NA O nagana gore go thata go dira se se nepagetšego? *— Ge e ba o re ee, batho ba bantši ba ka dumelelana le wena. Gaešita le batho ba bagolo ba hwetša go le thata go dira seo ba tsebago gore se nepagetše. Anke re boneng lebaka leo ka lona go bego go le thata go Josia ka mo go kgethegilego gore a dire dikgetho tše di nepagetšego. Na o a tseba gore Josia e be e le mang?—

Josia e be e le morwa wa Amoni kgoši ya Juda, yo a bego a e-na le nywaga e 16 ge Josia a belegwa. Amoni e be e le motho yo mobe kudu go etša ge tatagwe, Kgoši Manase, a be a le bjalo. Ge e le gabotse, Manase e bile mmuši yo kgopo kudu ka nywaga e mentši. Lega go le bjalo, o ile a thopša ke Maasiria gomme a mo dira mogolegwa kua Babilona yeo e bego e le kgole kudu. Ge a be a le kgolegong, Manase o ile a lopa Jehofa gore a mo lebalele gomme Jehofa o ile a dira bjalo.

Ge Manase a lokollwa, o ile a boela Jerusalema gomme a buša gape e le kgoši. Gatee-tee o ile a lokiša dilo tše mpe tšeo a bego a di dirile gomme a thuša batho gore ba hlankele Jehofa. O swanetše go ba a ile a nyama ge morwa wa gagwe Amoni a be a sa latele mohlala wa gagwe o mobotse. Josia o belegwe mo e ka bago ka yona nako yeo. Beibele ga e bolele gore Manase o feditše nako e kaakang le setlogolo sa gagwe e lego Josia. Eupša na o nagana gore Manase a ka ba a ile a leka go mo thuša go hlankela Jehofa?—

Ge Josia a be a e-na le nywaga e tshela feela, Manase o ile a hwa gomme tatago Josia e lego Amoni, o ile a ba kgoši. Amoni o bušitše ka nywaga e mebedi feela pele bahlanka ba gagwe ba mmolaya. Ka gona, Josia o ile a ba kgoši ya Juda a e-na le nywaga e seswai feela. (2 Koronika kgaolo 33) O nagana gore ke eng seo se ilego sa direga ka nako yeo? Na Josia o ile a kgetha go latela mohlala o mobe wa tatagwe e lego Amoni goba mohlala o mobotse wa rakgolo’agwe yo a itshotšego e lego Manase?—

Gaešita le ge Josia e be e le yo monyenyane, o be a tseba gore o nyaka go hlankela Jehofa. Ka gona, o ile a theetša bao ba bego ba rata Jehofa go e na le bao e bego e le bagwera ba tatagwe. Josia o be a e-na le nywaga e seswai feela, eupša o be a  tseba gore ke mo go swanetšego go theetša batho bao ba ratago Modimo. (2 Koronika 34:1, 2) Na o ka rata go tseba ka bao ba ilego ba eletša Josia gomme ba mmeela mohlala o mobotse?—

Josia o ile a tutuetšwa ke moporofeta Tsefanya. Tsefanya o be a tswalana le Josia ka gobane go ka direga gore e be e le setlogolo sa tatago Manase, kgoši e botse e lego Hiskia. Mathomong a pušo ya Josia, Tsefanya o ile a ngwala puku ya Beibele yeo e bitšwago ka leina la gagwe. Tsefanya o ile a lemoša ka dilo tše mpe tšeo di bego di tla diragalela bao ba ba sa kago ba kgetha go dira se nepagetšego gomme go molaleng gore Josia o ile a theetša ditemošo tšeo.

Yo mongwe yo a tutueditšego Josia ke Jeremia, yoo go ka diregago gore o ile wa kwa ka yena. Jeremia le Josia e be e le masogana gomme ba gotše ba dula kgaufsi le kgaufsi. Jehofa o ile a budulela Jeremia go ngwala puku ya Beibele yeo e bitšwago ka leina la gagwe. Ge Josia a e-hwa ntweng, Jeremia o ile a ngwala koša e kgethegilego go bontšha gore o nyamile kudu. (2 Koronika 35:25) Re ka akanya feela kamoo ba swanetšego go ba ba ile ba kgothaletšana go dula ba botegela Jehofa!

O nagana gore go ithuta ka Josia go ka go hola ka’ng?— Ge e ba go swana le yena o se na tate yo a hlankelago Jehofa, na go na le motho yo mongwe yo a ka go thušago go ithuta ka Modimo? Mohlomongwe motho yoo ke mmago, makgolo’ago, rakgolo’ago goba yo mongwe wa leloko. Mohlomongwe ke motho yo mongwe yo a hlankelago Jehofa, motho yoo mmago a ka go dumelelago go ithuta Beibele le yena.

Go sa šetšwe gore o thušitšwe ke eng, Josia o be a godile ka mo go lekanego go ka tseba gore o swanetše go gwerana le batho bao ba hlankelago Jehofa, gaešita le ge e be e sa le ngwana. Eka le wena o ka dira se swanago gomme wa kgetha go dira se se nepagetšego.