“E be e se Nako ya Gore ke hwe”

Mootledi wa lori e kgolo ya go rwala ditlakala o ile a lahlegelwa ke taolo. Lori yeo e ile ya tšwa tseleng gomme ya fetela tsejaneng ya basepela-ka-dinao moo e ilego ya thula monna le mosadi wa gagwe gotee le lesogana la nywaga e 23. Go ya ka pego ya kuranta ya New York City, banyalani bao ba hwile le semeetseng gomme lesogana leo le ile la idibala. Ge le tsoga gomme le bona seo se diregilego, selo sa pele seo le ilego la se nagana e bile gore: ‘Ga ke dumele seo mahlo a-ka a mpontšhago sona. Modimo, hle mphološe kotsing ye.’ Le ile la re: “E be e se nako ya gore ke hwe.”

GO KA direga gore o ile wa kwa dipego tše bjalo ka ye. Ge motho a phologa kotsi ka lešobana la nalete, batho ba re, ‘E be e se nako ya gore a hwe,’ eupša ge a e-hwa kotsing yeo e sa tlwaelegago ba phetha ka gore, ‘Nako ya gagwe e fihlile’ goba ‘Ke thato ya Modimo.’ Go sa šetšwe gore ba bolela gore motho o phologa maemong a bjalo ka gobane go rerilwe e sa le pele gore o tla phologa, gore o phologile ka mahlatse goba gore o phološitšwe ke Modimo, ge e le gabotse ba dumela selo se se swanago. Batho ba bantši ba dumela gore dilo tšeo di ba diragalelago bophelong le ditla-morago tša tšona di rerilwe e sa le pele gomme ga go na seo ba ka se dirago. Batho ga ba arabele ka tsela ye ge ba lebeletšane le lehu goba ge go diregile kotsi feela; le gona tsela ye ya go lebelela dilo ga e thome mehleng ya lehono.

Ka mohlala, Bababilona ba bogologolo ba be ba dumela gore tsela yeo batho ba phelago ka yona e tutuetšwa ke dinaledi le mosepelo wa tšona. Ka baka leo, ba be ba tsoma tlhahlo maswaong le dipontšhong tšeo di lego lefaufaung. Bagerika le Baroma ba be ba rapela medimogadi ya dilo tšeo di rerilwego e sa le pele yeo ka dinako tše dingwe go bego go bonala eka matla a yona a go tlišetša batho mahlatse goba madimabe a phagametše gaešita le a medimo ya bona e megolo e lego Zeus le Jupiter.

Kua Bohlabela, Mahindu le Mabudda a dumela gore dilo tšeo di diragalelago motho gona bjale ke ditla-morago tša seo a se dirilego nakong ya bophelo bjo bo fetilego le gore mediro ya gagwe ya gona bjale e tla laola seo se tlago go mo diragalela nakong e tlago. Madumedi a mangwe—go akaretša le dikereke tše dintši tša Bojakane—le ona a amogela ditumelo tše bjalo ka go ruta gore dilo ka moka di rerilwe e sa le pele.

Ka baka leo, ga go makatše gore gaešita le mehleng ye yeo go thwego batho ba thea ditumelo le dikgopolo tša bona mabakeng a kwagalago, batho ba bantši ba sa dutše ba dumela gore maemo a bona bophelong, ditla-morago tša mediro ya bona ya letšatši le letšatši le seo se tlago go ba diragalela mafelelong di rerilwe e sa le pele le gore ga go na seo ba ka se dirago. Na ke kamoo o ikwago ka gona ka bophelo? Na ruri dilo tšeo di diregago bophelong, go atlega le go palelwa ga batho—gaešita le go belegwa le go hwa—di rerilwe e sa le pele? Na bophelo bja gago bo laolwa ke dilo tšeo di rerilwego e sa le pele? Anke re boneng kamoo Beibele e ka re thušago ka gona go araba dipotšišo tše.

[Mothopo wa Seswantšho go letlakala 3]

Ken Murray/New York Daily News