Bahlaselwa ba Ledimo Kua Myanmar ba Hweditše Tlhakodišo

KA May 2, 2008, Ledimo leo le bitšwago Nargis le ile la hlasela naga ya Myanmar ka diphefo tše senyago kudu gomme gatee-tee taba yeo e ile ya begwa lefaseng ka bophara. * Go ile gwa begwa gore batho ba ka bago 140 000 ba hwile goba ba timetše ka morago ga gore meetse a mantši a khupetše tikologo ya Irrawaddy Delta.

Se se makatšago ke gore ga go le o tee wa Dihlatse tše dintši tša Jehofa lefelong leo yo a gobetšego. Lebaka le legolo leo le dirilego gore di phologe ke gore di ile tša tšhabela Diholong tša tšona tša Mmušo tšeo di agilwego gabotse. Lefelong le lengwe, Dihlatse tše 20 le badudi ba 80 ba motsaneng woo ba ile ba dula marulelong a Holo ya Mmušo ka diiri tše senyane ge meetse a dutše a phagama go fihla dimithareng tše e ka bago tše hlano. Ka moka ba ile ba phologa. Ka manyami, ba bangwe ba 300 motsaneng woo ba ile ba hwa. Metsaneng e mentši, meago yeo e bego e se ya phušoga e be e le Diholo tša Mmušo feela.

Matšatši a mabedi ka morago ga ledimo, ofisi ya lekala ya Dihlatse tša Jehofa ya kua Yangon e ile ya romela sehlopha sa tlhakodišo phuthegong ya kua Bothingone yeo e lego moo noka e thomago gona. Sehlopha seo se ile sa feta tikologong yeo e sentšwego ke ledimo, sa phema bahlakodi, sa feta le ditopo tšeo di bego di thomile go bola gomme sa fihla Bothingone se rwele reisi, di-noodle tše di omišitšwego, meetse le dikerese. E bile sehlopha sa pele sa tlhakodišo go fihla tikologong yeo. Ka morago ga go nea Dihlatse tša lefelong le dijo, sehlopha se se ile sa nea dipolelo tše di theilwego Beibeleng bakeng sa go di kgothatša gomme sa di nea Dibeibele le dikgatišo tše di theilwego Beibeleng ka ge dithoto tša tšona ka moka di be di tšerwe ke ledimo.

Tsela yeo Dihlatse tše di hlasetšwego ke  ledimo di ilego tša itshwara ka yona e be e kgahliša e le ka kgonthe. Hlatse e nngwe e tšwago phuthegong ya tikologong ya Irrawaddy yeo e sentšwego ke ledimo e itše: “Dithoto tša rena ka moka di tšerwe ke ledimo. Dintlo tša rena ka moka di senyegile. Dibjalo tša rena ka moka di hwile. Meetse a nwewago ka moka a šilafetše ka baka la mafula. Lega go le bjalo, bana babo rena le dikgaetšedi ga ba tshwenyege go swana le batho ba bangwe. Ba bota Jehofa le mokgatlo wa gagwe. Re tla latela ditaelo le ge e le dife tšeo re di newago, go sa šetšwe gore ke tša gore re dule motsaneng wa gabo rena goba re hudugele lefelong le lengwe.”

Sehlopha sa Dihlatse tše 30, seo le sona se lobilego dilo ka moka, se ile sa opela dikopelo tša Mmušo ka lethabo leetong la sona la diiri tše lesome la go ya moo dihlopha tša tlhakodišo di bego di se lokišeditše dijo, diaparo le madulo. Pele se fihla moo se yago gona, se ile sa kwa gore go be go swerwe kopano ya tikologo ya Dihlatse tša Jehofa toropong ya kgaufsi. Se ile sa phetha ka go ya kopanong yeo pele bakeng sa go hwetša dijo tša moya le go thabela segwera le Bakriste-gotee.

Go dikologa lefelong leo le hlasetšwego ke ledimo, dintlo tše 35 tša Dihlatse di be di senyegile, tše 125 di senyegile ganyenyane feela gomme Diholo tša Mmušo tše 8 le tšona di senyegile ganyenyane. Seo se lebogegago ke gore meago ya lekala ga se ya kgomega kudu.

Mathomong, ledimo le ile la dira gore go be thata gore batho ba tsene goba go tšwa ofising ya lekala ka gobane dihlare tše dikgolo di be di wele gomme di thibile ditsela tša kgaufsi le moo. Diiri tše sego kae feela ka morago ga ge ledimo le fetile, ditho tše fetago 30 tšeo di šomago lekaleng di ile tša thuša go tloša dihlare tšeo ka matsogo. Ge di dutše di šoma, batho ba be ba di lebeletše ka go makala. Go se go ye kae, sehlopha sa basadi sa Dihlatse se ile sa tlišetša bašomi le baagišani bao dino tše di tonyago le dienywa, gomme ba ile ba se dumele seo ba se bonago. Ge mmegi wa ditaba a bona seo se diregago, o ile a botšiša gore, “Batho ba bao ba šomago ka mafolofolo gakaakaa ke bomang?” Ka morago ga go botšwa gore ke bomang, o ile a re, “Ke duma eka batho bantši ba ka bontšha moya wo wa go rata baagišani e le ka kgonthe go swana le Dihlatse tša Jehofa!”

