1 Ithute go Bota Beibele

“Lengwalo ka moka le buduletšwe ke Modimo gomme le hola ka go ruta, go sola, go lokiša dilo.”—2 Timotheo 3:16.

GO NA LE TLHOHLO EFE? Ba bantši ba kgomaretše la gore Beibele e fo ba e le puku e tletšego bohlale bja batho. Ba bangwe ba dumela gore ditiragalo tša yona tša histori ga se tša nepagala. Ba bangwe ba bolela gore keletšo ya Beibele ke e sa šomego goba gore e šiilwe ke nako.

O KA FENYA TLHOHLO YEO BJANG? Gantši, bao ba belaelago go botega ga Beibele goba go ba ga yona e šomago ga se ba ka ba nyakišiša taba ka bobona. Ba fo ba ba bolela seo ba se kwelego go ba bangwe. Lega go le bjalo, Beibele e nea temošo e rego: “Lešilo le dumêla ’taba tšohle; mohlale ó hlatha dikxatô.”—Diema 14:15.

Go e na le go fo dumela seo ba bangwe ba se bolelago, o re’ng o sa latele mohlala wa Bakriste ba lekgolong la pele la nywaga bao ba bego ba dula Berea, yeo ga bjale go thwego ke leboa la Gerika? Ga se ba ka ba fo dumela seo ba bangwe ba bego ba ba botša sona. Go e na le moo, ba be ba e-na le mokgwa wa go “hlahloba Mangwalo ka kelohloko letšatši le letšatši go bona ge e ba dilo tše di be di le bjalo.” (Ditiro 17:11) Ka boripana a re eleng hloko mabaka a mabedi ao ka ona o ka kgolwago gore Beibele ke Lentšu la Modimo le le buduletšwego.

Ditiragalo tša Beibele tša histori di nepagetše. Go theoša le nywaga, baswaya-diphošo ba ile ba belaela—gomme ba tšwela pele ba belaela—go nepagala ga Beibele mabapi le maina a batho le a dinaga tšeo e bolelago ka tšona. Lega go le bjalo, bohlatse bo be bo dutše bo bontšha gore go belaela mo go bjalo go be go hloka motheo gomme bo bontšha gore pego ya Beibele e ka botwa.

Ka mohlala, lebakeng le lengwe diithuti di ile tša belaela go ba gona ga Kgoši Saragone wa Asiria, yoo go bolelwago ka yena go Jesaya 20:1. Lega go le bjalo, ka bo-1840, baepi ba marope ba ile ba thoma go epolla mošate wa kgoši ye. Gona bjale, Saragone ke e nngwe ya dikgoši tšeo di tsebjago kudu tša Asiria.

Baswaya-diphošo ba ile ba belaela go ba gona ga Pontio Pilato, mmušiši wa Roma yo a laetšego  gore Jesu a bolawe. (Mateo 27:1, 22-24) Eupša ka 1961 go ile gwa utollwa letlapa leo le nago le leina la Pilato le maemo a gagwe kgaufsi le motse wa Kesarea kua Isiraele.

Tokollo ya October 25, 1999, ya U.S.News & World Report e boletše mabapi le go nepagala ga ditiragalo tša histori tša Beibele gore: “Ka ditsela tše sa tlwaelegago, boepi bja marope bja mehleng yeno bo hlatsetše go nepagala ga ditiragalo tša histori tša Testamente e Mpsha le ya Kgale—bo hlatsela dikarolo tše bohlokwa tša dikanegelo tša bapatriareka ba Baisiraele, go Huduga ga bona, lešika la bogoši la Dafida gotee le bophelo le mehla ya Jesu.” Gaešita le ge go dumela go Beibele go se gwa ithekga ka dikutollo tša boepi bja marope, go nepagala mo go bjalo ga histori ke mo o ka go letelago pukung yeo e ngwadilwego ke Modimo.

Bohlale bjo bo šomago bjo bo hwetšwago ka Beibeleng bo hola batho ba ditlogo ka moka. Kgale-kgale pele ga ge go ka utollwa gore go na le diphedi tše dinyenyane kudu le tema yeo di e kgathago ya go phatlalatša malwetši, Beibele e ile ya kgothaletša gore go latelwe mekgwa ya tša bohlweki yeo e sa šomago le lehono. (Lefitiko 11:32-40; Doiteronomio 23:12, 13) Ditho tša lapa tšeo di dirišago keletšo ya Beibele ya kamoo di swanetšego go swarana ka gona di thabile kudu. (Baefeso 5:28–6:4) Motho yo a phelago ka melao ya motheo ya Beibele a ka ba mošomi yo a elago hloko kudu goba mothwadi yo a nago le teka-tekano kudu. (Baefeso 4:28; 6:5-9) Go diriša melao ya motheo ya Beibele ke mo go holago gape le boemong bja maikwelo. (Diema 14:30; Baefeso 4:31, 32; Bakolose 3:8-10) Keletšo e bjalo e šomago ke yeo re e letetšego go Mmopi wa rena.

MOPUTSO KE OFE? Bohlale bjo bo hwetšwago ka Beibeleng bo ka hlalefiša gaešita le motho yo a se nago phihlelo. (Psalme 19:7) Go oketša moo, gatee-tee ge re bota Beibele, e ka re thuša go feta puku le ge e le efe e nngwe gore re gate mogato o latelago wa go matlafatša tumelo ya rena.

Bakeng sa tsebišo e oketšegilego, bona kgaolo 2, “Beibele—Puku e Tšwago go Modimo,” ka pukung ya Ke Eng Seo ge e le Gabotse Beibele e se Rutago? *

[Mongwalo wa tlase]