Go Hwetša Lethabo go sa Šetšwe Bogole Bja-ka

KA ge go anega Paulette Gaspar

Gaešita le ge ke be ke imela dikhilograma tše tharo ge ke belegwa, ngaka e be e tseba gore ke tloga ke e-na le bothata. Ge ke belegwa, marapo a-ka a ile a palega. Ge e le gabotse, ke swerwe ke bolwetši bja marapo bjoo bo bitšwago “osteogenesis imperfecta,” bjoo bo tsebjago e le bolwetši bja marapo a palegago gabonolo (brittle bone disease). Ke ile ka kitimišetšwa go yo buiwa, eupša dingaka di be di e-na le kholofelo e nyenyane ya gore ke tla phela. Di be di nagana gore ke tla hwa ka tlase ga diiri tše 24.

KE BELEGWE Canberra, e lego motse mošate wa Australia ka June 14, 1972. Go sa šetšwe seo dingaka di bego di se nagana, ke ile ka phela letšatši leo ka moka. Eupša ke ile ka tsenwa ke bolwetši bja nyumonia. Ka ge di be di nagana gore ke tlo hwa, dingaka ga se tša ka tša nnea dihlare le ge e le dife gomme tša dira phetho ya gore di dumelele “tlhago e kgathe tema ya yona.” Ka gona, tlhago e ile ya kgatha tema ya yona gomme ke ile ka phela.

Ke nagana gore go ka ba go ile gwa ba thata kudu go batswadi ba-ka nakong yeo. Ka ge go be go se na kgonagalo e kaalo ya gore ke phele, dingaka tšeo di nago le maikemišetšo a mabotse di ile tša eletša batswadi ba-ka gore ba se ke ba nthata kudu. Ge e le gabotse, dikgweding tše tharo tša pele tšeo ke di dutšego sepetlele, batswadi ba-ka ba be ba sa dumelelwa go nkgoma le gatee. Go be go na le kgonagalo e kgolo kudu ya gore ba be ba ka nkgobatša. Ge go be go bonagala gore ke tla phela, dingaka di ile tša šišinya gore batswadi ba-ka ba nkiše legaeng la bana bao ba golofetšego.

Lega go le bjalo, batswadi ba-ka ba ile ba dira phetho ya go nkiša gae. Lebaka ke gore mma o be a sa tšwa go thoma go ithuta Beibele le Dihlatse tša Jehofa. Seo a bego a ithuta sona se ile sa mmontšha boikarabelo bjoo a nago le bjona bja gore a ntlhokomele. Eupša go ka ba go ile gwa ba thata go yena gore a be le tswalano ya kgaufsi le nna, ka ge maikwelo a gagwe ka moka le matla a be a felela go tlhokomelo e tseneletšego yeo ke bego ke e nyaka. Ke be ke išwa sepetlele kgafetša-kgafetša. Marapo a-ka a be a robega ge ke be ke dirwa dilo tše bonolo kudu, tše bjalo ka go hlapišwa. Gaešita le ge nka ethimola lerapo le be le ka palega.

Ke Ile ka Gateletšega

Ge ke dutše ke gola, setulo sa digole se ile sa fetoga mogwera wa-ka wa paala. Go ithuta go sepela go be go sa kgonege. Go sa šetšwe mathata ao ke bego ke e-na le ona, batswadi ba-ka ba ile ba hlokomela dinyakwa tša-ka tša mmele gabotse kudu.

Go oketša moo, mma o ile a leka ka thata go nthuta molaetša wa Beibele wo o homotšago. Ka mohlala, o ile a nthuta gore nakong e tlago, Modimo o tla dira lefase paradeise yeo go yona batho ka moka ba tlago go thabela boemo bjo bo phethagetšego bja moya, bja monagano le bja tša maphelo. (Psalme 37:10, 11; Jesaya 33:24) Lega go le bjalo,  mma o ile a dumela gore o be a thatafalelwa ke go mpona ke phela bophelo bjo bobotse gona bjale pele ga ge nako yeo e fihla.

Mathomong ke ile ka tsena sekolong sa digole. Barutiši ba-ka ba be ba sa mpeele dipakane gomme le nna ke be ke sa ipeele tšona. Ge e le gabotse, go tsena sekolo feela e ile ya ba tlhohlo e kgolo. Bana ba bantši moo ba be ba ntshwara ka tsela e sehlogo. Ka morago, ke ile ka tsena sekolo seo se tlwaelegilego. Ke ile ka lemoga gore go ithuta go dirišana le batho ba bangwe go be go tšea matla a-ka ka moka, maikwelo le matla a monagano. Go sa šetšwe seo, ke be ke ikemišeditše go fetša thuto ya-ka yeo e tšeago nywaga e 12.

