3 Ithute Therešo ka Jesu

“Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”—Johane 3:16.

GO NA LE TLHOHLO EFE? Ba bangwe ba ka dira gore o dumele gore Jesu e be e se motho wa kgonthe. Ba bangwe ba dumela gore o ile a phela eupša ba bolela gore o be a fo ba motho feela yo a tlwaelegilego yo a hwilego kgale.

O KA FENYA TLHOHLO YEO BJANG? Ekiša morutiwa Nathaniele. * Mogwera wa gagwe Filipi o ile a mmotša gore o be a nagana gore o hweditše Mesia—“Jesu morwa wa Josefa yo a tšwago Natsaretha.” Lega go le bjalo, Nathaniele ga se a ka a fo dumela seo Filipi a se bolelago. Ge e le gabotse, o arabile ka gore: “Na go na le selo se sebotse se se ka tšwago Natsaretha?” Lega go le bjalo, o ile a amogela taletšo ya Filipi ya gore a ‘tle a bone’ ka boyena. (Johane 1:43-51) Le wena o tla holwa ke go hlahloba bohlatse bja mabapi le Jesu ka bowena. Ke’ng seo o ka se dirago?

Nyakišiša bohlatse bja histori bja gore Jesu e be e le motho wa kgonthe. Josephus le Tacitus e be e le bo-radihistori ba ba hlomphegago bao ba phetšego lekgolong la pele la nywaga e bile e be e se Bakriste. Ba bolela gore Jesu Kriste e be e le motho wa kgonthe yo a kilego a phela. Ge a hlalosa kamoo Mmušiši wa Roma e lego Nero a ilego a bea Bakriste molato bakeng sa mollo wa kua Roma ka 64 C.E., Tacitus o ngwadile gore: “Nero o ile a latofatša ka go tia le go tlaiša o šoro sehlopha seo se bego se hloilwe ka baka la go hloya ga sona dilo tše itšego, seo batho ba bego ba se bitša Bakriste. Christus [Kriste] yo leina le le tšwago go yena, o ile a ahlolelwa lehu nakong ya pušo ya Tiberius ka diatleng tša yo mongwe wa babušiši ba rena, Pontio Pilato.”

Ge e bolela mabapi le ditšhupetšo tša bo-radihistori ba lekgolong la pele le la bobedi la nywaga tšeo di bolelago ka Jesu le Bakriste ba pele, The Encyclopædia Britannica Tokollo ya 2002 e re: “Dipego tše tšeo di ikemetšego di hlatsela gore mehleng ya bogolo-golo gaešita le baganetši ba Bokriste ga se ba ka ba belaela go ba ga Jesu wa histori, e lego seo se ilego sa ganwa la mathomo le ka mabaka a fokolago bofelong bja ngwaga-kgolo wa bo-18, ngwaga-kgolong wa bo-19 le mathomong a ngwaga-kgolo wa bo-20.” Ka 2002, sehlogo se sengwe ka go The Wall Street Journal se boletše gore: “Diithuti tše dintši, go sa akaretšwe batho bao ba felago ba sa dumele gore Modimo o gona, di šetše di amogetše gore Jesu wa Natsaretha ke motho wa histori.”

Hlahloba bohlatse bja gore Jesu o ile a tsošwa bahung. Ge Jesu a be a swarwa ke baganetši ba  gagwe, bagwera ba gagwe ba kgaufsi ba ile ba mo lahla, gomme mogwera wa gagwe Petro ka letšhogo o ile a mo latola. (Mateo 26:55, 56, 69-75) Ka morago ga go swarwa ga Jesu, balatedi ba gagwe ba ile ba gašana. (Mateo 26:31) Ke moka, gatee-tee, barutiwa ba gagwe ba ile ba ba mafolofolo. Petro le Johane ka sebete ba ile ba lebeletšana le bona banna bao ba ilego ba loga maano a go bolaya Jesu. Barutiwa ba Jesu ba ile ba šušumeletšega kudu moo ba ilego ba phatlalatša thuto ya gagwe Mmušong wa Roma ka moka, ba bona go le kaone gore ba hwe go e na le go kwanantšha ditumelo tša bona.

Ke ka baka la’ng go ile gwa ba le phetogo ye e kgolo ya boemo bja kgopolo? Moapostola Paulo o hlalosa gore Jesu o ile a tsošwa bahung gomme “o bonagetše go Kefase [Petro], ke moka a tla a bonagala go ba lesome-pedi.” Paulo o oketša ka gore: “Ka morago ga moo a bonagala go bana bešo ba ka godimo ga ba makgolo-hlano ka nako e tee.” Dihlatse tše dintši tšeo di bonego seo ka mahlo di be di sa phela ge Paulo a be a ngwala mantšu ao. (1 Bakorinthe 15:3-7) Go be go ka ba bonolo gore baswaya-diphošo ba ganetše bohlatse bja hlatse e tee goba tše pedi tšeo di bonego ka mahlo. (Luka 24:1-11) Eupša bohlatse bja dihlatse tša ka godimo ga makgolo a mahlano tšeo di bonego ka mahlo bo be bo tloga bo hlatsela gore Jesu o ile a tsošwa bahung.

MOPUTSO KE OFE? Bao ba dumelago go Jesu e bile ba mo kwa ba ka lebalelwa dibe le go dula ba e-na le letswalo le le hlwekilego. (Mareka 2:5-12; 1 Timotheo 1:19; 1 Petro 3:16-22) Ge ba ka hwa, Jesu o holofetša gore o tla ba tsoša bahung “letšatšing la mafelelo.”—Johane 6:40.

Bakeng sa tsebišo e oketšegilego, bona kgaolo 4, “Jesu Kriste ke Mang?,” le kgaolo 5, “Topollo—Mpho e Kgolo Kudu ya Modimo,” ka pukung ya Ke Eng Seo ge e le Gabotse Beibele e se Rutago? *

[Mengwalo ya tlase]

[Tlhaloso ya seswantšho go letlakala 7]

Bjalo ka Nathaniele, nyakišiša bohlatse bja mabapi le Jesu