Babadi ba Rena ba a Botšiša

Na Diphodišo tša Mohlolo ka Moka di tšwa go Modimo?

Ga go pelaelo gore Jehofa Modimo o na le matla a go fodiša. Le gona, ga go pelaelo gore a ka nea barapedi ba gagwe matla ao. Ka mohlala, mehleng ya baapostola, go fodiša ka mohlolo e be e le e nngwe ya dimpho tše kgethegilego tša moya wa gagwe o mokgethwa. Moapostola Paulo o ngwala gore: “Ponagatšo ya moya e newa yo mongwe le yo mongwe bakeng sa morero o holago. Ka mohlala, yo mongwe o newa polelo ya bohlale ka moya, . . . yo mongwe o newa dimpho tša go fodiša ka wona moya woo, . . . yo mongwe o newa go porofeta, . . . yo mongwe o newa maleme a fapanego.”—1 Bakorinthe 12:4-11.

Lega go le bjalo, Paulo o ngwadile lengwalong lona leo le yago go Bakorinthe gore dimpho tša mohlolo tša moya o mokgethwa wa Modimo di be di tla fela. O itše: “Ge go e-na le dimpho tša go porofeta, di tla fedišwa; le ge go e-na le maleme, a tla kgaotša; le ge go e-na le tsebo e tla fedišwa.”—1 Bakorinthe 13:8.

Lekgolong la pele la nywaga, diphodišo tša mohlolo di be di dirwa ke Jesu Kriste le baapostola ba gagwe. Mehleng ya baapostola ge phuthego ya Bokriste e be e sa le e mpsha, dimpho tša moya, go akaretša le bokgoni bja go fodiša, e be e le tša go nea Modimo letago gomme di be di bontšha gore Jehofa o be a amogela e bile a šegofatša phuthego ya Bokriste yeo e bego e sa tšwa go hlongwa. Eupša ge phuthego ya Bokriste e gotše goba e hlomilwe ka mo go feletšego, go e na le gore e šupe dimpho tše kgethegilego, phuthego e ile ya šupa tumelo ya yona e sa šišinyegego, kholofelo le lerato e le pontšho ya go amogelwa ke Modimo. (Johane 13:35; 1 Bakorinthe 13:13) Ka gona, mo e ka bago ka ngwaga wa 100 C.E., diphodišo tša mohlolo tšeo di bego di bontšha go amogelwa ke Modimo di ile tša fela. *

Lega go le bjalo, o ka ipotšiša gore, ‘Ke ka baka la’ng ke sa dutše ke e-kwa ka diphodišo tša mohlolo?’ Ka mohlala, pego e nngwe ya kuranta e bega ka motho yo go thwego o be a swerwe ke kankere. O be a e-na le dirurugi mo hlogong, dipshiong gaešita le ka gare-gare ga marapo. Bokamoso bja gagwe bo be bo bonagala bo sa kgahliše go fihlela letšatšing leo Modimo a “boletšego” le yena. Pego e bolela gore matšatši a sego kae ka morago, kankere ya gagwe e ile ya fola.

Ge o e-kwa ditaba tše bjalo, o re’ng o sa ipotšiše gore: ‘Na pego ye ke therešo? Na go na le lengwalo, bohlatse bja kliniking bjoo bo thekgago taba ye? Le gona ge e ba go e-na le kalafo, na Beibele e ruta gore Modimo o ikarabela ka dilo ka moka tšeo di bonagalago e le diphodišo tša mohlolo?’

Karabo ya potšišo yeo ya mafelelo e tloga e le bohlokwa. Jesu o ile a lemoša balatedi ba gagwe gore: “Phafogelang baporofeta ba maaka . . . Ba bantši ba tla re go nna letšatšing leo, ‘Morena, Morena, na ga se ra ka ra porofeta ka leina la gago, ra leleka batemona ka leina la gago, ra dira mediro e mentši e matla [mehlolo] ka leina la gago?’ Lega go le bjalo, ke tla ba botša ka re: Ga se ka ka ka le tseba! Tlogang go nna lena badiri ba go hloka molao.”—Mateo 7:15, 21-23.

Go molaleng gore seo go thwego ke diphodišo tša mohlolo di ka ba di e-tšwa mothopong o mongwe e sego go Modimo. Gore re pheme go forwa ke batho bao ba bolelago gore ba dira mehlolo ka leina la Modimo, re swanetše go ba le tsebo e nepagetšego ka Modimo, re diriše bokgoni bjoo Modimo a re filego bjona bja go bea mabaka, gomme re ithute go hlaola bao ba dirago thato ya gagwe.—Mateo 7:16-19; Johane 17:3; Baroma 12:1, 2.

[Mongwalo wa tlase]