Babadi ba Rena ba a Botšiša

Na Modimo o Tšea Bana Gore ba Fetoge Barongwa Legodimong?

Ge ngwana a e-hwa, bagwera ba lapa leo le hwetšwego ba ka leka go homotša ba lapa ka gore, “Modimo o swanetše go ba a be a nyaka morongwa yo mongwe legodimong.” Na se se kwagala e le sa tlhaologanyo go wena?

Ge e ba e be e le therešo gore Modimo o bakela bana gore ba hwe ka gobane a nyaka barongwa ba oketšegilego legodimong, se se be se tla bolela gore ga a na kwelobohloko le gore ke yo sehlogo. Beibele e bolela se se fapanego. (Jobo 34:10) Tate yo lerato a ka se phamole ngwana go batswadi ba gagwe e le feela gore a oketše palo ya lapa la gagwe. Le gona, ga go na motswadi wa motho yo a nago le kwelobohloko go feta Jehofa, yo seka sa gagwe se segolo e lego lerato. (1 Johane 4:8) Lerato la gagwe le legolo le ka mohla le ka se mo dumelele gore a dire dilo ka tsela e bjalo e sehlogo.

Ipotšiše, ‘Na Modimo o nyaka barongwa ba ba oketšegilego legodimong?’ Beibele e bolela gore mediro ka moka ya Modimo e lokile e bile e phethagetše. (Doiteronomio 32:4) Modiro wa gagwe wa go bopa ka go lebanya dimilione tša barongwa e bile modiro o phethagetšego gomme go be go se se se hlaelago. (Daniele 7:10) Na go ka direga gore Modimo ga se a bala gabotse palo ya barongwa bao a bego a ba nyaka? Le gatee! Ruri, Modimo Yo matla-ohle a ka se dire phošo ya mohuta wo. Ke therešo gore Jehofa o kgethile batho ba itšego gore e be dibopiwa tša moya e le karolo ya Mmušo wa gagwe wa legodimong, eupša ba e ba e se bana ba banyenyane nakong ya ge ba e-hwa.—Kutollo 5:9, 10.

Lebaka le lengwe leo ka lona Modimo a ka se tšeego bana lefaseng go ba dira barongwa legodimong ke gore se se be se ka se dumelelane le morero wa gagwe wa mathomong mabapi le bana. Tšhemong ya Edene, Modimo o boditše Adama le Efa gore: “Tswalang Le atê, tlalang lefase, Le le fenyê.” (Genesi 1:28) Bana ke dimpho tše tšwago go Modimo gomme ke ba bohlokwa morerong wa gagwe wa mathomong wa go tlatša lefase ka lapa la batho ba ba lokilego. O be a se a rera gore bana ba hwe gomme ka morago ba fetošwe dibopiwa tša moya. Beibele e hlalosa gabotse gore bana ke “neô ya Morêna.” (Psalme 127:3) Na Jehofa, Modimo yo lerato a ka amoga batswadi mpho yeo a ba neilego yona? Le gatee!

Lehu leo le sa letelwago la ngwana le tliša manyami le bohloko. Ka gona, ke kholofelo efe yeo batswadi bao ba hwetšwego ba nago le yona? Beibele e holofetša gore Modimo o tla tsoša ba dimilione-milione paradeiseng gona mo lefaseng. Akanya ka bana ba tsošitšwego ba e-na le mebele e phetšego gabotse, ba kopana gape le baratiwa ba bona. (Johane 5:28, 29) Ke thato ya Modimo gore bana ba gole, ba thabele bophelo le go ithuta ka yena le ka morero wa gagwe ka lefase. Ka go rialo, bana bao ba hwilego ga se barongwa legodimong eupša ba letetše tsogo ya go tsogela lefaseng la paradeise. Ka nako yeo, ba banyenyane le ba bagolo ba tla thabela go rapela Jehofa Modimo ka mo go sa felego, ka tlase ga tlhokomelo e lerato ya Mmopi wa rena.