NA O godiša mofsa yo a lego mahlalagading? Ge e ba go le bjalo, o bona o mongwe wa megato e kgahlišago kudu ya go gola ga ngwana wa gago. Le gona e ka ba e nngwe ya dinako tše di gateletšago kudu. Na o tlwaelane le ditiragalo tše di latelago?

• Ge morwa wa gago e be e sa le yo monyenyane, wena le yena le be le le monwana le lenala. Ga bjale ka ge a šetše a le mahlalagading, o itirile modula-thoko gomme wena o thoma go ikwa eka ga a sa go hloka ditabeng tša gagwe.

• Ge morwedi wa gago e be e sa le yo monyenyane, o be a go botša selo se sengwe le se sengwe. Ga bjale, ka ge a le mahlalagading, o boledišana le bagwera ba gagwe, gomme bjalo ka motswadi o ikwa eka ga a sa nyaka go boledišana le wena..

Ge e ba go direga selo se se swanago ka lapeng la gago, o se akgofele go phetha ka gore ngwana wa gago o ba lerabele leo le ka se fetogego. Ka gona go direga’ng? Go araba potšišo yeo, a re ahla-ahleng tema e bohlokwa yeo e kgathwago ke mahlalagadi kgolong ya ngwana wa gago.

Go tloga boseeng go ya pele, bophelo bja ngwana bo tletše ka lelokelelo la dilo tše difsa tšeo a thomago go di dira—megato ya mathomo yeo a e gatago, lentšu la mathomo leo a le bolelago, letšatši la mathomo a le sekolong, ge re bolela feela tše sego kae. Batswadi ba a thaba ge ngwana wa bona a fihlelela mogato o bohlokwa bophelong. Go fihlelela mogato o bjalo go nea bohlatse bja selo se sengwe seo batswadi ba fagahlelago go se bona—kgolo.

Mahlalagadi le ona ke mogato o bohlokwa—gaešita le ge batswadi ba bangwe ba ka se a amogele ka lethabo. Go a kwešišega gore batswadi ba hwetša go le thata ge ngwana wa bona yo a kwago a fetoga mofsa yo a nago le maikwelo a feto-fetogago go sa letelwa. Lega go le bjalo, mahlalagadi ke mogato o bohlokwa wa kgolo. Ka tsela efe?

Beibele e bolela gore ge nako e dutše e e-ya “monna ó tlo tloxêla tata’xwê le mma’xwê.” (Genesi 2:24) Morero o mogolo wa mahlalagadi ke go thuša go lokišeletša morwa goba morwedi wa gago matšatši a lethabo le a manyami ao a tlago. Ka nako yeo, ngwana wa gago o swanetše go bolela bjalo ka ge moapostola Paulo a boletše ge a re: “Ge ke be ke le ngwana, ke be ke bolela bjalo ka ngwana, ke nagana bjalo ka ngwana, ke eleletša bjalo ka ngwana; eupša ka ge bjale ke le monna, ke lahlile mekgwa ya ngwana.”—1 Bakorinthe 13:11.

 Se ke seo morwa goba morwedi wa gago a lebeletšanago le sona nywageng ya mahlalagadi—o tlogela mekgwa ya bjana gomme o ithuta go ba motho yo mogolo yo a nago le boikarabelo, yoo a kgonago go itlhokomela gomme a godile ka mo go lekanego go ka tloga gae. Ge e le gabotse, puku e nngwe ya ditšhupetšo e hlalosa mahlalagadi ka mo go tseneletšego e le nako yeo bafsa ba itokišetšago go tlogela batswadi ba bona.

Lega go le bjalo, ga bjale kgopolo ya gore morwa goba morwedi wa gago o tla ikemela e ka tsoša dipelaelo. O ka botšiša gore:

• “Ge e ba morwa wa-ka a se na boikarabelo bjo bo lekanego go ka hlokomela phapoši ya gagwe, o tla kgona bjang go hlokomela folete?”

• “Ge e ba morwedi wa-ka a sa botegele nako yeo re mmeetšego yona ka gae ka mo go lekanego, o tla kgona bjang go boloka mošomo?”

Ge e ba o tshwenywa ke dikgopolo tše bjalo, gopola se: Boikemelo ga se mojako woo ngwana wa gago a fogo tsena ka wona, eupša ke leeto leo a le sepelago gomme go tšea nywaga go le fetša. Ga bjale, o lemoga gore “bošilo . . . bo xwêrana le pelo ya mošemanyana”—goba ngwanenyana.—Diema 22:15.

