NA O fela o boifa?— * Bontši bja rena re a boifa ka dinako tše dingwe. O ka dira’ng ge e ba o boifa?— O ka tšhabela go motho yo mogolo le yo matla go go feta. Mohlomongwe tatago goba mmago a ka go thuša. Re ka ithuta mo gontši go Dafida mabapi le moo re ka tšhabelago gona bakeng sa thušo. O opeletše Modimo ka gore: “Ke botile Wêna. ... Xe Modimo à na le nna, ke a holofêla, xa ke šie.”—Psalme 56:3, 4.

O nagana gore Dafida o ithutile go se boife go mang? Na ke go batswadi ba gagwe?— Ga go pelaelo gore go bjalo. Tatagwe e lego Isai e be e le rakgolo-khukhu yo a botegago wa Jesu Kriste, “Kxoši ya kaxišô” yeo Modimo a e holofeditšego. (Jesaya 9:5; 11:1-3, 10) Tatago Isai—rakgolo wa Dafida—e be e le Obede. Go na le puku ya Beibele yeo e reeletšwego ka mmago Obede. Na o tseba leina la gagwe?— Ke Ruthe, mosadi yo a botegago yoo monna wa gagwe e bego e le Boase.—Ruthe 4:21, 22.

Ke therešo gore Ruthe le Boase ba hwile nako e telele pele Dafida a belegwa. Go ka direga gore o tseba leina la mmago Boase, makgolo-khukhu wa Dafida. O be a dula Jeriko gomme o ile a thuša go phološa dihlodi tša Baisiraele. Ge merako ya Jeriko e phušoga, o ile a dira gore ba lapa labo ba šireletšwe ka go lekeletša thapo e khwibidu lefasetereng la gagwe. Leina la gagwe ke mang?— Ke Rahaba, yo a ilego a fetoga morapedi wa Jehofa gomme ke mohlala wa go bontšha sebete wo Bakriste ba swanetšego go o ekiša.—Jošua 2:1-21; 6:22-25; Baheberu 11:30, 31.

Re ka kgodišega gore batswadi ba Dafida ba mo rutile dilo tšohle ka bahlanka bao ba botegago ba Jehofa ka gobane batswadi ba be ba laetšwe go ruta bana ba bona dilo tše bjalo. (Doiteronomio 6:4-9) Nako e ile ya fihla ya gore moprofeta wa Modimo e lego Samuele a laelwe go kgetha Dafida, morwa wa mafelelo wa Isai, go ba kgoši ya ka moso ya Isiraele.—1 Samuele 16:4-13.

Ka letšatši le lengwe, Isai o romela Dafida go išetša barwarragwe ba bararo dijo ge ba e-lwa le manaba a Modimo e lego Bafilisita. Ge Dafida a fihla, o kitimela madireng a Isiraele gomme o kwa Goliata wa senatla a roga “dirá tša Modimo a phelaxo.” Madira ka moka a boifa go lwa le Goliata. Eupša ge Saulo a bona Dafida o re: “Wêna O sa le lesoxanyana.”

Dafida o hlalosetša Saulo gore o bolaile tau le bere tšeo di bego di leka go bolaya dinku tša gabo. Dafida o re Goliata ‘o tlo dirwa ka mokgwa woo le yena.’ Saulo o fetola ka gore: “Sepela; Morêna a êmê le wêna.” Dafida o hwetša mafsika a mahlano a boreledi, o a tsenya ka mokotleng wa gagwe wa go diša gomme o tšea seraga-mabje sa gagwe o ya go lwa le senatla. Ge Goliata a bona mošemanyana a e-tla o goeletša ka gore: “Batamêla! Nama ya xaxo ke tlo e lahlêla manong.” Dafida o araba ka gore: “Ke tlile fá ka ’ina la Morêna” gomme o goeletša ka gore: ‘Ke tlo go bolaya ka go kgaola hlogo.’

Ke moka Dafida o kitimela go Goliata, o ntšha lefsika ka mokotleng wa gagwe le go le tsenya ka seraga-mabjeng gomme o le fošetša ka go lebanya phatleng ya Goliata. Ge Bafilisita ba bona gore senatla se hwile, ba tšhoga kudu gomme ba a tšhaba. Baisiraele ba a ba kitimiša gomme ba fenya ntwa. Hle bala pego ye ka moka go 1 Samuele 17:12-54 o e-na le ba lapa leno.

Bjalo ka mofsa, ka dinako tše dingwe o ka boifa go latela ditaelo tša Modimo. Jeremia e be e le mofsa gomme mathomong o be a boifa, eupša Modimo o mmoditše gore: “Se boifê . . . Nna ke tlo ba le wêna.” Jeremia o ile a ba sebete gomme a bolela ka Modimo go etša ge Modimo a mo laetše go dira bjalo. Go etša Dafida le Jeremia, ge e ba o bota Jehofa, le wena o ka ithuta go se boife.—Jeremia 1:6-8.