Na Modimo o Fetoša Monagano wa Gagwe?

BEIBELE e bolela ka Modimo gore: “Go yena ga go na pheto-phetogo ya go fetoga ga moriti.” Le gona, Modimo ka boyena o boletše ka tsela e kgodišago gore: “Nna Jehofa ga k’ešo ka fetoga.” (Jakobo 1:17; Maleaki 3:6, PK) Ruri Jehofa o fapana le batho bao go lego thata go ba kgahliša le bao o ka se kego wa ba bota ka gobane ba dula ba fetola menagano ya bona!

Lega go le bjalo, babadi ba bangwe ba Beibele ba ipotšiša ge e ba Modimo a fetotše monagano wa gagwe. Ka mohlala, nakong e fetilego, Jehofa o ile a nea Bakriste matla a go dira mehlolo, eupša ga bjale ga a sa dira bjalo. Mehleng ya bogologolo, Modimo o ile a dumelela segadikane, eupša ga a sa se dumelela. Molaong wa Moše, Jehofa o be a nyaka gore Sabatha e bolokwe, eupša ga bjale ga a sa nyaka go dirwa bjalo. Na mehlala ye ga e bontšhe gore Modimo o fetogile?

Sa mathomo, re ka kgonthišega gore Modimo ga a fetoše ditekanyetšo tša gagwe tša lerato le toka. Le gona, ‘morero wa gagwe wa neng le neng’ wa go šegofatša batho ka Mmušo wa gagwe ga se wa fetoga. (Baefeso 3:11) Lega go le bjalo, go etša ge o ka fetoša monagano wa gago ka motho yoo boitshwaro bja gagwe ka mehla bo go nyamišago, Jehofa o feto-fetoga le maemo.

Le gona, Modimo o fetoša ditaelo tša gagwe go batho ba gagwe go ya ka maemo le dinyakwa tša bona. Se ga se sa swanela go re makatša. Ela hloko seo mohlahla-baeti yo a nago le bokgoni a bego a ka se dira ge a bona kotsi e letšego ka pele. O be a ka botša sehlopha sa gagwe sa baeti gore se tšee tsela e fapanego, e le gore se tloge kotsing.  Lega go le bjalo, seo ga se bolele gore o fetotše monagano wa gagwe mabapi le lefelo leo a yago go lona. Ka gona, anke re hlahlobeng mehlala e meraro yeo go boletšwego ka yona pejana, yeo ba bangwe ba e bonago e le e makatšago.

Ke ka Baka La’ng Mehlolo e Ile ya Fela?

Ke ka baka la’ng Modimo a ile a nea ba bangwe ba Bakriste ba lekgolong la pele la nywaga matla a go dira mehlolo? O ka ba o lemogile gore ge Baisiraele e be e le setšhaba seo se kgethilwego sa Modimo, gantši Modimo o bontšhitše ka mehlolo gore o be a e-na le bona. Ka Moše, Modimo o ile a bonagatša matla a gagwe a makatšago ge a be a phološa Baisiraele go tšwa Egipita le go ba hlahla lešokeng go fihla ba tsena Nageng ya Kholofetšo. Ka manyami, nako le nako Baisiraele ba be ba sa bontšhe tumelo go yena. Mafelelong ge Jehofa a be a sa amogele Baisiraele gomme a hloma phuthego ya Bokriste, o ile a nea baapostola le ba bangwe matla a go dira mehlolo. Ka mohlala, moapostola Petro le moapostola Johane ba fodišitše monna yo a belegwego a golofetše, gomme Paulo o ile a tsoša monna yo a bego a hwile. (Ditiro 3:2-8; 20:9-11) Mehlolo yeo ba e dirilego e ile ya thuša gore go hlongwe Bokriste dinageng tše dintši. Ka gona, ke ka baka la’ng mehlolo e ile ya fela?

Moapostola Paulo o hlalositše se ka go dira papišo e rego: “Ge ke be ke le ngwana, ke be ke bolela bjalo ka ngwana, ke nagana bjalo ka ngwana, ke eleletša bjalo ka ngwana; eupša ka ge bjale ke le monna, ke lahlile mekgwa ya ngwana.” (1 Bakorinthe 13:11) Go fo swana le ge batswadi ba swara ngwana yo monyenyane ka tsela e fapanego le ge ba swara morwa yo a godilego, Jehofa le yena o ile a fetoša tsela yeo a dirišanago le phuthego ya Bokriste ge e be e se sa le bjalo ka “ngwana.” Moapostola Paulo o hlalositše gore dimpho tša mohlolo tše bjalo ka bokgoni bja go bolela ka maleme a šele goba go porofeta di be di tla “fedišwa.”—1 Bakorinthe 13:8.

Ke ka Baka La’ng go Nyala Segadikane go Ile gwa Dumelelwa?

