Go Tswalwa Lefsa​—Go Fihlelela Morero Ofe?

KE KA baka la’ng Jesu a ile a diriša polelwana e rego ‘go tswalwa ka moya’ ge a be a bolela ka go kolobetšwa ka moya o mokgethwa? (Johane 3:5) Ge le dirišwa ka tsela ya seswantšhetšo, lentšu “tswalwa” le bolela “mathomo,” bjalo ka ge le dirišwa polelwaneng e rego “go tswalwa ga setšhaba.” Ka go rialo, polelwana e rego “go tswalwa lefsa” e ra gore ‘go thoma lefsa.’ Ka gona, dipolelwana tša seswantšhetšo tše rego “tswalwa” le “go tswalwa lefsa” di gatelela gore go tla thoma tswalano e mpsha magareng ga Modimo le bao ba kolobeditšwego ka moya. Go fetoga moo ga tswalano go direga bjang?

Ge a hlalosa kamoo Modimo a lokišeletšago batho ka gona bakeng sa go buša legodimong, moapostola Paulo o ile a diriša papišo e tšwago bophelong bja lapa. O ile a ngwalela Bakriste ba mehleng ya gagwe gore ba be ba tla ‘amogelwa e le barwa’ le gore Modimo ka go rialo o be a tla dirišana le bona “go etša ge a dirišana le barwa.” (Bagalatia 4:5; Baheberu 12:7) Go bona kamoo mohlala wa go amogela ngwana o thušago motho go kwešiša gore ke phetogo efe ya tswalano yeo e bago gona ge motho a kolobetšwa ka moya o mokgethwa, ela hloko gape papišo yela ya lesogana leo le nyakago go ingwadiša sekolong sa bana ba motse.

Phetogo Yeo e Tlišwago ke go Amogelwa Bjalo ka Ngwana

Papišong yeo, lesogana le palelwa ke go ingwadiša sekolong seo ka baka la gore e se ngwana wa motse. Bjale, akanya go e-ba le phetogo e kgolo ka letšatši le lengwe. Le amogelwa ke tate wa motseng woo. Seo se kgoma lesogana leo bjang? Go ba gona, ka baka la ge le amogetšwe e le morwa, gona bjale le ka ba le ditshwanelo tšeo bana ba motse ba nago le tšona—go akaretša le tshwanelo ya go ingwadiša sekolong. Go amogelwa ga lona e le morwa go fetotše ditebelelo tša lona ka mo go feletšego.

Se se swantšhetša seo se diregago ka mokgwa o bohlokwa kudu go bao ba tswalwago lefsa. Ela hloko dika tše dingwe tšeo di swanago. Lesogana la papišong le tla amogelwa sekolong ge feela le e-na le seo se nyakegago—gore le be ngwana wa motse. Lega go le bjalo, lona ka noši le ka se kgone go dira gore le swanelege. Ka mo go swanago, batho ba bangwe ba tla amogelwa Mmušong wa Modimo, goba pušong ya legodimong, eupša ge feela ba e-na le seo se nyakegago—e lego “go tswalwa gape.” Lega go le bjalo, ba ka se kgone go itira gore ba swanelege ka gobane Modimo ke yena a dirago gore ba tswalwe lefsa.

Ke’ng seo se fetošitšego boemo bja lesogana le? Ke mogato wa molao wa go le amogela e le  morwa. Ke therešo gore mogato woo ga se wa fetoša seo lesogana le lego sona. Ka morago ga go amogelwa ga lona e le morwa, e be e sa le lesogana lona lela. Go sa dutše go le bjalo, ka morago ga go fihlelela ditshwanelego tša go le amogela e le morwa, lesogana le bile le maemo a mafsa. Ee, le ile la ba le mathomo a mafsa—re ka re le ile la tswalwa lefsa. Le ile la ba morwa, e lego seo se le filego tshwanelo ya go tsena sekolo le go ba karolo ya lapa la tate yoo a le amogetšego e le morwa.

Ka mo go swanago, Jehofa o fetošitše boemo bja sehlopha sa batho ba sa phethagalago ka go gata megato ya molao ya go ba amogela e le bana ba gagwe. Moapostola Paulo, yoo e bego e le wa sehlopha seo, o ngwaletše badumedi-gotee le yena gore: “Le amogetše moya wa go amogelwa le le barwa, e lego moya wo ka wona re goeletšago ra re: ‘Aba, Tate!’ Moya wo ka bowona o hlatselana le moya wa rena gore re bana ba Modimo.” (Baroma 8:15, 16) Ee, ka megato ya go ba amogela e le bana, Bakriste bao ba fetogile karolo ya lapa la Modimo, goba “bana ba Modimo.”—1 Johane 3:1; 2 Bakorinthe 6:18.

Therešo ke gore go amogelwa ga bona ke Modimo e le bana ga se gwa fetoša seo ba lego sona, ka gobane ba sa dutše ba sa phethagala. (1 Johane 1:8) Lega go le bjalo, bjalo ka ge Paulo a ile a tšwela pele a hlalosa, ka morago ga go fihlelela ditshwanelego tša molao bakeng sa go ba amogela e le bana, ba ile ba hwetša boemo bjo bofsa. Ka nako e swanago, moya wa Modimo o tsentše ka go bao ba amogetšwego e le barwa kgodišego ya gore ba tla phela le Kriste legodimong. (1 Johane 3:2) Kgodišego yeo e kgolo yeo e dirilwego ke moya o mokgethwa e ba file tebelelo e mpsha ka bophelo. (2 Bakorinthe 1:21, 22) Ee, ba bile le mathomo a mafsa—e lego go tswalwa lefsa.

Ge Beibele e bolela ka barwa bao ba amogetšwego ba Modimo e re: “E tla ba baperisita ba Modimo le ba Kriste, gomme ba tla buša le yena ka nywaga e sekete.” (Kutollo 20:6) Ba e-na le Kriste, barwa bao ba amogetšwego ba Modimo e tla ba dikgoši Mmušong wa Modimo, goba pušong ya legodimong. Moapostola Petro o boditše badumedi-gotee le yena gore ba be ba tla amogela “[bohwa] bjo bo sa senyegego le bjo bo sa šilafalago le bjo bo sa hwelelego” bjoo bo “[bolokilwego] magodimong” bakeng sa bona. (1 Petro 1:3, 4) A bohwa bjo bohlokwa gakaakaang!

Lega go le bjalo, taba ye ya Mmušo gape e rotoša potšišo. Ge e ba bao ba tswalwago gape ba tla buša e le dikgoši legodimong, ba tlo buša bomang? Potšišo yeo e tla ahla-ahlwa sehlogong se se latelago.

[Seswantšho go letlakala 10]

Ke’ng seo Paulo a se boletšego mabapi le go amogelwa ga batho e le bana?