Selo se Sengwe le se Sengwe se na le Nako ya Sona

Beibele e re: “Tšohle di na le mohla wa tšôna, le ’tirwa tša ka tlase xa letšatši di na le mabaka a tšôna.” Mongwadi wa mantšu ao, Kgoši e bohlale ya bogologolo e lego Solomone, o tšwetše pele ka gore go na le nako ya go tswalwa le nako ya go hwa, nako ya go aga le nako ya go phušola gotee le nako ya go rata le nako ya go hloya. Mafelelong o itše: “Modiri ó holêxa’ng ka xo itapiša?”—Mmoledi 3:1-9.

KA MORAGO ga go bala mantšu ao, batho ba bangwe ba phetha ka gore ka kgonthe Beibele e ruta gore go na le nako e beilwego bakeng sa dilo ka moka; ka mantšu a mangwe, ba nagana gore Beibele e thekga tumelo ya gore dilo ka moka di rerilwe e sa le pele. Na ruri go bjalo? Na Beibele e thekga kgopolo ya gore dilo ka moka bophelong di rerilwe e sa le pele? Ka ge “Lengwalo ka moka le buduletšwe ke Modimo,” seo re se balago karolong e nngwe ya Beibele se swanetše go dumelelana le seo re se hwetšago karolong e nngwe ya yona. Ka gona, anke re boneng seo Lentšu la Modimo e lego Beibele le se bolelago mabapi le taba ye.—2 Timotheo 3:16.

Nako le Ditiragalo Tšeo di sa Letelwago

Pukung ya Mmoledi, Solomone o tšwetše pele go ngwala gore: “Ka buša ka bona ka tlase ga letšatši gore yo a nago le lebelo ga a thope sefoka lebelong, ba matla ga ba fenye ntweng, ba bohlale le bona ga ba na dijo, bao ba kwešišago le bona ga ba na mahumo le gore bao ba nago le tsebo ga ba ratwe.” Ka baka la’ng? O hlalositše gore: “Ka gobane nako le ditiragalo tšeo di sa letelwago di ba wela ka moka.”—Mmoledi 9:11, NW.

Go e na le go šišinya gore dilo ka moka bophelong di rerilwe e sa le pele, Solomone o be a bontšha gore batho ba ka se kgone go bolela e sa le pele ka mo go nepagetšego pheletšo ya mediro le ge e le efe yeo ba e dirago “ka gobane nako le ditiragalo tšeo di sa letelwago di ba wela ka moka.” Gantši motho o diragalelwa ke selo se itšego ka gobane a le lefelong le le nepagetšego ka nako e nepagetšego goba re ka re a le lefelong le le fošagetšego ka nako e fošagetšego.

Ka mohlala, nagana ka mantšu a rego: “Yo a  nago le lebelo ga a thope sefoka lebelong.” Mohlomongwe o ile wa kwa goba wa bala ka lebelo la basadi leo le tsebjago kudu eupša e le le sa tlwaelegago la dimithara tše 3 000 la di-Olympic tša 1984 tšeo di bego di swaretšwe kua Los Angeles, California, U.S.A. Bo-ramabelo ba babedi, yo mongwe a emetše Brithania gomme yo mongwe a emetše United States, ba be ba holofetše gore ba tla thopa mentlele wa gauta. Lega go le bjalo, ge ba šetše ba kitimile seripa sa lebelo leo ba ile ba thulana. Yo mongwe o ile a wa gomme a se sa kgona go tšwela pele ka lebelo; yo mongwe yena o ile a nyama kudu mo a ilego a swara maemo a bošupa.

