Moya o Mokgethwa​—Ke ka Baka La’ng go E-na le Kgakanego?

MOYA o mokgethwa ke eng? Potšišo ye e bonagala e le e lebanyago ka mo go lekanego, eupša go hwetša karabo e lebanyago go thata. Mopapa Benedict XVI o ile a botša lešaba kua Australia gore: “Go bonagala go hwetša kwešišo e kwagalago mabapi le Moya go sa kgonege.”

Ruri go na le dipono tše dintši le go se kgonthišege mo gogolo ge go tliwa potšišong e rego, Moya o mokgethwa ke eng? Ka mo tlase ke dikarabo tše tlwaelegilego:

• Ke motho wa kgonthe yo a phelago ka gare ga barutiwa ba Kriste.

• Ke thutamahlale ya Modimo, molao o šomago wa Modimo.

• Ke go ba gona ga Modimo mošomong wa lefaseng.

• Ke motho wa boraro wa Boraro-botee.

Ke ka baka la’ng go e-na le kgakanego e kaakaa? Ga e sa le e e-ba gona go tloga lekgolong la bone la nywaga C.E., ge bo-rathutatumelo ba bangwe ba be ba bolela gore moya o mokgethwa ke motho yo a bego a lekana le Modimo ka tsela e itšego. Lega go le bjalo, ye e be e se kgopolo yeo e bego e rutwa ka Mangwalong goba e bego e rutwa ke balatedi ba Kriste ba lekgolong la pele la nywaga. New Catholic Encyclopedia e hlalosa gore: “Testamente ya Kgale ruri ga e hlalose moya wa Modimo e le motho . . . Moya wa Modimo e fo ba e le matla a Modimo.” Mothopo wona woo o tlaleletša ka gore: “Ditemana tše dintši tša Testamente e Mpsha di utolla moya wa Modimo e le selo, e sego motho; se se bonagala kudu-kudu ge go bapišwa moya le matla a Modimo.”

Ke mo go kwešišegago gore batho ba thatafalelwa ke go nagana ka matla e le motho. Ka baka leo, nyakišišo ya morago bjale e dirilwego United States e utollotše gore batho ba bantši ba gana kgopolo ya gore moya o mokgethwa ke motho goba “sebopiwa se se phelago.” Na ba nepile? Goba na re swanetše go dumelelana le bo-rathutatumelo bao ba gapeletšago gore “Moya o Mokgethwa ke Motho yoo a tlogelanego le Tate le Morwa”?

Gore re hwetše karabo e ka botwago, re swanetše go ya ka Lentšung la Modimo, Beibele, leo le hlalosago moya o mokgethwa ka botlalo. Moapostola Paulo o ngwadile gore: “Lengwalo ka moka le buduletšwe ke Modimo, gomme le loketše go ruta, le go kgodiša le go lokiša.”—2 Timotheo 3:16, PK.

Ke ka baka la’ng o swanetše go nyaka go tseba therešo mabapi le moya o mokgethwa? Ke ka gobane go tseba therešo yeo go tla go bulela tsela ya go hwetša thušo ya Modimo. Na ka dinako tše dingwe o ikwa o palelwa ke go tšwela pele ka matla a gago? Jesu o holofeditše barutiwa ba gagwe gore: “Tšwelang pele le kgopela, gomme le tla newa . . . Ge e ba lena . . . le tseba go nea bana ba lena dimpho tše dibotse, gona Tate yo a lego legodimong o tla nea gakaakang moya o mokgethwa go bao ba mo kgopelago!”—Luka 11:9, 13.

Dihlogong tše di latelago, re tla dumelela Mangwalo a re utollela seo moya o mokgethwa o lego sona. Le gona re tla bona kamoo o ka re holago ka gona maphelong a rena.

[Ntlhakgolo go letlakala 3]

Mangwalo a re utollela seo moya o mokgethwa o lego sona