Lengwalo le le Tšwago Bolivia

Go Thaba le go ba le Kholofelo go sa Šetšwe Bodiidi

LE GE ke hlankela ke le moromiwa nageng yeo e hlabologago, ga ke tlwaele go bona bodiidi le go hloka kholofelo. Ke nyaka go bona yo mongwe le yo mongwe a imologa gatee-tee tlaišegong. Eupša ke tseba gore ke Mmušo wa Modimo feela woo o tlago go rarolla mathata a. Lega go le bjalo, ke bone gantši gore batho bao ba latelago Lentšu la Modimo ba hwetša lethabo go sa šetšwe maemo a sa kgahlišego. Sabina ke yo mongwe wa bona.

Nywageng e fetilego, Sabina, a kukile barwedi ba gagwe ba babedi ba banyenyane, o ile a lebelela monna wa gagwe a namela pese ya kgale e le ge a e-ya go nyaka mošomo o lefago tšhelete ya go tsebalega nageng e nngwe. Go ile gwa feta dikgwedi le nywaga a letetše gore monna wa gagwe a boe gae, eupša ga se a ka a boa. Ga e sa le monna wa gagwe a sepela, Sabina o ile a šoma ka thata letšatši le letšatši bakeng sa go hlokomela yena le barwedi ba gagwe, e lego Milena le Ghelian.

Ke kopane le Sabina la mathomo thapameng e nngwe ge a be a thuša bareki bao ba mo ema-emišago ka lebenkeleng la mogolo’agwe ka go se fele pelo. Ke be ke kgona go bona ka mahlo a Sabina gore o be a šomile ka thata mosegare ka moka. Ke ile ka mmotša gore ke be ke nyaka go ithuta Beibele le yena gotee le barwedi ba gagwe. O ile a re: “Nka rata go ithuta, eupša ke fo ba ke swaregile kudu. Lega go le bjalo, nka rata gore barwedi ba-ka ba ithute le wena.” Ke ile ka dumela. Ge thuto ya barwedi ba gagwe e be e tšwela pele, ke ile ka thoma go tseba Sabina gomme ka kwešiša le mathata a gagwe.

Letšatši la Sabina le be le thoma ka 4:00 mesong. Ge barwedi ba gagwe ba sa robetše ka ntlong ya bona ya phapoši e tee, Sabina o gotetša mollo ka fase ga pitša e kgolo yeo e dirišwago kudu ya morodi. O apea nama yeo a tlago go e tšhela ka gare ga di-pie tšeo a di rekišago bakeng sa go hlokomela lapa la gagwe. Bošego, Sabina o be a duba hlama yeo a tlago go dira di-pie tšeo tša nama ka yona.

Ka kelohloko, Sabina o nametša koloyaneng ya go kgorometšwa yeo a e adimilego ditlabakelo ka moka tšeo a tlago go di diriša mosegare—sešira-letšatši, setofo sa gase sa poleiti e tee, lepotlelo la gase, tafola, ditulo, dipitša le makhura gotee le nama le hlama le dilithara tše mmalwa tša jusi yeo a itiretšego yona.

Ka 6:00 mesong, Sabina le barwedi ba gagwe ba itokišeditše go sepela. Ba tswalela mojako le go o notlela ka sekgonyu. Difahlego tša bona ga di bontšhe go thaba goba go nyama; ga go yo a bolelago goba yo a segago. Tlhokomelo ya bona ka moka e lebišitšwe mošomong woo ba tlago go o dira. Ke bone ditiragalo tša mohuta wo di direga mesong e mentši ke le lefasetereng la legae la rena la baromiwa. Ee, Sabina e fo ba e le yo mongwe wa basadi ba bantši bao ba tšwago magaeng a  bona ka masa go yo rekiša dijo le dino ditarateng tša Bolivia.

Ka 6:30 mesong, ge letšatši le tšwelela thabeng, Sabina le barwedi ba gagwe ba fihla sekhutlong sa bona. Ka setu, ba fološa ditlabakelo koloyaneng gomme ba hloma khitšhi ya bona ya go hloma o hlomolla. Pie ya mathomo e tsentšhwa ka makhureng ao a belago gomme e thoma go gadikega. Monko o bose o thoma go tlala moyeng o fodilego wa mesong gomme kapejana o gogela bareki bao ba swerwego ke tlala.

Sabina o botšiša moreki wa pele gore, “Tše kae?” Monna yo a sa swerwego ke boroko o emiša menwana e mebedi a lebeletše fase gomme Sabina o mo nea di-pie tše pedi tšeo di gadikegilego gabotse tše fišago kudu. Ke moka o tšea tšheletiana yeo a lefšago ka yona. Go direga se se swanago ka makga a makgolo mosegare ka moka. Ge ba rekiša pie ya mafelelo, ba a phutha gomme ba boela gae. Gaešita le ge maoto a Sabina a le bohloko ka baka la mošomo wa mesong, o ya mošomong wa gagwe wa bobedi lebenkeleng la mogolo’agwe.