Nywageng ya ge ke le sekolong se se phagamego, ke ile ka nagana mabapi le tsela yeo maphelo a barutwana-gotee le nna a bego a bonagala a hloka morero ka gona. Le gona, ke ile ka nagana ka seo mma a nthutilego sona go tšwa Beibeleng. Monaganong wa-ka, ke be ke tseba gore seo a mpoditšego sona ke therešo. Eupša dithuto tša Beibele ka nako yeo di be di se tša kgoma pelo ya-ka. Lebakeng le itšego, ke ile ka dira phetho ya go leka go tlatša bophelo bja-ka ka maipshino, ka ntle le go naganišiša ka bokamoso.

Ge ke be ke e-na le nywaga e 18, ke ile ka tloga gae gomme ka yo dula le sehlopha se sengwe sa batho ba golofetšego. Ke ile ka hwetša go huduga mo e le mo go kgahlišago e bile go nyamiša. Go lokologa, go ikemela, go ba le bagwera le go fetša nako e ntši le bona e be e le mo go kgahlišago. Ba bantši ba bagwera ba-ka ba ile ba nyalwa. Le nna ke ile ka ba le kganyogo ya go ba le molekane wa lenyalo le go ratwa. Lega go le bjalo, ka baka la bogole bja-ka, go hwetša molekane wa lenyalo go be go bonagala go sa kgonege. Go lemoga se go ile gwa nnyamiša.

Lega go le bjalo, ga se ka ka ka bea Modimo molato ka baka la boemo bja-ka. Ke ile ka ithuta ka mo go lekanego ka Modimo go tseba gore ga go kgonege gore a dire dilo ka tsela e hlokago toka. (Jobo 34:10) Ke ile ka leka go amogela bophelo bja-ka ka tsela yeo bo lego ka yona. Lega go le bjalo, ke ile ka gateletšega kudu.

Go Kaonefala Ganyenyane-ganyenyane

Ke leboga gore mma o ile a lemoga boemo bja-ka gomme a ikgokaganya le mogolo yo mongwe wa phuthego yoo a bego a dula kgaufsi le nna. O ile a nteletša mogala gomme a ntaletša gore ke tle dibokeng tša Bokriste Holong ya Mmušo ya Dihlatse tša Jehofa ya lefelong lona leo. Go oketša moo, kgaetšedi yo mongwe ka phuthegong o ile a thoma go ithuta Beibele le nna beke e nngwe le e nngwe.

Ge ke dutše ke gopotšwa therešo ya Beibele yeo ke ilego ka e rutwa ke mma nywaga pele ga moo, pono ya-ka ka bophelo e ile ya thoma go kaonefala. Ke ile ka thabela go ba le Bakriste-gotee. Lega go le bjalo, ke ile ka ithuta go se bolele ka maikwelo a-ka ka gobane ke be ke boifa gore ke tla kwešwa bohloko maikwelong. Ke nagana gore se se ile sa dira gore ke thatafalelwe ke go rata Modimo ka mo go tseneletšego. Lega go le bjalo, ke be ke tseba gore ke mo go swanetšego gore ke neele bophelo bja-ka go yena. Ka gona, ka December 1991, ke ile ka kolobetšwa e le ge ke bontšha boineelo bja-ka.

Ke ile ka huduga ka ngwakong woo ke bego ke dula go wona le bagwera ba-ka ba golofetšego gomme ka yo dula foleteng ke nnoši. Phetogo ye e ntlišeditše mehola le mathata. Ka mohlala, ke be ke lewa ke bodutu kudu. Le gona, kgopolo ya gore banna ba ka šwahlela moo ke dulago gona e be e dira gore ke boife. Go se go ye kae, ke ile ka gateletšega ka mo go tseneletšego gape. Gaešita le ge ke ile ka dira gore go bonagale ke e-na le sebete gomme ke thabile, dilo ka moka di be di sa sepele gabotse. Ke be ke tloga ke nyaka mogwera wa kgonthe.

Ke ikwa eka Jehofa Modimo o nneile mogwera yo bjalo. Bagolo ba phuthego ka botho ba ile ba rulaganya gore Suzie, kgaetšedi yo a nyetšwego, a tšwele pele a ithuta Beibele le nna. Suzie e be e se feela morutiši go nna. O ile a ba mogwera wa-ka wa kgaufsi yoo ke mo ratago kudu.