Jesu o bontšhitše gore Modimo o ile a bea tekanyetšo bakeng sa lenyalo ge a botša batho ba babedi ba pele gore: “Monna o tla tlogela tatagwe le mmagwe a kgomarele mosadi wa gagwe, gomme ba babedi ba e tla ba nama e tee.” (Mateo 19:5) Lenyalo e be e swanetše go ba tlemo ya sa ruri magareng ga batho ba babedi. Lega go le bjalo, nakong ya ge Modimo a rulaganya Baisiraele bjalo ka setšhaba gomme a ba nea Molao, go nyala segadikane e be e šetše e le mokgwa o tlwaelegilego. Ka gona, gaešita le ge Modimo a se a thoma goba go kgothaletša go nyala segadikane, o ile a nea melao bakeng sa go laola go nyala segadikane. Ge phuthego ya Bokriste e be e hlongwa, Lentšu la Modimo ka go lebanya le ile la iletša go nyala segadikane.—1 Timotheo 3:2.

Jehofa Modimo o kgotlelela dilo tše itšego go fihla ka nako ya gagwe ya go di lokiša. (Baroma 9:22-24) Jesu o bontšhitše gore Jehofa o kgotleletše metlwae e sa swanelago ya lenyalo ka nakwana e le feela go e ‘dumelela’ ka baka la “bopelothata” bja Baisiraele.—Mateo 19:8; Diema 4:18.

 Ke ka Baka La’ng go Boloka Sabatha e be e le ga Nakwana?

Modimo o ile a hloma Sabatha ya beke le beke ka morago ga ge a phološitše Baisiraele go tšwa Egipita. Ka morago o ile a dira gore e be karolo ya Molao wa setšhaba. (Ekisodo 16:22-30; 20:8-10) Moapostola Paulo o hlalositše gore Jesu o ile a ineela gore e be sehlabelo gomme o “fedišitše . . . Molao wa ditaelo wo o bopilwego ka melao-taelo” gomme a “phumola lengwalo le le ngwadilwego ka seatla.” (Baefeso 2:15; Bakolose 2:14). Seo se ‘fedišitšwego’ le go ‘phumolwa’ se be se akaretša molao wa Sabatha, ka ge Beibele e tšwela pele ka gore: “Ka gona, a go se be le motho yo a le ahlolago ka go ja le go nwa goba mabapi le monyanya goba go binela go dula ga kgwedi goba sabatha.” (Bakolose 2:16) Bjale, ke ka baka la’ng Modimo a ile a nea Molao, go akaretša le wa Sabatha?

Moapostola Paulo o ngwadile gore: “Molao e bile moetetši wa rena go ya go Kriste.” Ke moka a oketša ka gore: “Ka ge bjale tumelo e fihlile, ga re sa le ka tlase ga moetetši.” (Bagalatia 3:24, 25) Go e na le go fetoša monagano wa gagwe, Modimo o dirišitše Sabatha e le tokišetšo ya nakwana go ruta batho gore ba swanetše go dula ba ipha nako ya go naganišiša ka ditaba tša moya. Gaešita le ge molao wa Sabatha e be e le wa nakwana, o be o bontšha gore nakong e tlago go be go tla ba le nako yeo ka yona batho ba bego ba tla lokologa ditlaišegong tša nama le tša moya.—Baheberu 4:10; Kutollo 21:1-4.

Modimo yo a ka Botwago le yo Lerato

Mehlala ya Beibele yeo go boletšwego ka yona ka mo godimo e bontšha gore Modimo o ile a nea tlhahlo le ditaelo tše fapa-fapanego dinakong tše sa swanego. Eupša seo ga se bolele gore o fetošitše monagano wa gagwe. Go e na le moo, o ile a arabela dinyakweng tša batho ba gagwe ka tlase ga maemo a fapa-fapanego e bile o dirile se bakeng sa go ba hola. Go bjalo le lehono.

Ka ge Jehofa a sa fetoše ditekanyetšo tša gagwe, re ka dula re tseba seo re swanetšego go se dira bakeng sa go mo kgahliša. Go feta moo, re ka kgodišega gore selo le ge sefe seo Modimo a se holofeditšego se tla direga. Jehofa o re: “Ke dira tšohle tše ke di rataxo . . . Ke rerile; ke tlo dira.”—Jesaya 46:10, 11.

[Ntlhakgolo go letlakala 21]

Modimo ga a fetoše ditekanyetšo tša gagwe tša lerato le toka

[Ntlhakgolo go letlakala 22]

Paulo o hlalositše gore ge nako e dutše e e-ya, dimpho tša mohlolo di be di tla “fedišwa.”

[Ntlhakgolo go letlakala 23]

Lenyalo e be e swanetše go ba tlemo ya sa ruri magareng ga batho ba babedi