“Ditlaišêxô tša Bôná ke a di Tseba”
Batamela Kgaufsi le Modimo
“Ditlaišêxô tša Bôná ke a di Tseba”
“MOKXÊTHWA, Mokxêthwa, ké Morêna.” (Jesaya 6:3) Mantšu ao a buduletšwego a bontšha gore Jehofa Modimo o hlwekile e bile o sekile ka tekanyo e phagamego kudu. O ka botšiša gore, ‘Na go ba ga gagwe yo mokgethwa go dira gore a se be le taba le rena goba a se batamelege? Na ruri Modimo yo mokgethwa ka tsela yeo a ka ba le taba le nna—ke le modiradibe yo a sa phethagalago?’ Anke re ahla-ahleng mantšu a kgodišago ao Modimo a a boditšego Moše, go etša ge a ngwadilwe go Ekisodo 3:1-10.
Ka letšatši le lengwe ge Moše a dišitše dinku, o ile a bona selo seo se sa tlwaelegago le gatee—sehlare sa meetlwa se tuka mollo eupša “sè sa fse.” (Temana 2) Ka ge a be a rata go tseba lebaka la se, o ile a batamela sehlare seo e le gore a se lekodišiše. A diriša morongwa, Jehofa a le gare ga mollo o ile a bolela le Moše a re: “Se batamêlê mó! Rola diêta ’naong tša xaxo, ka xobane felô fá O emexo xôna ké naxa e kxêthwa.” (Temana 5) Akanya feela—ka ge sehlare seo se be se emela go ba gona ga Modimo yo mokgethwa, lefelo leo ka bolona le ile la fetoga le lekgethwa!
Modimo yo mokgethwa o be a e-na le lebaka la go bolela le Moše. Modimo o itše: “Mahloko a sethšaba sa-ka se se lexo kwa Egipita ke a bone; ke ba kwile xe ba xôlôla ka ’baka la baxapeletši ba bôná; ruri, ditlaišêxô tša bôná ke a di tseba.” (Temana 7) Modimo o be a sa hlokomologe tlaišego ya batho ba gagwe; le gona o be a sa hlokomologe dikgopelo tša bona. Go e na le moo, o ile a kwa bohloko bjo ba bego ba bo kwa. Ela hloko gore Modimo o itše: “Ditlaišêxô tša bôná ke a di tseba.” Mabapi le mantšu a rego “ke a di tseba,” puku e nngwe e re: “Mantšu a a fetiša maikwelo a lešoko, lerato le kwelobohloko.” Mantšu ao Jehofa a a boditšego Moše a utolla gore ke Modimo yo a tlogago a tshwenyegile le yo a nago le lerato.
Modimo o be a tla dira’ng? Ga se a ka a fo ba lebelela ka lešoko goba go ba theetša ka kwelobohloko. O ile a tutueletšega go tšea kgato. O ile a rera go hlakodiša batho ba gagwe nageng ya Egipita le go ba iša “naxeng . . . ye e êlaxo mafsi le nose.” (Temana 8) Go phethagatša seo, Jehofa o ile a laela Moše gore: “[Ntšha] sethšaba sa-ka sa Ba-Isiraele mo naxeng ya Egipita.” (Temana 10) Ka go botegela taelo yeo, Moše o ile a ntšha Baisiraele nageng ya Egipita ka 1513 B.C.E.
Jehofa ga se a fetoga. Barapedi ba gagwe lehono ba ka kgonthišega gore o bona ditlaišego tša bona le go kwa dillo tša bona tša go nyaka thušo. O tseba gabotse mahloko ao ba a kwago. Eupša Jehofa ga a fo kwela bahlanka ba gagwe ba ineetšego bohloko. Modimo yo a nago le lerato o tutueletšega go ba thuša “gobane o a [ba] hlokomela.”—1 Petro 5:7.
Kwelobohloko ya Modimo e re nea lebaka la go ba le kholofelo. Ka thušo ya gagwe, rena batho ba sa phethagalago re ka fihlelela tekanyo e itšego ya bokgethwa gomme ra amogelega go yena. (1 Petro 1:15, 16) Mosadi yo mongwe wa Mokriste yo a bego a tshwenywa ke kgateletšo ya monagano le go nyama o ile a homotšwa ke pego ya seo se diragaletšego Moše sethokgweng sa meetlwa. O re: “Ge e ba Jehofa a kgona go dira gore naga e be e kgethwa, mohlomongwe go na le kholofelo ya gore ke tla amogelega go yena. Kgopolo ye e nthušitše kudu.”
Na o tutueletšega go ithuta mo go oketšegilego ka Modimo yo mokgethwa, Jehofa? Go a kgonega gore re be le tswalano ya kgaufsi le yena, ka gobane Jehofa “ó tseba lebopô le re lexo ka lôna, xa a lebale xe re le lerole.”—Psalme 103:14.