Kamoo o ka Kwešišago Beibele ka Gona

3. Amogela Thušo ya ba Bangwe

Ge monyakišiši Edward John Eyre a be a tšea leeto go phatša Molala wa leganata wa Nullarbor, Badudi ba moo ba ile ba ruta Eyre kamoo a swanetšego go ga meetse ka gona mebotong ya lešabašaba le mehlareng ya mepulukomo. Go amogela keletšo ya bao ba tsebago lefelo leo go ile gwa phološa bophelo bja Eyre.

BJALO ka ge mohlala wo o bontšha, go phetha modiro o thata kudu ka katlego gantši go nyaka gore go hwetšwe thušo ya motho yo a nago le phihlelo ya wona. Go nyakega se se swanago ge go tliwa tabeng ya go bala Beibele.

Jesu o be a sa letela gore balatedi ba gagwe ba kwešiše Beibele ba sa thušwe ke motho. Lebakeng le lengwe, o ile “a bula menagano ya bona ka mo go feletšego gore ba kwešiše seo se bolelwago ke Mangwalo.” (Luka 24:45) Jesu o be a tseba gore bao ba balago Beibele ba nyaka thušo e le gore ba kwešiše dithuto tša Mangwalo.

Thušo e Tšwago go Mang?

Jesu o ile a laela balatedi ba gagwe ba therešo gore ba nee thušo ye. Pele ga ge a ka rotogela legodimong, Jesu o neile taelo e rego: “Ka gona, e-yang le dire batho ba ditšhaba ka moka barutiwa, . . . le ba ruta go boloka dilo tšohle tšeo ke le laetšego tšona.” (Mateo 28:19, 20) Modiro o  mogolo wa Bakriste o akaretša go ruta, e lego seo se akaretšago go hlalosa kamoo melao ya motheo ya Beibele e ka dirišwago ka gona bophelong bja letšatši le letšatši. Bakriste ba therešo ba thuša ba bangwe go kwešiša Beibele.

Go se go ye kae ka morago ga gore Jesu a nee balatedi ba gagwe taelo yeo, go ile gwa ba le tiragalo e kgahlišago. Beibele e bolela ka molaki wa kgoši yo a tšwago Ethiopia yo a bego a bala karolo ya boporofeta bja Jesaya. O ile a kopana le ditemana tše dingwe tšeo a bego a sa di kwešiše. Go ya ka pego ya Beibele, ditemana tšeo di balega ka gore: “O išitšwe tlhabong go etša nku, le go etša kwana e ikhomoletšego pele ga mokoti wa yona, ga a ahlamiše molomo wa gagwe. Nakong ya go kokobetšwa ga gagwe, kahlolo e ile ya tlošwa go yena. Ke mang yo a ka re botšago ditaba ka botlalo ka moloko wa gagwe? Gobane bophelo bja gagwe bo tlošitšwe lefaseng.”—Ditiro 8:32, 33; Jesaya 53:7, 8.

Molaki yo o ile a botšiša Filipi, e lego Mokriste yo a nago le phihlelo yo a bego a e-na le tsebo ya Mangwalo, gore: “Ke a go kgopela, Moporofeta o bolela se mabapi le mang? Na o bolela ka yena goba ka motho yo mongwe?” (Ditiro 8:34) Moethiopia yo yo a botegago o be a šetše a kile a ya  Jerusalema go yo rapela gomme ga go pelaelo gore o ile a rapelela tlhahlo. Go molaleng gore o be a bala ka go nyaka go tseba le ka boikokobetšo. Eupša molaki o be a sa dutše a sa kwešiše ditemana tšeo. Ka boikokobetšo, o ile a kgopela Filipi thušo. Tlhaloso ya Filipi e ile ya thabiša monna yo kudu moo a ilego a tutueletšega go ba Mokriste.—Ditiro 8:35-39.

Dihlatse tša Jehofa di tšwetša pele modiro woo o bego o dirwa ke Filipi le Bakriste ba bangwe ba lekgolong la pele la nywaga. Dinageng tše fetago 235, Dihlatse di ithaopela go thuša batho go kwešiša seo ge e le gabotse Beibele e se rutago. Di dira se ka thuto ya Mangwalo ya dipoledišano. Mokgwa wo woo o tšwelago pele wa thuto ya Beibele o akaretša go seka-sekwa ga seo Beibele e se bolelago ka taba e itšego. *—Bona lepokisi le le rego  “Dikarabo tše di Kgotsofatšago tša Dipotšišo.”

“Dipotšišo Tša-ka ka Moka di Ile tša Arabja”

Steven, Valvanera le Jo-Anne, bao ba tsopotšwego sehlogong sa mathomo, ba ile ba thoma go ithuta Beibele le Dihlatse tša Jehofa. Steven o re: “Seo se mmakaditšego ke gore gantši go be go hwetšwa therešo ka go fo bapetša melao ya motheo goba dipego tša Mangwalo. Pele ga thuto ya-ka ya Beibele, ga go motho yo a kilego a mpontšha kamoo nka dirago seo ka gona. E be e le mo go imollago go tseba gore Beibele e be e se ya tlala ka dipoledišano tše sa felego le dikgopolo tše di thulanago.”

Valvanera o dumelelana le seo. O re: “Dilo ka moka di be di nyalelana e bile di kwagala. Dilo tšeo e be e le therešo, e sego feela ka gobane di bolelwa ke Kereke, eupša ka gobane go be go e-na le tlhaloso e kwagalago ya dilo tšohle.” Jo-Anne o anega ka gore: “Taba ya gore dipotšišo tša-ka ka moka di ile tša arabja go tšwa Beibeleng e ile ya ntira gore ke hlomphe Mongwadi wa yona kudu, ka ge a bile le ponelo-pele ya go ngwala karabo e swanetšego ya potšišo e nngwe le e nngwe yeo motho a ka e botšišago.”

Na go na le yo mongwe wa Dihlatse tša Jehofa yoo o mo tsebago? O re’ng o sa mo kgopele gore a go bontšhe kamoo lenaneo le la thuto le swarwago ka gona? Ge e ba o sa tsebe le o tee wa Dihlatse tša Jehofa, hle ngwalela go e nngwe ya diaterese tšeo di lokeleditšwego go letlakala 4 la makasine wo. Ka moya wa Modimo, monagano o bulegilego le ka go thušwa ke morutiši yo a swanelegago wa Beibele, ga se wa swanela go thatafalelwa ke go kwešiša Lentšu la Modimo. O ka kwešiša Beibele!

[Mongwalo wa tlase]

[Box/​Picture on page 8]

 Dikarabo tše di Kgotsofatšago tša Dipotšišo

Tše dingwe tša ditaba tšeo Dihlatse tša Jehofa di di ahla-ahlago lenaneong la bona la thuto ya Beibele:

• Morero wa Modimo ka lefase ke ofe?

• Bahu ba kae?

• Na re phela “mehleng ya bofelo”?

• Ke ka baka la’ng Modimo a dumelela tlaišego?

• Nka dira bjang gore bophelo bja lapa la-ka bo thabiše?

[Diswantšho go letlakala 7]

Gore o kwešiše Beibele . . . rapelela moya wa Modimo, bala ka monagano o bulegilego, amogela thušo ya ba bangwe