Go Tswalwa Lefsa​—Morero wa Gona ke Ofe?

BA BANTŠI ba dumela gore motho o swanetše go tswalwa gape e le gore a hwetše phološo ya ka mo go sa felego. Lega go le bjalo, ela hloko seo Jesu a se boletšego ka boyena mabapi le morero wa go tswalwa lefsa. O itše: “Ka ntle le gore motho a tswalwe gape, a ka se ke a bona mmušo wa Modimo.” (Johane 3:3) Ka baka leo, motho o swanetše go tswalwa gape e le gore a tsene Mmušong wa Modimo, e sego gore a phološwe. Ba bangwe ba ka re, ‘Eupša, na dipolelwana tše tše pedi—go tsena Mmušong le go phološwa—ga di bolele ka moputso o swanago?’ Aowa, ga go bjalo. Gore re kwešiše phapano, a re thomeng ka go ahla-ahla seo se bolelwago ke polelwana e rego “mmušo wa Modimo.”

Mmušo ke mohuta wa pušo. Ka gona, polelwana e rego “mmušo wa Modimo” e ra gore “pušo ya Modimo.” Beibele e ruta gore Jesu Kriste, yena “Morwa-motho,” ke Kgoši ya Mmušo wa Modimo le gore Kriste o na le babuši-gotee. (Daniele 7:1, 13, 14; Mateo 26:63, 64) Go feta moo, pono yeo e bonwego ke moapostola Johane e utollotše gore babuši-gotee le Kriste ke batho bao ba kgethilwego “go tšwa molokong o mongwe le o mongwe le lelemeng le lengwe le le lengwe le bathong ba bangwe le ba bangwe le setšhabeng se sengwe le se sengwe” le gore ba tla “buša e le dikgoši godimo ga lefase.” (Kutollo 5:9, 10; 20:6) Lentšu la Modimo gape le utolla gore bao ba tlago go buša e le dikgoši ba bopa “mohlatswana” wa batho ba 144 000 “bao ba rekilwego lefaseng.”—Luka 12:32; Kutollo 14:1, 3.

Sedulo sa Mmušo wa Modimo se kae? “Mmušo wa Modimo” gape o bitšwa “mmušo wa  magodimo,” e lego seo se bontšhago gore Jesu le dikgoši-gotee le yena ba buša ba le legodimong. (Luka 8:10; Mateo 13:11) Ka go rialo, Mmušo wa Modimo ke pušo ya legodimong yeo e bopšago ke Jesu Kriste le sehlopha sa babuši-gotee bao ba kgethilwego bathong.

Ka gona, ke’ng seo Jesu a bego a se bolela ge a be a re motho o swanetše go tswalwa gape e le gore a kgone go “tsena mmušong wa Modimo”? O be a e-ra gore motho o swanetše go tswalwa gape e le gore a ka ba mmuši-gotee le Kriste legodimong. Ge e bewa ka go lebanya, morero wa go tswalwa lefsa ke go lokišeletša sehlopha se se lekanyeditšwego sa batho bakeng sa bobuši bja legodimong.

Go fihla ga bjale, re bone gore go tswalwa lefsa go bohlokwa kudu, go tšwa go Modimo e bile go lokišeletša sehlopha sa batho bakeng sa bobuši bja legodimong. Eupša go tswalwa lefsa go direga bjang?

[Ntlhakgolo go letlakala 7]

Morero wa go tswalwa lefsa ke go lokišeletša sehlopha se se lekanyeditšwego sa batho bakeng sa bobuši bja legodimong

[Seswantšho go letlakala 7]

Jesu Kriste le sehlopha sa babuši-gotee le yena bao ba kgethilwego bathong ba bopa Mmušo wa Modimo