Lega go le bjalo, ka tlhahlo ya maleba ngwana wa gago a ka tšwa mahlalagading gomme ya ba motho yo mogolo yo a nago le boikarabelo yo “matla a [gagwe] a tlwaeditšwego a go hlatha, [a] kgethologanyago se se nepagetšego le se se fošagetšego.”—Baheberu 5:14.

Go lokišetša ngwana wa gago yo a lego mahlalagading go ba motho yo mogolo, o swanetše go mo thuša go hlagolela ‘matla a gagwe a tlhaologanyo’ e le gore a ka kgona go itirela diphetho tše dibotse. (Baroma 12:1, 2) Melao ya motheo ya Beibele e latelago e tla go thuša go dira bjalo.

Bafilipi 4:5: “Anke go leka-lekana ga lena go tsebje.” Mohlomongwe ngwana wa gago yo a lego mahlalagading o kgopela gore a tle ka morago ga nako yeo o mmeetšego yona. Bjalo ka motswadi o gana kgopelo yeo le semeetseng. Ngwana wa gago yo a lego mahlalagading o lla ka gore, “O ntshwara bjalo ka ngwana!” Pele o mo araba ka gore, “O itshwere bjalo ka yena,” ela hloko se se latelago: Bafsa ba na le tshekamelo ya go nyaka tokologo yeo e fetago tekano, eupša batswadi ba ka ba le tshekamelo ya go se ba nee tokologo yeo e lekanego. Na e ka ba gore ke wena o mo neago tumelelo ka mehla? Ke ka baka la’ng o sa naganišiše ka pono ya ngwana wa gago?

Bakolose 3:21: “Lena bo-tate, le se ke la tena bana ba lena. Ge e ba go le thabiša go le thata, ba ka kgaotša go leka go le kgahliša.”—International Children’s Bible. Batswadi ba bangwe ba leka go laola bana ba bona ba lego mahlalagading ka mo go feteletšego. E le gore ba mo lokiše, ba ka mo notlelela ka ntlong. Ba mo kgethela bagwera le go theetša dipoledišano tša gagwe ge a le mogaleng a sa tsebe. Eupša se gantši ga se be le mafelelo a mabotse. Go mo notlelela ka ntlong go ka dira gore a nyake go tšhaba; go dula o swaya bagwera ba gagwe diphošo go ka dira gore a bone ba ratega kudu le go feta; go theetša dipoledišano tša gagwe ge a le mogaleng a sa tsebe go ka dira gore a boledišane le bagwera ba gagwe ka sephiring. Ge o dutše o leka go mo laola, o ka feleletša o e-na le taolo e nyenyane. Ke therešo gore ge ngwana wa gago yo a lego mahlalagading a sa ithute go itirela diphetho a sa le gae, o tla tseba bjang go di dira ge a setše a tlogile gae?

Baefeso 6:4: “Le se ke la befediša bana ba lena, eupša tšwelang pele le ba godiša ka tayo le  tlhahlo ya monagano ya Jehofa.” Polelwana yeo e rego “tlhahlo ya monagano” e bolela seo se fetago feela go ruta therešo. E bolela go kgahlegela boitshwaro bja ngwana ka tsela yeo e tlago go tutuetša ditiro tša gagwe. Se se bohlokwa kudu ge ngwana wa gago a tsena mahlalagading. Tate yo a bitšwago Andre o re: “Ge bana ba gago ba dutše ba gola, o swanetše go beakanya matseno a gago gomme o boledišane le bona.”—2 Timotheo 3:14.

Bagalatia 6:7: “Se sengwe le se sengwe seo motho a se bjalago, ke sona seo a tlago go se buna.” Ngwana a ka rutwa ka go otlwa—mohlomongwe o ka mo kgopela go dira selo seo a sa se ratego goba go mo ganetša go dira seo a se ratago. Ge o dirišana le ngwana yo a lego mahlalagading, o swanetše gore o nagane kudu ka ditla-morago.—Diema 6:27.

Bjalo ka motswadi, o duma ge nkabe mahlalagadi e be e le tsela e theogelago yeo ngwana wa gago a bego a ka feta go yona ka lebelo gomme a ba motho yo mogolo. Eupša ga se gantši go lego bonolo go tšea leeto la mahlalagadi. Lega go le bjalo, go ba ga ngwana wa gago mahlalagading go go nea sebaka se sebotse sa go ‘eteletša ngwana tsela ya gagwe.’ (Diema 22:6) Melao ya motheo ya Beibele ke motheo o tiilego wo o ka agago lethabo la lapa go ona.