Ge ke fihla lebenkeleng bakeng sa go ithuta Beibele ka lekga la pele le barwedi ba gagwe, go be go šetše go beilwe dipankana tše pedi sekhutlwaneng. Go tloga mathomong, Milena le Ghelian, bao ka nako yeo ba bego ba e-na le nywaga e 9 le 7, ba be ba lebeletše pele ka lethabo thutong e nngwe le e nngwe gomme ba lokišeditše gabotse. Ganyenyane-ganyenyane, banenyana ba bao ba nago le dihlong ba ile ba thoma go phuthologa le go ntumelela go ba mogwera wa bona. Ge Sabina a bona se o ile a kgomega pelo. Kapejana o ile a dira phetho ya gore go sa šetšwe go swarega kudu ga gagwe, le yena o be a tla ithuta Beibele le nna.

Ge tsebo ya Sabina e dutše e gola, le lerato leo a ratago Jehofa Modimo ka lona le ila la gola. O ile a thoma go ba le selo seo a bego a se a se tlwaela—lethabo! Morekiši wa setarateng yo lebakeng le lengwe a bego a bonagala a lapile gomme a nyamile ga bjale o be a bonagala e le yo a fapanego. O be a otlologile gomme sefahlego sa gagwe se edile. Mogolo’agwe o ile a bolela gore: “Sabina o dula a myemyela. O be a sa ke a myemyela.” Ba bangwe ka mo go swanago ba ile ba bona phetogo e kgolo go Sabina le barwedi ba gagwe. Senyakwa sa moya seo a bego a e-na le sona ka nako e telele se be se kgotsofatšwa.

Sabina o be a thabela thuto ya gagwe, eupša go swarega ga gagwe ka mehla go ile gwa mo palediša go ya dibokeng tša Bokriste. Mafelelong, o ile a amogela taletšo ya-ka ya gore a etele Holong ya Mmušo. Ka morago ga moo, ga se a ka kgaotša go ya dibokeng. Sabina o ile a hwetša bagwera ba kgonthe ka phuthegong. O ile a ba a lemoga gore Jehofa ruri o hlokomela bao ba mo ratago gomme ba dira boikgafo bakeng sa go mo hlankela.—Luka 12:22-24; 1 Timotheo 6:8.

Sabina o be a rata seo a bego a ithuta sona gomme a nyaka go se botša ba bangwe. Eupša o ile a re: “Ke tšhoga kudu nako la nako ge ke nagana ka go bolela phatlalatša.” O naganne ka gore, ‘Ke bjang nna, mosadi yo boi le yo a sa rutegago, nka tsogago ke kgonne go ruta motho yo mongwe?’ Lega go le bjalo, botho bjo a ilego a bo bontšhwa le diphetogo tše kgahlišago tšeo a bilego le tšona bophelong bja gagwe di ile tša mo tutueletša go gata mogato wo o bohlokwa. O ile a lemoga le gore barwedi ba gagwe ba be ba mo lebelela e le mohlala wa bona. Ka baka leo, o ile a thoma go botša ba bangwe ditaba tše dibotse. Barwedi ba gagwe ba ile ba mo latela ka mafolofolo.

Lehono, Sabina ga e sa le feela mosadi yo mongwe wa modiidi yo a šomago ka thata letšatši le letšatši a se na lethabo. Boemo bja gagwe bja tša boiphedišo ga se bja fetoga gakaalo. Seo se fetogilego ke pono ya gagwe ka bophelo. Ga bjale, bjalo ka Mokriste yo a kolobeditšwego, o bolela le ba bangwe ka ditaba tše dibotse tša Mmušo wa Modimo—tharollo feela ya sa ruri ya bodiidi bja lefase le go hloka kholofelo.—Mateo 6:10.

Ke 5:00 mesong gomme Sabina o itokišeditše gape go tšwa ka ntlong ya gagwe ya phapoši e tee. Eupša mesong ye ga a ye go rekiša di-pie. O ya go kopana le sehlopa sa Bakriste-gotee gore ba yo dira boboledi setarateng. Go gafa e nngwe ya nako ya gagwe beke le beke go thuša ba bangwe go mo tlišeditše lethabo le oketšegilego bophelong bja gagwe. O notlela mojako gomme ka go myemyela o wela tsela. Go e na le go kgorometša koloyana, o rwele mokotla. Ka gare ga wona go na le Beibele ya gagwe gotee le dikgatišo tšeo a tlago go di diriša go phatlalatša molaetša wa kholofelo go ba bangwe. A myemyela ka kgodišego, Sabina o re, “Ga se ka ka ka lora gore nka kgona go bolela le ba bangwe ka Beibele.” O oketša ka gore, “Ke thabela seo!”