Na go bile bjalo ka gobane go be go rerilwe e sa le pele? Ba bangwe ba ka bolela bjalo. Eupša ge e le gabotse ke go thulana—kotsi yeo go sego motho yo a ka bago a ile a e bona e sa le pele—mo go bakilego gore ba palelwe ke go thopa sefoka. Ka gona, na go thulana ga bona go be go rerilwe e sa le pele? Le gona mo ba bangwe ba ka bolela gore go bjalo. Lega go le bjalo, bagaši ba dipapadi ba itše kotsi yeo e diregile ka gobane bo-ramabelo ba ba babedi ba be ba lekana ka matla le ka lebelo e bile bobedi bja bona ba be ba nyaka go thopa sefoka. Bjalo ka ge Beibele e bolela, “nako le ditiragalo tšeo di sa letelwago di ba wela ka moka.” Go sa šetšwe gore motho o itokišitše gakaakang, ka mehla go na le maemo a itšego a sa letelwago ao a ka kgomago mafelelo a modiro wo motho a o dirago gomme seo ga se sa rerwa e sa le pele.

Bjale, Beibele e ra gore’ng ge e re: “Tšohle di na le mohla wa tšôna”? Na go na le selo le ge e le sefe seo re ka se dirago seo se tlago go kgoma mafelelo a bophelo bja rena—pheletšo ya rena?

Nako e Swanetšego Kudu Bakeng sa Modiro o Mongwe le o Mongwe

Go e na le go bolela ka go rerwa e sa le pele ga bophelo bja motho le ge e le ofe goba go hlalosa mafelelo a bophelo bja motho, mongwadi yo a buduletšwego wa Beibele o be a bolela ka morero wa Modimo le kamoo o tlago go kgoma batho ka gona. Re tseba seo bjang? Ge e le gabotse, se ke seo taba e dikologilego e re botšago sona. Ka morago ga go bolela ka dilo tše dintši tšeo di bonalago di e-na le “mohla wa tšôna,” Solomone o ngwadile gore: “Ke bone medirô ye Modimo a e neetšexo bana ba batho, xore ba itapišê ka yôna. Tšohle ó di dirile xore di kxahlê ka mohla wa tšôna.”—Mmoledi 3:10, 11.

Modimo o neile batho mediro goba dilo tše dintši tšeo ba ka di dirago—Solomone o lokeleditše tše mmalwa. Le gona, Modimo o re neile tokologo ya gore re ikgethele seo re nyakago go se  dira. Lega go le bjalo, bakeng sa modiro o mongwe le o mongwe go na le nako e swanetšego, gore go be le mafelelo a mabotse kudu. Ka mohlala, nagana ka mantšu a Solomone a rego “xo byala xo na le mohla wa xôna, le xo tomola xo na le mohla wa xôna,” ao a hwetšwago go Mmoledi 3:2. Balemi ba a tseba gore go na le nako e swanetšego ya go bjala semela se sengwe le se sengwe. Go thwe’ng ge e ba molemi a hlokomologa taba ye e bonolo gomme a bjala dimela ka nako goba sehla se fošagetšego? Ge e ba a sa hwetše puno e botse, na o swanetše go bolela gore go bile bjalo ka gobane go be go rerilwe e sa le pele, gaešita le ge a ile a šoma ka thata? Le gatee! O fo ba a se a bjala dimela tšeo ka nako e swanetšego. Molemi yo o be a tla atlega ge nkabe a ile a latela tshepedišo ya dilo ya tlhago yeo e theilwego ke Mmopi.

Ka gona, seo Modimo a se rerilego e sa le pele ga se pheletšo ya batho goba mafelelo a ditiragalo ka moka, eupša ke melao e itšego ya motheo yeo e laolago mediro ya batho go dumelelana le morero wa gagwe. E le gore batho ba thabele moputso wa maiteko a bona, ba swanetše go lemoga morero wa Modimo le nako ya gagwe gomme ba šome ka go dumelelana le tšona. Seo se rerilwego e sa le pele le seo se ka se kego sa fetoga ga se pheletšo ya batho, eupša ke seo Modimo a rerilego go se dira. Jehofa o ile a bolela a diriša moporofeta Jesaya gore: “Lentšu la-ka le le tšwaxo molomong wa-ka, le ka se boêle xo Nna lè le fêla; le tlo dira se nkxahlaxo, le tlo phêtha se ke le rometšexo sôna.”—Jesaya 55:11.

Ka gona, “Lentšu” la Modimo goba morero wa gagwe o boletšwego mabapi le lefase le bokamoso bja batho wo o tlago go ‘phethagala’ ke eng?

