Go Tswalwa Lefsa​—Na Motho a ka Ikgethela?

KE MANG yo a dirago gore batho ba tswalwe lefsa? Ge ba kgothaletša batheetši ba bona gore e be Bakriste ba tswetšwego gape, baruti ba bangwe ba tsopola mantšu a Jesu a rego: “Le swanetše go tswalwa gape.” (Johane 3:7) Baruti ba bjalo ba diriša mantšu a e le taelo, ge e le gabotse ba bolela gore, “Tswalwang gape!” Ka go rialo ba ra gore ke boikarabelo bja modumedi yo mongwe le yo mongwe go kwa Jesu le go gata megato e nyakegago gore ba tswalwe lefsa. Ge e le gabotse ba bolela gore motho a ka ikgethela go tswalwa lefsa. Eupša na pono e bjalo e dumelelana le seo Jesu a se boditšego Nikodemo?

Go bala mantšu a Jesu ka kelohloko go bontšha gore o be a sa rute gore motho a ka ikgethela go tswalwa lefsa goba go se tswalwe lefsa. Ke ka baka la’ng re rialo? Lentšu la Segerika leo le fetoletšwego e le “a tswalwe gape” le ka fetolelwa gape e le “o swanetše go tswalwa go tšwa godimo.” * Ka baka leo, go ya ka phetolelo yeo e nngwe, go tswalwa  lefsa “go tšwa godimo”—ke gore, “go tšwa legodimong,” goba “go tšwa go Tate.” (Johane 19:11; Jakobo 1:17) Ee, Modimo ke yena a dirago gore motho a tswalwe gape.—1 Johane 3:9.

Ge re dula re gopola polelwana e rego “go tšwa godimo,” ga go thata go lemoga lebaka leo ka lona motho a ka se ikgethelego go tswalwa lefsa. Nagana feela ka go tswalwa ga gago. Na o ile wa ikgethela gore o belegwe? Ga go bjalo le gatee! O ile wa belegwa ka baka la tatago. Ka mo go swanago, re ka tswalwa lefsa feela ge e ba Modimo, Tatago rena wa legodimong, a dira gore re tswalwe lefsa. (Johane 1:13) Ka baka leo, moapostola Petro o boletše ka mo go swanetšego gore: “A go tumišwe Modimo le Tatago Morena wa rena Jesu Kriste, gobane go ya ka kgaugelo ya gagwe e kgolo o re tswetše lefsa.”—1 Petro 1:3.

Na ke taelo?

Lega go le bjalo, ba bangwe ba ka ipotšiša gore, ‘Ge e ba motho a ka se ikgethele go tswalwa gape, ke ka baka la’ng Jesu a ile a nea taelo e rego: “Le swanetše go tswalwa gape”?’ Potšišo yeo e a kwagala. Taba ke gore, ge e ba mantšu a Jesu ruri e le taelo, o tla ba a re laela go dira selo seo re ka se se kgonego. Seo ga se bonagale se kwagala. Ka gona, mantšu a rego le swanetše “go tswalwa gape” a swanetše go kwešišwa bjang?

Go lebelela polelwana yeo ka leleme la yona la mathomo go bontšha gore ga se ya bolelwa ka tsela ya go laela. Go e na le moo, polelwana ye e boletšwe e le taba feela. Ka mantšu a mangwe, ge Jesu a be a re le swanetše “go tswalwa gape,” o be a fo ba a bontšha ntlha, e sego go fa taelo. O boletše gore: “Go bohlokwa gore le tswalwe go tšwa godimo.”—Johane 3:7, Modern Young’s Literal Translation.

Go bontšha phapano magareng ga taelo le taba feela, nagana ka papišo e latelago. Akanya ka motse o nago le dikolo tše mmalwa. Se sengwe sa dikolo tšeo ke sa bana ba motse bao ba dulago mafelong ao a lego kgole le sekolo seo. Ka letšatši le lengwe, lesogana leo le sa dulego motseng woo le botša hlogo ya sekolo seo gore, “Ke nyaka go ingwadiša sekolong se.” Hlogo ya sekolo e le botša gore, “Gore o ingwadiše, o swanetše go ba ngwana wa motse.” Ke therešo gore mantšu a hlogo ya sekolo ga se taelo. Ga e laele lesogana ka gore, “E-ba ngwana wa motse!” Hlogo ya sekolo ge e le gabotse e no ba e le bontšha ntlha—seo se nyakegago gore motho a tsene sekolong seo. Ka tsela e swanago, ge Jesu a be a re: “Le swanetše go tswalwa gape,” o be a no ba a bontšha ntlha—seo se nyakegago gore motho a ‘tsene mmušong wa Modimo.’

Kgopolo yeo ya mafelelo—Mmušo wa Modimo—e tswalana le karolo e nngwe gape ya go tswalwa lefsa. E tswalana le potšišo e rego, Morero wa gona ke ofe? Go tseba karabo ya potšišo yeo ke senotlelo sa go kwešiša ka mo go nepagetšego gore go tswalwa gape go bolela’ng.

[Mongwalo wa tlase]

[Seswantšho go letlakala 6]

Go na le go swana gofe magareng ga go tswalwa lefsa le go tswalwa e le ka kgonthe?