Batamela Kgaufsi le Modimo

Ge Jehofa a Itlhalosa

Ekisodo 34:6, 7

O BE o ka hlalosa Modimo bjang—dika tša gagwe le tsela yeo a dirago dilo ka yona? Akanya o be o ka kgona go botšiša Modimo ka yena le go theetša ge a dutše a hlalosa dika tša gagwe. Moše o ile a ba le phihlelo e bjalo. Re leboga gore o ile a budulelwa gore a ngwale pego ya seo se ilego sa direga.

Ge a be a le Thabeng ya Sinai, Moše o ile a kgopela Jehofa ka gore: “Hle a k’O mponthšê letaxô la xaxo.” (Ekisodo 33:18) Letšatšing le latelago, moporofeta o ile a ba le tokelo ya go bona letago la Modimo ganyenyane. * Moše ga se a hlalosa ka botlalo seo a se bonego ponong yeo ye e kgahlišago. Go e na le moo, o ile a bega selo se sengwe se bohlokwa-hlokwa—seo Modimo a se boletšego. Anke re hlahlobeng seo Jehofa a se boletšego, bjalo ka ge se hwetšwa go Ekisodo 34:6, 7.

Selo sa pele seo Jehofa a se utollago ka yena ke gore ke “Modimo yo mabobo le kxauxêlô.” (Temana 6) Go ya ka seithuti se sengwe, lentšu la Seheberu leo le fetoletšwego e le “mabobo” le bontšha gore Modimo o na le “lešoko le botho, go swana le leo tate a nago le lona bakeng sa bana ba gagwe.” Lentšu leo le fetoletšwego e le “kgaugelo” le tswalana le lediri leo le “bontšhago karabelo e tšwago pelong ya motho yo mongwe yo a thušago motho yoo a tlogago a nyaka thušo.” Go molaleng gore Jehofa o nyaka re tseba gore o hlokomela barapedi ba gagwe go swana le ge batswadi ba hlokomela bana ba bona—ka lerato le botho le ka go tshwenyega ka mo go tseneletšego ka dinyakwa tša bona.—Psalme 103:8, 13.

Se se latelago, Jehofa o re ‘ga a fele pelo.’ (Temana 6) Ga a galefele bahlanka ba gagwe ba lefaseng gabonolo. Go e na le moo, ga a ba felele pelo, o kgotlelela diphošo tša bona ge a dutše a ba nea sebaka sa go fetoša ditsela tša bona tša sebe.—2 Petro 3:9.

Modimo o tšwela pele ka gore o na le “botho byo boxolo le therešô.” (Temana 6) Botho bjo bogolo, goba lerato le le sa kwanantšhego, ke seka se bohlokwa seo ka sona Jehofa a dirago gore go be le tlemagano e tiilego le e ka se kgaogego magareng ga gagwe le batho ba gagwe. (Doiteronomio 7:9) Le gona, Jehofa ke mothopo wa therešo. A ka se ke a fora motho goba go forwa. Ka ge e le “Modimo-mmotexi,” re ka bota selo se sengwe le se sengwe seo a se bolelago, go akaretša le dikholofetšo tša gagwe tša bokamoso.—Psalme 31:5.

Therešo e nngwe e bohlokwa yeo Jehofa a nyakago re e tseba ka yena ke gore o lebalela “bokxôpô le dikaroxô le dibê.” (Temana 7) O ikemišeditše ‘go lebalela’ badira-dibe ba itsholago. (Psalme 86:5) Ka nako e swanago, Jehofa ga a kgothaletše bobe. O hlalosa gore “a [ka] se kê a lesa xo ôtla mosenyi.” (Temana 7) Modimo yo mokgethwa le yo a nago le toka a ka se tlogele bao ba dirago dibe ka go rata ba sa otlwe. Letšatši le lengwe ba tla swanelwa ke go lebeletšana le ditla-morago tša dibe tša bona.

Ge Jehofa a hlalosa dika tša gagwe o bontšha gabotse gore o nyaka re mo tseba e bile re tlwaelana le semelo sa gagwe le tsela yeo a dirago dilo ka yona. Na ga o tutueletšege go ithuta ka mo go oketšegilego ka dika tša gagwe tše dibotse?

[Mongwalo wa tlase]