a sa dumelego bodumeding le dipolitiking ka nywaga e 35. Nywageng e mehlano e fetilego ke ile ka kgodišega gore Jesu e be e le motho wa kgonthe. Ke ile ka dumela thutong ya Jesu Kriste gomme bophelo bja-ka ka moka bja fetoga go sa letelwa.”—Count Leo Tolstoy, mongwadi le radifilosofi wa Morussia.

“[Jesu] ke motho yo a nago le tutuetšo e kgolo kudu yo a kilego a phela mo polaneteng ye gomme tutuetšo yeo e tšwela pele go gola.”—Kenneth Scott Latourette, radihistori le mongwadi wa Moamerika.

“Na re ka bolela gore histori ya Diebangedi ke selo sa boikgopolelo? Ruri ke a go botša, ga go bonale e le selo sa boikgopolelo. Go fapana le moo, histori ya Socrates yeo go sego motho yo a e belaelago, ga se ya ka ya kgonthišetšwa kudu go feta ya Jesu Kriste.”—Jean-Jacques Rousseau, radifilosofi wa Mofora.

Go molaleng gore ge e ba go e-na le motho le ge e le ofe yo a swanelwago ke go ba mohlala wa rena, ke Jesu Kriste. Paulo, e lego monna yo a rutegilego wa lekgolong la pele la nywaga yo a kgethilwego ke Jesu go ba molatedi wa Gagwe le go bolela ka Yena go ditšhaba, o re kgothaletša go ‘tsepelela’ Jesu. (Baheberu 12:2; Ditiro 9:3) Ke’ng seo Jesu a ka re rutago sona mabapi le tsela ya go phela? Bophelo bja gagwe bo ka go hola bjang?