Na go na le Motho Yoo Ruri a Nago le Taba le Nna?

Na o kile wa ikwa o lewa ke bodutu gomme o hloka thušo e bile o ikwa eka ga go na motho yoo a tlogago a kwešiša mathata ao o nago le ona? Le gona, gaešita le ge ba tseba ka ona, o ile wa ikwa eka ba tloga ba se na taba.

GE GO tsoga mathata, bophelo bja rena bo ka bonagala bo swana le ledimo leo le ka se kgaotšego. Ka dinako tše dingwe, re ka phetha ka gore seo re lebeletšanego le sona ke seo se nyamišago kudu le seo se se nago toka moo re ka se hlwego re sa kgona go se kgotlelela. Seo gantši se direga ge re gateletšegile maikwelong, monaganong, re gobetše kotsing, re e-na le malwetši a sa folego, goba dilo tše di swanago le tšeo. Re ka ikwa re hloka thušo e bile re se na kholofelo moo re ka ipotšišago gore re ka hwetša kae khomotšo. Na go na le motho yoo ruri a nago le taba?

“Modimo wa Khomotšo Yohle” o na le Taba

Ka Beibeleng Modimo o hlaloswa e le “Tate wa dikgaugelo tše bonolo le Modimo wa khomotšo yohle.” (2 Bakorinthe 1:3) Modimo, yoo leina la gagwe e lego Jehofa, o a tseba gore re nyaka khomotšo. Beibele e diriša lentšu “khomotšo” ka dibopego tše di fapa-fapanego ka makga a fetago a lekgolo, e re kgonthišetša gore Modimo ga a kwešiše feela seo re lebeletšanago le sona eupša gape o nyaka go re homotša. Tsebo ye e re kgodiša gore le ge batho ba bangwe ba bonagala ba sa lemoge, ba sa kwešiše, goba ba se na taba le mathata a rena, Jehofa Modimo yena o na le taba.

Taba ya gore Jehofa o hlokomela batho ba gagwe e le motho ka o tee ka o tee e bonagala gabotse ka Mangwalong. Beibele e re: “A mo xo fêla, mahlô a Morêna; a okametše ba babe le ba boló.” (Diema 15:3) Ka mo go swanago, go Jobo 34:21, re bala gore: “Mahlô a xaxwe a bôna ditsela tša motho; ó šetša dikxatô tša xaxwe ka moka.” Jehofa o bona seo re se dirago—se se lokilego le se sebe—gomme o lemoga maemo a rena moo e lego gore a ka arabela ka ditsela tšeo a bonago di lokile. Se se tiišeditšwe ke mantšu ao Hanani mmoni, goba moporofeta, a a boditšego Kgoši Asa wa Juda a rego: “Mahlô a Morêna a tsepeletše lefase ka moka, xore a bônatšê matla a xaxwe ka bao ba lebeletšexo Yêna ka pelo ka moka.”—2 Koronika 16:7, 9.

Jehofa o re hlokomela ka lebaka le lengwe. Jesu o hlalosa ka gore: “Ga go motho yo a ka tlago go nna ge a sa gogwe ke Tate yo a nthomilego.” (Johane 6:44) Jehofa o re hlokomela ka mo go lekanego moo e lego gore o hlahloba pelo ya motho go bona ge e ba e sekametše go Yena. Ge e ba e le bjalo, a ka arabela ka ditsela tšeo di kgahlišago e le ka kgonthe. Ka mohlala, kua Repabliking ya Dominican, mosadi yo mongwe yo a bego a e-na le bolwetši bja kankere o be a le sepetlele bakeng sa go yo buiwa. O ile a kgopela Modimo gore a mo thuše go hwetša bodumedi bja therešo. Ka nako yona yeo, monna wa gagwe o ile a mo tlišetša poroutšha yeo e nago le sehlogo se se rego, Ke Eng Seo Modimo a se Nyakago go Rena? * yeo a ilego a e newa ke yo mongwe wa Dihlatse tša Jehofa yoo a bego a etetše legaeng la gagwe mesong yeo. Mosadi o ile a bala poroutšha yeo gomme a lemoga gore Modimo o be a araba thapelo ya gagwe. O  ile a amogela go ithuta Beibele le Hlatse, gomme ka tlase ga dikgwedi tše tshela, o ile a neela bophelo bja gagwe go Modimo gomme a kolobetšwa.

