Babadi ba Rena ba a Botšiša

Jesu le Tatagwe ke Batee ka Tsela Efe?

Jesu o ile a bolela gore: “Nna le Tate re batee.” (Johane 10:30) Ba bangwe ba tsopola temana ye go hlatsela gore Jesu le Tatagwe ke dikarolo tše pedi tša Modimo yo e lego boraro-botee. Na se ke seo Jesu a bego a se bolela ka mantšu a?

Anke re lebeleleng taba e dikologilego. Go temana 25, Jesu o boletše gore o be a dira mediro ka leina la Tatagwe. Go ditemana 27 go ya go 29, o boletše ka dinku tša seswantšhetšo, tšeo Tatagwe a mo neilego tšona. Dipolelo tše tša Jesu ka bobedi di be di ka se kwagale go batheetši ba gagwe ge e ba yena le Tatagwe e be e le motho o tee. Go e na le moo, Jesu ge e le gabotse o be a re, ‘Nna le Tate re tlemagane kudu moo e le gore ga go na yo a ka nkamogago dinku, go fo swana le ge go se yoo a ka amogago Tate dinku.’ Go fo swana le ge morwa a botša lenaba la tatagwe gore, ‘Ge o hlasela tate, o hlasela nna.’ Ga go na motho yo a ka naganago gore morwa yo le tatagwe e be e le motho o tee. Eupša ka moka ba be ba ka kwešiša tlemo e tiilego ya botee magareng ga bona.

Jesu le Tatagwe, Jehofa Modimo, le bona ke “batee” ka kgopolo ya gore ba dumelelana ka mo go feletšego ka merero le ditekanyetšo. Go fapana le Sathane Diabolo le batho ba babedi ba pele e lego Adama le Efa, Jesu ga se a ka a nyaka go ipuša ka ntle le Modimo. Jesu o hlalositše gore, “Morwa a ka se dire selo le se tee ka la gagwe, eupša o dira feela seo a bonago Tate a se dira. Gobane dilo le ge e le dife tšeo Yoo a di dirago, ke tšona tšeo Morwa le yena a di dirago ka mokgwa o swanago.”—Johane 5:19; 14:10; 17:8.

Lega go le bjalo, tlemo ye yeo e tiilego ya botee ga e dire gore Modimo le Morwa wa gagwe Jesu ba se swane. Ke batho ba babedi. Yo mongwe le yo mongwe o na le semelo sa gagwe se se fapanego. Jesu o na le maikwelo a gagwe, dikgopolo, diphihlelo le tokologo ya boikgethelo. Lega go le bjalo, o ile a kgetha go ikokobeletša thato ya Tatagwe. Go ya ka Luka 22:42, Jesu o ile a bolela gore: “Go se phethege thato ya-ka eupša go phethege ya gago.” Mantšu a a ka be a se na morero ge e ba thato ya gagwe e be e ka se fapane le ya Tatagwe. Ge e ba Jesu le Tatagwe ruri e be e le motho o tee, ke ka baka la’ng Jesu a be a rapela Modimo gomme ka boikokobetšo a dumela gore ga a tsebe dilo tšeo di bego di tsebja ke Tatagwe feela?—Mateo 24:36.

Ditho tša madumedi a mantši di rapela medimo yeo e tšweletšwago e e-na le ditshele le go lwantšhana le ditho tša malapa a yona. Ka mohlala, dinonwaneng tša Bagerika, Cronus o ile a fenya tatagwe e lego Uranus gomme a metša bana ba gagwe. Se se fapane kudu gakaakaang le botee bjo bo theilwego leratong la kgonthe magareng ga Jehofa Modimo le Morwa wa gagwe, Jesu! Le gona, botee bjo bo dira gore re ba rate kudu! Ge e le gabotse, re na le tokelo e sa bapišwego ya go ba boteeng le Batho ba ba babedi ba phagamego legohleng ka moka. Jesu o ile a rapela mabapi le balatedi ba gagwe gore: “Ke kgopelela . . . gore ka moka e be batee, go etša ge wena Tate o le boteeng le nna gomme nna ke le boteeng le wena, gore le bona ba be boteeng le rena.”—Johane 17:20, 21.

Ka gona, ge Jesu a be a re, “Nna le Tate re batee,” o be a sa bolele ka sephiri sa Boraro-botee, eupša o be a bolela ka botee bjo bo kgahlišago—tlemo ya kgaufsi kudu ka mo go ka kgonegago magareng ga batho ba babedi.