Suzie o ile a ntlwaetša gore ke bolele le batho ba bangwe ka seo ke bego ke ithuta sona—ka ntlo le ntlo le ka go nea bohlatse bjo bo sa rulaganyetšwago. Ga bjale, ke ile ka thoma go lemoga dika tša Modimo ka mo go tletšego. Lega go le bjalo, gaešita le ge ke be ke kolobeditšwe, ke be ke se ka hlwa  ke hlagolela lerato le le tseneletšego la go rata Modimo. Lebakeng le lengwe, ke ile ka ba ka nagana gore ke tlogele go mo hlankela. Ke ile ka tšhollela Suzie sa mafahleng, gomme o ile a nthuša go lebeletšana le bothata bjo.

Le gona, Suzie o ile a nthuša go lemoga gore go hloka ga-ka lethabo go be go bakwa ke go gwerana le batho bao ba bego ba sa rate Jehofa gakaalo. Ka gona, ke ile ka thoma go gwerana le batho bao ba godilego moyeng—kudu-kudu bao ba mphetago ka bogolo. Le gona, tswalano ya-ka le mma e be e sa kgahliše; lega go le bjalo, ke ile ka thoma go tsošološa tswalano e botse le yena gotee le kgaetšedi ya-ka. Ke ile ka makatšwa ke go hwetša lethabo leo ke sa kago ka ba le lona. Bana bešo le dikgaetšedi ba moya, le lapa lešo, ba ile ba ba mothopo wa-ka wa lethabo le matla, kudu-kudu Jehofa.—Psalme 28:7.

Modiro o Mofsa

Ka morago ga kopano yeo go yona ke ilego ka kwa polelo yeo e bego e gatelela lethabo leo ba bantši ba bago le lona tirelong ya nako e tletšego ya Bokriste, ke ile ka ipotša gore, ‘Le nna nka e phetha!’ Ke therešo gore ke ile ka lemoga gore go dira se e be e ka ba tlhohlo e le ka kgonthe. Eupša ka morago ga go naganišiša ka taba ye ka thapelo, ke ile ka dira phetho ya go romela kgopelo ya-ka ya go ba morutiši wa Beibele wa nako e tletšego, gomme ka April 1998, ke ile ka thoma modiro woo.

Ke kgona bjang go tšea karolo modirong wa boboledi ka boemo bja-ka bja mmele? Ka tlhago ke motho yo a ratago go itirela dilo, le gona ga ke rate go ba morwalo wa batho ba bangwe, ka go lebelela gore ba nkiše moo ke ratago go ya gona le gore ba nthuše ka ditsela tše dingwe. Ka gona, Suzie le monna wa gagwe, Michael, ba ile ba tla ka tšhišinyo gomme ba re: Reka sethuthuthu! Eupša ke be ke tla otlela bjang sethuthuthu? Ka ge seswantšho se se bontšha, sethuthuthu sa-ka se be se diretšwe nna feela. Ka gona, ga go nyakege le gore ke fološe mmele wa-ka o monyenyane wa boima bja dikhilograma tše 19 setulong sa-ka sa digole!

Ka sethuthuthu sa-ka se se kgethegilego, ke na le tokologo e ntši kudu yeo e ntumelelago go etela batho le go ithuta Beibele le bona ka dinako tšeo di re dumelelago ka moka ga rena. Ke thabela go otlela sethuthuthu sa-ka le go kwa moya o mpetha sefahlego—e lego se sengwe sa dilo tše di kgahlišago bophelong!

Ke thabela go thoma dipoledišano tše sa rulaganyetšwago le batho seterateng, bao ka kakaretšo ba lego botho e bile ba ntlhompha. Ke thabela go thuša batho gore ba ithute ka Beibele. Seo ke ratago go se gopola, ke seo se diregilego bodireding bja ntlo le ntlo ge ke sepela le ngwanešo yo a mphetago ka botelele. O ile a dumediša mong wa ntlo, yoo a ilego a ntebelela ka go makala gomme a botšiša yo ke bego ke sepela le yena gore, “Na yo o kgona go bolela?” Bobedi bja rena re ile ra sega. Ge ke fetša go boledišana le yena, mosadi yoo o ile a tseba gore ke kgona go bolela e le ka kgonthe!

Gona bjale ke thabela bophelo gomme ke ithutile go rata Jehofa Modimo. Ke leboga gore mma o ile a nthuta ditherešo tša Beibele gomme ke lebeletše pele ka kgodišego nakong e tlago kgaufsinyane ya ge Modimo a dira ‘dilo ka moka tše mpsha,’ go akaretša le mmele wa-ka wo monyenyane.—Kutollo 21:4, 5.

[Ntlhakgolo go letlakala 30]

“Ke ile ka leka go amogela bophelo bja-ka ka tsela yeo bo lego ka yona. Lega go le bjalo, ke ile ka gateletšega kudu”