Ba Bangwe ba tla Buša, ba Bantši ba tla Holega

GA E sa le go tloga mehleng ya baapostola, Modimo o be a dutše a kgetha palo e lekanyeditšwego ya Bakriste ba botegago bathong gomme a ba amogela bjalo ka barwa. Batho ba bao ba amogelwago e le barwa ba fetoga ka mo go feletšego moo e lego gore Lentšu la Modimo le hlalosa phetogo yeo e le go tswalwa lefsa. Morero wa go tswalwa lefsa ke go lokišeletša bahlanka ba bjalo ba Modimo bao ba tswetšwego gape bakeng sa go ba babuši legodimong. (2 Timotheo 2:12) Gore e be babuši, ba tsošwa bahung gore ba yo phela legodimong. (Baroma 6:3-5) Ba le legodimong, “ba tla buša e le dikgoši godimo ga lefase” ba e-na le Kriste.—Kutollo 5:10; 11:15.

Lega go le bjalo, Lentšu la Modimo le bolela gore ba bangwe, ntle le bao ba tswetšwego lefsa, ba tla hwetša phološo ya ka mo go sa felego. Ka  Beibeleng (ka Mangwalong a Seheberu gotee le ka Mangwalong a Bakriste a Segerika), go bolelwa ka taba ya gore Modimo o rerile go phološa dihlopha tše pedi tša batho—sehlopha se senyenyane sa babuši bao ba phelago legodimong gotee le sehlopha se segolo sa balata ba phelago lefaseng. Ka mohlala, ela hloko seo moapostola Johane a se ngwaletšego badumedi-gotee bao ba tswetšwego lefsa. O boletše mabapi le Jesu gore: “Ke sehlabelo sa poelanyo bakeng sa dibe tša rena, fela e sego bakeng sa tša rena [sehlopha se senyenyane] feela, eupša le bakeng sa tša lefase ka moka [sehlopha se segolo].”—1 Johane 2:2.

Ka mo go swanago, moapostola Paulo o ngwadile gore: “Go letela ka go fagahla ga tlholo [sehlopha se segolo] go letetše go utollwa ga barwa ba Modimo [sehlopha se senyenyane].” (Baroma 8:19-21) Mantšu a a moapostola Johane le moapostola Paulo a swanetše go kwešišwa bjang? Ka tsela ye: Bao ba tswalwago gape ba tla ba karolo ya pušo ya legodimong. Ka morero ofe? Bakeng sa go tlo tlišetša batho ba dimilione mehola ya ka mo go sa felego, e lego balata ba Mmušo wa Modimo bao ba tla bego ba phela lefaseng. Ka baka leo, Jesu o rutile barutiwa ba gagwe go rapela ka gore: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.”—Mateo 6:10.

Therešo yona ye ya mabapi le go phološwa ga dihlopha tše pedi e hwetšwa gape ka Mangwalong a Seheberu. Ka mohlala, ela hloko seo Jehofa a se boditšego rakgolokhukhu wa Jesu e lego Aborahama: “Dithšaba ka moka tša lefase [sehlopha se segolo] di tlo šexofala ka peu ya xaxo [sehlopha se senyenyane].” (Genesi 22:18) Ee, ditšhaba ka moka di be di tla šegofala ka “peu” ya Aborahama.

“Peu” yeo ke mang? Ke Jesu Kriste gotee le bao ba tswalwago lefsa, e lego barwa bao ba amogetšwego ba Modimo. Moapostola Paulo o hlalosa ka gore: “Ge e ba le le ba Kriste ruri le peu ya Aborahama.” (Bagalatia 3:16, 29) Bjale ke ditšhegofatšo dife tšeo di tlelago ditšhaba ka moka ka “peu”? Ke tokelo ya go amogelwa ke Modimo le ya go phela ka mo go sa felego lefaseng la paradeise. Mopsalme Dafida o porofetile ka gore: “Baloki e ba beng ba naxa, ba dula mo xo yôna ka mehla le ka mehla.”—Psalme 37:29; Jesaya 45:18; Kutollo 21:1-5.

Ee, ba bangwe ba tla buša ba le legodimong, eupša ba bantši ba tla hwetša mehola ya Mmušo wa legodimong—bophelo bjo bo sa felego lefaseng gotee le ditšhegofatšo tšeo bo tlago le tšona. Eka wena le lapa la gago le ka ba gare ga bao ba tlago go hwetša mehola ya ka mo go sa felego yeo e tlago go tlišwa ke Mmušo wa Modimo.

[Seswantšho go letlakala 12]

Ba dimilione tše di sa balegego ba tla šegofatšwa ka bophelo bjo bo sa felego lefaseng. Na o tla ba yo mongwe wa bona?