BODUMEDI bjo bo lokilego bo phagamiša tsela ya rena ya go nagana e bile bo re bontšha kamoo re kaonefatšago boitshwaro bja rena. Bo a re thekga ge re katanela go dira se se lokilego e bile bo re thuša go ba ba bakaone-kaone ka mo go ka kgonegago. Re tseba bjang gore bodumedi bjo bo lokilego bo dira seo?

Ela hloko seo moapostola Paulo a se ngwaletšego Bakriste ba lekgolong la pele la nywaga ba dulago Korinthe, Gerika. Motse woo wa bogologolo o be o tsebja ka boitshwaro bjo bo gobogilego. Paulo o lemošitše ka gore: “Ge e le diotswa goba ba medimo ya diswantšho goba dihlotlolo goba banna ba go gweba ka mmele goba banna ba go robala le banna goba mahodu goba ba megabaru goba matagwa goba bathomeletši goba bahlalefetši ba ka se je bohwa bja mmušo wa Modimo.” Ke moka Paulo o okeditše ka gore: “Seo ke se ba bangwe ba lena le bego le le sona. Eupša le hlatswitšwe, le kgethagaditšwe, le lokafaditšwe ka leina la Morena Jesu Kriste le ka Moya wa Modimo wa rena.” (1 Bakorinthe 6:9-11, The Holy Bible—New International Version) Nagana feela—bodumedi bjo bo lokilego bo thušitše ba bangwe bao nakong e fetilego ba bego ba se na ditekanyetšo tša boitshwaro gore e be bahlanka ba hlwekilego le ba lokilego ba Modimo!

Ka mo go fapanego, Beibele e lemoša ka gore: “Xo tlo tla lebaka le ba ka se kexo ba kxôna xo theetša thutô ye e phedilexo; ba tlo ikxobêla baruti ka xo ya le dikxanyoxô tša bôná, ka xo rata xo kwiša ditsêbê bose.”—2 Timotheo 4:3.

Madumedi ao o a tsebago a dira bjang tabeng ye? Na a latela ditekanyetšo tša Beibele tše phagamego tša boitshwaro? Goba na a fokodiša keletšo e kwagalago e hwetšwago ka Lentšung la Modimo, ba botša batho seo se ‘kwišago ditsebe bose’?

Go go thuša go bona ge e ba bodumedi bjo itšego bo tšweletša dienywa tše dibotse, o re’ng o sa iphe nako ya go araba dipotšišo tše di latelago?

SEO BEIBELE E SE RUTAGO: “Lenyalo le swanetše go godišwa ke yo mongwe le yo mongwe, gomme monna le mosadi ba swanetše go lota lenyalo la bona le sekile. Modimo o bona molato bao ba tšeago karolo dibeng tša tša botona le botshadi.”—Baheberu 13:4, New Century Version.

POTŠIŠO: Na bodumedi bjo bo nyaka gore go ditho tša bjona, baratani bao ba dulago gotee ba nyalane ka molao?

SEO BEIBELE E SE RUTAGO: Ge a be a botšišwa ge e ba go e-na le lebaka le ge e le lefe la tlhalo, Jesu o itše: “E mongwe le e mongwe e a hlalago mosadi wa gagwe, ga e se ka baka la bootswa, gomme a tšea e mongwe, o a otswa.”—Mateo 19:9, PK.

POTŠIŠO: Na bodumedi bjo bo hlompha tlhahlo ya Jesu gomme bo dumelela tlhalo le go nyala gape—motheong wa boitshwaro bjo bo gobogilego feela?

SEO BEIBELE E SE RUTAGO: “Bootswa bo thšabeng-xê. Dibe tšohle tše motho a di diraxo, di ntlê xa mmele wa xaxwe. E a diraxo bootswa yêna ó senyetša mmele wa xaxwe.”—1 Bakorinthe 6:18, Beibele ya Sepedi.

“Basadi ba bôná ba tloxêla modirêlô wo ba o bopetšwexo, ba tšea modirêlô wo ba sa kaxo ba bopêlwa wôna; Banna ba tla ba tloxêla  modirêlô wo ba o bopetšwexo wa xo dula le mosadi, ba fišêxêlana monna à duma monna, ba dira tša dihlong; xomme kôtlô ya phapoxô ba e bôna mebeleng ya bôná.”—Baroma 1:26, 27, Beibele ya Sepedi.

POTŠIŠO: Na bodumedi bjo bo ruta gore boitshwaro bjo bo gobogilego bja tša thobalano magareng ga monna le mosadi goba magareng ga batho ba babedi ba bong bjo bo swanago ke sebe?

SEO BEIBELE E SE RUTAGO: “Le se kê la hlakana le motho yo Le rexo ké ngwana weno, moka a ba seotswa, a ba wa mexabaru, a ba wa medimo e šele, a ba wa maroxa, a ba letaxwa, a ba mohlakodi. Motho wa mohuta woo, le xo ja Le se kê la ja le yêna.” (1 Bakorinthe 5:11, Beibele ya Sepedi) Go swanetše go direga’ng ka bao ba ipitšago Bakriste eupša e le badiradibe ba sa itsholego? Lentšu la Modimo le re: “Tlošang motho-mobe mo xare xa lena.”—1 Bakorinthe 5:13, Beibele ya Sepedi.

POTŠIŠO: Na bodumedi bjo bo raka setho le ge e le sefe seo se hlokomologago ditekanyetšo tša Beibele ka go se itshole?