Seo re Ithutago Sona go Jesu

Mabapi le Bokamoso bja Batho

Na Jesu o ile a holofetša bophelo bja legodimong?

Ee, o bo holofeditše! Jesu ka boyena o ile a tsošwa, gomme a rotogela legodimong gore a yo ba le Tatagwe. Eupša pele ga lehu la gagwe le go tsošwa ga gagwe, o boditše baapostola ba gagwe ba botegago ba 11 gore: “Ntlong ya Tate go na le madulo a mantši. . . . Ke a tloga ke ya go le lokišetša lefelo.” (Johane 14:2) Lega go le bjalo, bao ba tlago go amogela tokelo ye e be e tla ba ba mmalwa. Jesu o ile a hlalosa taba ye ka mo go kwagalago ge a be a botša barutiwa ba gagwe gore: “Se boife, wena mohlatswana, gobane Tatago lena o kgahlilwe ke go le nea mmušo.”—Luka 12:32.

Ke eng seo “mohlatswana” o yago go se dira legodimong?

Tate o nyaka gore sehlopha se se senyenyane se be karolo ya mmušo wa legodimong gotee le Jesu. Re tseba bjang se? Ka morago ga go tsošwa ga gagwe, Jesu o ile a utollela moapostola Johane gore ba bangwe ba ba botegago “ba tla buša e le dikgoši godimo ga lefase.” (Kutollo 1:1; 5:9, 10) Tše ke ditaba tše dibotse. Se sengwe sa dinyakwa tše dikgolo kudu tša batho ke mmušo o mobotse. Ke’ng seo se tlago go fihlelelwa ke mmušo wo woo o Jesu e lego mmuši wa wona? Jesu o itše: “Nakong ya go bopša lefsa ga dilo, ge Morwa wa motho a dula sedulong sa gagwe sa bogoši sa letago, lena ba le ntatetšego le lena le tla dula didulong tše lesome-pedi tša bogoši, le ahlola meloko e lesome-pedi ya Isiraele.” (Mateo 19:28) Pušo ya Jesu le balatedi ba gagwe e tla feleletša ka “go bopša lefsa” goba go tsošološwa  ga maemo a phethagetšego ao batho ba babedi ba pele ba a thabetšego mo lefaseng pele ba dira sebe.

Ke kholofelo efe yeo Jesu a ilego a e holofetša batho ka moka?

Batho ba be ba bopetšwe go phela mo lefaseng go fapana le Jesu, yoo a bego a bopetšwe go phela legodimong. (Psalme 115:16) Ka gona, Jesu o itše: “Le tšwa mafelong a tlase; nna ke tšwa mafelong a godimo.” (Johane 8:23) Jesu o boletše ka bokamoso bjo bo kgahlišago bja batho mo lefaseng. Ka nako e nngwe o itše: “Go thaba ba moya o boleta, ka ge ba tla ja bohwa bja lefase.” (Mateo 5:5) O be a šupa mantšung a psalme e buduletšwego a rego: “Ba bolêta e tlo ba bôná beng ba naxa; ba tlo thaba ka botlalô bya moláô. Baloki e ba beng ba naxa, ba dula mo xo yôna ka mehla le ka mehla.”—Psalme 37:11, 29.

Ka gona, “mohlatswana” wo o yago legodimong ga se wona feela o tlago go hwetša bophelo bjo bo sa felego. Jesu gape o ile a bolela ka kholofelo e bulegetšego batho ba bangwe ka moka ba dimilione. O itše: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”—Johane 3:16.

Modimo o tla imolla batho bjang tlaišegong?

Jesu o boletše ka go imollwa methopong e mebedi ya tlaišo ge a be a re: “Bjale lefase le le a ahlolwa; bjale mmuši wa lefase le o tla lahlelwa ntle.” (Johane 12:31) Sa pele, batho ba sa boifego Modimo bao ba bakago tlaišego ba tla ahlolwa le go fedišwa. Sa bobedi, Sathane o tla lahlelwa ntle gomme a ka se sa timetša batho le gatee.

Go thwe’ng ka bao go theoša le histori ba ilego ba phela ba ba ba hwa ntle le go hwetša sebaka sa go ithuta ka Modimo le Kriste le go bontšha tumelo go bona? Jesu o boditše modirabobe yo a ilego a hwa hleng ga Gagwe gore: “O tla ba le nna Paradeiseng.” (Luka 23:43) Motho yoo, go akaretša le ba bangwe ba dimilione, o tla ba le sebaka sa go ithuta ka Modimo ge Jesu a mo tsoša bahung paradeiseng mo lefaseng. Ka nako yeo o tla ba le sebaka sa go ba gare ga ba boleta le baloki bao ba tlago go hwetša bophelo bjo bo sa felego mo lefaseng.—Ditiro 24:15.

Bakeng sa go hwetša tsebišo e oketšegilego, bona dikgaolo 3 le 7 tša puku ya Ke Eng Seo ge e le Gabotse Beibele e se Rutago? *

[Mongwalo wa tlase]

[Seswantšho go letlakala 23]

“Baloki e ba beng ba naxa, ba dula mo xo yôna ka mehla le ka mehla.” —Psalme 37:29