Ka pukung ya Beibele ya Dipsalme, re hwetša dipolelwana tše dintši tše di ruthetšago pelo tše di boletšwego ke bapsalme ba Baheberu ba bogologolo, ba bjalo ka Kgoši Dafida, tšeo di hlalosago tlhokomelo e lerato ya Jehofa go bahlanka ba gagwe. Go Psalme 56:8, Kgoši Dafida o lopa Modimo ka gore: “Mexôkxô ya-ka e bolokê sebyaneng sa xaxo; a xa ke re: Di pukung ya xaxo?” Ka ge papišo ye e bontšha, Dafida o be a tseba gore Jehofa o be a lemoga tlaišego ya gagwe gaešita le bohloko bjoo a bego a bo kwa. Jehofa o be a lemoga bohloko bjoo Dafida a bego a bo kwa gomme o ile a gopola seo Dafida a ilego a lebeletšana le sona maikwelong seo se dirilego a gore a lle. Ee, Mmopi wa rena o hlokomela bohle bao ba katanelago go dira thato ya gagwe, “bao ba lebeletšexo Yêna ka pelo ka moka.”

Karolo e nngwe ya Beibele yeo e hlalosago tlhokomelo e lerato ya Modimo ke Psalme e tumilego ya bo-23. Mantšu a mathomo a swantšha Modimo le modiši yo lerato ka gore: “Morêna ké modiši wa-ka; nka se hlôke selô.” Modiši wa Bohlabela bja Magareng o hlokomela e nngwe le e nngwe ya dinku tša gagwe, e bile o di rea le maina. Letšatši le lengwe le le lengwe o bitša nku e nngwe le e nngwe gomme ka lerato o e phophola e le gore a lebelele ge e ba e gobetše. Ge a hwetša gore e gobetše, o e tlotša ka oli gore e kgone go fola ka pela. Ge e ba nku e babja, modiši a ka e nweša sehlare gomme a e emiša e le gore e se ke ya robala fase gomme ya hwa. Ka kgonthe, ye ke papišo e botse yeo e bontšhago kamoo Jehofa a hlokomelago bao ba retologelago go yena.

 Thapelo le Tsogo—Bohlatse bja Gore Modimo o na le Taba le Rena

Dipsalme tše gotee le tše dingwe tše dibotse ga di a ngwalwa ka Beibeleng gore re di bale feela le go di thabela. Di re bontšha kamoo bahlanka ba Jehofa ba ba botegago ba nakong e fetilego ba ilego ba tšhollela Jehofa sa mafahleng bakeng sa go bontšha kamoo ba bego ba nyaka thušo ya Modimo ka gona gotee le go bontšha tebogo ya bona bakeng sa tlhahlo le ditšhegofatšo tša gagwe. Mantšu a bjalo a bontšha gabotse gore bahlanka bao ba bogologolo ba Modimo ba be ba dumela e le ka kgonthe gore Modimo o na le taba le bona. Go bala le go naganišiša ka mantšu a ao a tšwago pelong go ka re thuša gore le rena re ikwe ka tsela e swanago ka Modimo. Tokišetšo ya thapelo ke bohlatse bjo matla bja gore Modimo o na le taba le rena.

Lega go le bjalo, ka dinako tše dingwe re ikwa re imelwa ke bothata moo re sa kgonego le go bo rapelela. Na seo se palediša Jehofa go tseba mathata a rena? Baroma 8:26 e araba ka gore: “Moya le wona o kopanela ka thušo bakeng sa bofokodi bja rena; gobane bothata bja seo re swanetšego go se rapelela go etša ge re swanetše ga re bo tsebe, eupša moya ka bowona o re phophothela ditsetselong tše re di hlokelago mantšu.” Lengwalo le le re botša gore dithapelo tša bahlanka ba Jehofa ba nakong e fetilego di ka bontšha maikwelo a rena gomme Jehofa, “Mokwi wa thapelo,” a ka di amogela eka di tšwa go rena.—Psalme 65:2.

Kholofelo ya tsogo ke bohlatse bjo bongwe bjo bo kgodišago bja gore Modimo o kgahlegela motho yo mongwe le yo mongwe. Jesu Kriste o itše: “Nako e a tla yeo ka yona bohle bao ba lego mabitleng a kgopotšo ba tlago go kwa lentšu la gagwe [Jesu] gomme ba tšwa.” (Johane 5:28, 29) Lentšu la Segerika leo le dirišitšwego mo le fetoletšwe gabotse e le “mabitleng a kgopotšo” e sego feela “mabitleng.” Le fetiša kgopolo ya gore pego ya bophelo ya motho yo a hwilego e gopolwa ke Modimo.