Go Kwešiša Nako ya Modimo

Solomone o re thušitše go hwetša karabo. Ka morago ga go bolela gore, “Tšohle [Modimo] ó di dirile xore di kxahlê ka mohla wa tšôna,” o tšwetše pele ka gore, “Le tša neng le neng ó di beile dipelong tša bôná. Fêla, tirô ye Yêna Modimo a e diraxo, mathômô le mafêlô a yôna, motho xa a e lemoxe.” Phetolelo ya Kgale e fetolela temana ye ka gore: “Le bosafelego o bo beile dipelong tša bona; fela motho ga a lemoge modiro o Modimo a o dirilego, mathomo le mafelelo a ona.”—Mmoledi 3:11.

Go ngwadilwe mo gontši ka temana ye. Eupša taba e lego molaleng ke gore ka moka ga rena, ka dipelong tša rena, re kile ra ipotšiša gore morero wa bophelo ke eng le gore pheletšo ya rena e tla ba efe. Go theoša le nywaga, batho ba thatafaletšwe ke go amogela gore bophelo bo akaretša feela go šoma ka thata medirong ya bona gomme mafelelong ba hwe. Rena batho re fapane kudu le dibopiwa ka moka ka gobane ga re nagane feela ka bophelo bja gona bjale eupša re nagana gape ka lehu le seo se tlago go direga ka morago ga lona. E bile re duma eka re ka phela ka mo go sa felego. Ka baka la’ng? Go etša ge lengwalo le le hlalosa, Modimo o ‘beile bosafelego ka dipelong tša batho.’

E le gore ba kgotsofatše kganyogo yeo, batho ba be ba dutše ba ipotšiša ge e ba go e-na le bophelo ka morago ga lehu. Ba bangwe ba phetha ka gore go na le selo seo se tšwelago pele se phela ka morago ga ge re hwile. Ba bangwe ba dumela gore re tla dula re tswalwa gape ka morago ga ge re hwile. Ba bangwe bona ba nagana gore dilo ka moka bophelong di rerilwe e sa le pele goba di laolwa ke Modimo le gore ga go na seo re ka se dirago ka taba yeo. Ka manyami, ga go le e tee ya  ditlhaloso tše yeo e ba kgotsofaditšego e le ka kgonthe. Go bjalo ka gobane Beibele e re ka maiteko a bona feela, ‘batho ba ka se lemoge mathomo le mafelelo a mediro ya Modimo.’

Ntwa ye e thata ya magareng ga kganyogo ya go nyaka go tseba le go palelwa ke go hwetša dikarabo e tshwentše batho bao ba naganago ka mo go tseneletšego le bo-radifilosofi go theoša le nywaga e mentši. Lega go le bjalo, ka ge Modimo a beile kganyogo yeo ka dipelong tša rena, na ga se ga tlhaologanyo go lebelela go yena gore a re nee seo se nyakegago e le gore re kgotsofatše kganyogo yeo? Ge e le gabotse, Beibele e bolela ka Jehofa gore: “O khupurolla ’atla sa xaxo, ’me ka moka tše di phelaxo O di horiša lethabô.” (Psalme 145:16) Ka go ithuta Lentšu la Modimo e lego Beibele, re ka hwetša ditlhaloso tšeo di kgotsofatšago tša mabapi le bophelo le lehu gotee le ka morero wa Modimo wa sa ruri ka lefase le batho.—Baefeso 3:11.

[Ntlhakgolo go letlakala 5]

“Yo a nago le lebelo ga a thope sefoka lebelong.” —Mmoledi 9:11, NW

[Ntlhakgolo go letlakala 6]

Ge e ba molemi a se a bjala dimela ka nako e swanetšego gomme a sa be le puno e botse, na o swanetše go bolela gore go bile bjalo ka gobane go be go rerilwe e sa le pele?

[Ntlhakgolo go letlakala 7]

Re nagana ka bophelo le lehu ka gobane Modimo o ‘beile bosafelego ka dipelong tša batho’