Gatee-tee Dihlatse di ile tša thea dikomiti tše pedi tša tlhakodišo dikarolong tše di aroganego tša naga e le gore di thuše bana babo tšona. Baithapi ba makgolo ba ile ba šoma dihlopheng tša tlhakodišo. Ka morago ga matšatši a sego kae, Dihlatse tšeo di lahlegetšwego ke magae a tšona di ile tša agelwa dintlo tše difsa. Ge se sengwe sa dihlopha tša tlhakodišo se e-tla go tlo agela Hlatse ntlo e mpsha, baagišani ba yona ba ile ba bogela seo se diregago ba maketše. Moagišani yo mongwe wa yona o itše: “Kereke ya mosadi yo wa Hlatse e mo agela ntlo e mpsha. Ga go le o tee wa bagwera ba-ka ba Mabuddha yo a tlilego go tlo nthuša. Ke duma eka nkabe ke ile ka fetoga Hlatse nakong ya ge a be a bolela le nna ka Beibele!”

Ge bašomi ba tša kago le komiti ya tlhakodišo ba be ba lekola ntlo e nngwe yeo e bego e bonagala e sentšwe ka mo go feletšego kua Thanlyn, ba ile ba kgomega pelo kudu ge lapa leo la Dihlatse le ba botša gore: “Ga go seo se diregilego. Ntlo ya rena ga se ya senyega. Re ka kgona go dula ka gare ga yona—le se ke la tshwenyega! Dihlatse tše dingwe ga di na dintlo. E-yang le ye go di thuša!”

Lefelong le lengwe kua Yangon, batho ba bangwe ba ile ba leka go tšhabela ka go e nngwe ya dikereke tša lefelong leo. Lega go le bjalo, lebati la kereke le be le notletšwe gomme go be go se yo a ka kgonago go tsena. Batho ba ile ba galefa kudu gomme ba be ba nyaka go roba lebati la kereke. Ka mo go fapanego, Dihlatse tša Jehofa di ile tša thuša batho ba bantši go tšhabela ka Diholong tša Mmušo nakong ya ledimo. Ka mohlala, Holong ya Mmušo kua Dala, banyalani ba Dihlatse ba ile ba amogela baagišani ba 20 bao ba bego ba tšhabetše moo gore ba hwetše tšhireletšego. Mesong, ba malapa ao ba be ba se na magae ao ba ka boelago go ona gomme ba be ba swerwe ke tlala. Monna yo a dulago moo o ile a hwetša motho yo a rekišago reise gomme a reka e lekanego go ka fepa batho bao ka moka.

Ditho tše itšego tša lapa le lengwe kua Yangon ke Dihlatse tša Jehofa mola ditho tše dingwe  tšona di tsena dikereke tše di fapa-fapanego. Ka morago ga ledimo, lapa ka moka le ile la tla dibokeng Holong ya Mmušo. Ka baka la’ng? Setho se sengwe sa lapa se hlalositše gore: “Batho ba kereke ya rena ba itše ba tla re etela ka morago ga ledimo eupša ga se ba ka ba tla. Ke Dihlatse feela tšeo di ilego tša tla. Le ile la re nea reise le meetse. Ga le swane le dikereke tše dingwe!” Ditho tša lapa le tšeo e sego Dihlatse di ile tša thabela poledišano ya sehlogo sa Morokami se se rego “Jehofa o a kwa ge re Llela Thušo” gomme di ile tša nea ditlhaloso tše dintši nakong ya thuto.

Mosadi yo mongwe yo a bego a ithuta Beibele le Dihlatse o ile a tla dibokeng tša phuthego ka morago ga ledimo. Ge diboka di tšwela pele, go ile gwa balwa lengwalo le le tšwago ofising ya lekala leo le hlalosago seo se dirilwego go thuša batho gomme le anega dilo tšeo di diragaletšego bao ba phologilego ledimo. Ge lengwalo leo le dutše le balwa, mosadi yoo o ile a thoma go lla. O be a maketše kudu e bile a thabetše go kwa gore Dihlatse ka moka di hweditšwe e bile di phetše gabotse. Ka morago ga moo, o ile a newa dilo tša tlhakodišo gomme a hlomelwa tente kgaufsi le ntlo ya gagwe. O itše o ikwetše ka noši gore Dihlatse di be di tloga di mo hlokometše gabotse.

Jesu o itše: “Bohle ba tla tseba ka se gore le barutiwa ba-ka, ge e ba le ratana.” (Johane 13:35) Morutiwa Jakobo le yena o gateletše gore tumelo ya kgonthe e sepedišana le mediro e mebotse. (Jakobo 2:14-17) Dihlatse tša Jehofa di tšeela mantšu ao godimo kudu gomme di katanela go bontšha lerato le bjalo ka go thuša le go thekga bao ba nyakago thušo.

[Mongwalo wa tlase]

[Ntlhakgolo go letlakala 11]

Beibele e re tumelo ya kgonthe e sepedišana le mediro e mebotse