Nagana feela, go tsoša motho yo mongwe bahung, Modimo o swanetše go tseba selo se sengwe le se sengwe ka motho yoo, go akaretša le kamoo a bego a bogega ka gona, mekgwa yeo a bego a e abetše le yeo a ilego a e hlagolela gotee le mogopolo wa gagwe ka moka! (Mareka 10:27) Modimo ga a lebale mogopolo wa motho yo bjalo gaešita le ka morago ga nywaga e dikete. (Jobo 14:13-15; Luka 20:38) Ka gona, ba dimilione tše dikete bao ba hwilego ba mogopolong wa Jehofa Modimo ka mo go feletšego—e lego bohlatse bjo bo kgodišago bja gore Modimo o na le taba le rena re le motho ka o tee ka o tee!

Jehofa ke Moputsi

Ke’ng seo re swanetšego go se dira e le gore re amogele tlhokomelo e lerato ya Modimo? Se bohlokwa kudu ke gore re swanetše go bontšha gore re a mmota e bile re a mo kwa le gore re na le tumelo go yena. Moapostola Paulo o bontšha tswalano magareng ga go ba le tumelo le go thabela tlhokomelo ya Modimo. O ngwadile gore: “Ka ntle le tumelo go kgahliša Modimo gabotse ga go kgonege, gobane yo a batamelago Modimo o swanetše go dumela gore o gona le gore e ba moputsi wa bao ba mo tsomago ka phišego.”—Baheberu 11:6.

Ela hloko gore tumelo yeo e kgahlago Modimo e akaretša dilo tše pedi. Sa pele, re swanetše go “dumela gore o gona,” ke gore, re swanetše go dumela gore Modimo o a phela le gore ke Mmuši wa rena yo Mogolo, yoo a swanelwago ke gore re mo kwe le go mo rapela. Sa bobedi, re swanetše go dumela gore ke “moputsi wa bao ba mo tsomago ka phišego.” Tumelo ya kgonthe e akaretša go dumela gore Modimo o kgahlegela katlego ya batho ka moka bao ba tsomago go dira thato ya gagwe ka phišego le gore ba bjalo o a ba putsa. Ka go ithuta lentšu la Modimo le go gwerana le bao ba mo kwago, le wena o ka ba le tumelo yeo e dirago gore Modimo a go putse le go go nea tlhokomelo e lerato.

Batho ba bantši lehono ba nagana gore Modimo ga a kgahlegele seo batho ba se dirago. Eupša ka ge re bone, Beibele e bontšha gabotse gore Modimo o hlokomela kudu bao ba bontšhago tumelo ya kgonthe go yena. Gaešita le ge bophelo lehono bo tletše ka mathata, dipelaelo, go nyama le go kwa bohloko, ga se ra swanela go itlhoboga. Jehofa Modimo o na le taba le rena. Ge e le gabotse, o re laletša ka lerato gore re retologele go yena bakeng sa thekgo. Mopsalme o re: “Lahlêla Morêna morwalô wa xaxo; Yêna ó tlo Xo babalêla; a ka se kê a bá a lesa moloki xe a ka šuthišwa.”—Psalme 55:22.

[Mongwalo wa tlase]

[Box/​Picture on page 29]

Mangwalo ao a ka Matlafatšago Tumelo ya Gago ya Gore Modimo o go Hlokomela ka Lerato

“Mahlô a Morêna a tsepeletše lefase ka moka, xore a bônatšê matla a xaxwe ka bao ba lebeletšexo Yêna ka pelo ka moka.”—2 KORONIKA 16:9

“Mexôkxô ya-ka e bolokê sebyaneng sa xaxo; a xa ke re: Di pukung ya xaxo?”—PSALME 56:8.

“Morêna ke modisi wa-ka; nka se hlôke selô.”—PSALME 23:1.

“Batho ka moka ba tla xo Wene Mokwi wa dithapêlô.”—PSALME 65:2.

“Wa tlo mpitsa ka Xo arabêla, Ò hloloxetšwe ’bopya sa diatla tš’axo.”—JOBO 14:15.

“Yo a batamelago Modimo o swanetše go dumela gore o gona le gore e ba moputsi wa bao ba mo tsomago ka phišego.”—BAHEBERU 11:6.

“Lahlêla Morêna morwalô wa xaxo; Yêna ó tlo Xo babalêla; a ka se kê a bá a lesa moloki xe a ka šuthišwa.”—PSALME 55:22