Ruta Bana ba Gago

Seme o Bone Bobe bja Mafase a Mabedi

MORWA wa Noa e lego Seme o ile a phologa bofelo bja lefase le lengwe gomme a phela go le lengwe. Na o a tseba gore ke ka baka la’ng lefase la mathomo leo Seme a phetšego go lona le ile la fedišwa le gore yena le ba lapa la gabo ba ile ba kgona bjang go phela lefaseng la bobedi?— * A re boledišane ka se.

Beibele e re, ge Seme e be e sa le yo monyenyane “bokxôpô bya batho” bo be bo atile. Sohle seo batho ba bego ba nagana ka sona e be e le “bobe fêla ka mehla.” Na o tseba seo Modimo a ilego a se dira?— O ile a tliša meetse-fula ao a ilego a fediša lefase leo le kgopo. Moapostola Petro o ngwadile gore: “Lefase la nakong yeo le ile la senywa ge le be le apešwa ke meetse.”—Genesi 6:5; 2 Petro 3:6.

Na o kwešiša lebaka leo ka lona Modimo a ilego a senya lefase leo?— Batho e be e le ba babe gomme ba nagana “bobe fêla ka mehla.” Jesu o ile a bolela ka taba ye. O boletše gore “pele ga meetse-fula” batho ba be ba thabela bophelo “ba e-ja ba e-nwa le banna ba nyala le basadi ba nyadišwa.” Jesu o okeditše ka gore: “Ba se ele hloko go fihla meetse-fula a e-tla a ba gogola ka moka.”—Mateo 24:37-39.

Batho bao ba ile ba palelwa ke go lemoga goba go bona eng?— Tatago Seme e lego Noa e be e le “mmoledi wa toko” eupša batho ga se ba ka ba theetša seo a bego a se bolela. Noa o ile a kwa Modimo gomme a aga areka, sekepe se se phaphamalago, yeo e bego e tla nametša yena le ba lapa la gagwe gomme ya ba phološa Meetse-fuleng. Ke feela Noa, mosadi wa gagwe, barwa ba gagwe—Seme, Hama le Jafete—gotee le basadi ba bona bao ba ilego ba dira seo Modimo a bego a nyaka gore ba se dire. Batho ka moka ba ile ba dira seo bona ba bego ba nyaka go se dira, ka gona ba ile ba gogolwa ke Meetse-fula.—2 Petro 2:5; 1 Petro 3:20.

Moo e ka bago ka morago ga ngwaga Meetse-fula a thomile, Seme le lapa la gabo ba ile ba tšwa ka arekeng gomme ba gata lefaseng le omilego. Batho ba babe ka moka ba be ba se gona, eupša go se go ye kae seo se ile sa fetoga. Kanana, morwa wa ngwanabo Seme e lego Hama, o ile a dira selo se sebe kudu moo Noa a ilego a re: “Kanana ké moroxiwa.” Nimirode setlogolo sa Hama le yena e be e le yo mobe. O ile a ganetša Modimo wa therešo, Jehofa, gomme a botša batho gore ba age tora e telele  yeo e bitšwago Babele e le gore ba itirele leina. O nagana gore se se ile sa dira gore Seme le tatagwe ba ikwe bjang?—Genesi 9:25; 10:6-10; 11:4, 5.

Ba ile ba nyama gomme le Jehofa o ile a nyama. Na o tseba seo Jehofa a ilego a se dira?— O ile a raranya maleme a batho bao e le gore ba se ke ba kwešišana. Ka go rialo, ba ile ba swanelwa ke go kgaotša go aga gomme ba ya mafelong a fapa-fapanego gotee le batho bao ba bolelago leleme le le swanago le la bona. (Genesi 11:6-9) Eupša Modimo ga se a ka a fetoša leleme la Seme le lapa la gagwe. Ka baka leo, ba be ba ka kgona go dula gotee gomme ba thušana go hlankela Modimo. Na o kile wa ipotšiša gore Seme o ile a hlankela Jehofa nako e kaaka’ng?—

Seme o phetše nywaga e 600. O ile a phela nywaga e 98 pele ga meetse-fula gomme a phela e 502 ka morago ga ona. Re ka kgonthišega gore o ile a thuša Noa go aga areka le go lemoša batho gore Meetse-fula a e-tla. Eupša o nagana gore Seme o ile a dira’ng ka nywaga e fetago e 500 yeo a e phetšego ka morago ga Meetse-fula?— Noa o ile a bitša Jehofa ka gore ke “Modimo wa Seme.” Seme o swanetše go ba a ile a tšwela pele a hlankela Jehofa le go thuša ditho tša lapa la gagwe go dira se swanago. Ka morago, lapa la Seme le ile la akaretša Aborahama, Sara le Isaka.—Genesi 9:26; 11:10-31; 21:1-3.

Bjale nagana ka lefase la lehono, leo le mpefetšego le go feta ga e sa le go tloga mehleng ya Seme. Go tla direga’ng ka lona?— Beibele e re “le a feta.” Eupša ela hloko kholofetšo ye: “Yo a dirago thato ya Modimo o dula a le gona ka mo go sa felego.” Ka gona, ge e ba re dira thato ya Modimo, re ka ba gare ga bao ba tlago go phologela lefaseng le lefsa la Modimo. Ke moka, ka thušo ya Modimo re ka phela mo lefaseng ka mo go sa felego re thabile!—1 Johane 2:17; Psalme 37:29; Jesaya 65:17.

[Mongwalo wa tlase]

Dipotšišo:

○ Seme o ile a phela lefaseng lefe la mathomo, gomme Modimo o ile a le fediša ka mabaka afe a mabedi?

○ Seme o phetše nako e kaakaa, gona e be e le motho wa mohuta mang?

○ Lefase le le tla diragalelwa ke eng kgaufsinyane?

○ Re swanetše go dira’ng e le gore re phologe bofelo bja lefase le?