Seo re Ithutago Sona go Jesu

Mabapi le Bophelo bja Lapa

Ke pono efe ya lenyalo yeo e dirago gore malapa a thabe?

Lenyalo ke tlemo e kgethwa. Ge a botšišwa ge e ba tlhalo e dumeletšwe, Jesu o itše: “Na ga se la bala gore yo a ba bopilego go tloga mathomong o ba dirile e le yo motona le yo motshadi gomme a re, ‘Ka lebaka le monna o tla tlogela tatagwe le mmagwe a kgomarele mosadi wa gagwe, gomme ba babedi ba e tla ba nama e tee’? Ka gona, ga e sa le ba babedi, eupša ke nama e tee. Ka baka leo, se Modimo a se tlemagantšego jokong go se be le motho yo a se aroganyago. . . . Mang le mang yo a hlalago mosadi wa gagwe ge e se ka lebaka la bootswa, a nyala yo mongwe, o a hlotlola.” (Mateo 19:4-6, 9) Ge banyalani ba latela keletšo ya Jesu gomme ba dula ba botegelana, lapa ka moka le tla ikwa le šireletšegile e bile le thabile.

Ke ka baka la’ng go rata Modimo go dira gore malapa a thabe?

Jesu o itše: “‘O rate Jehofa Modimo wa gago ka pelo ya gago ka moka le ka moya wa gago ka moka le ka monagano wa gago ka moka.’ Ye ke taelo e kgolo-kgolo le ya pele.” Taelo e kgolo-kgolo ya bobedi ke efe? Jesu o itše: “O rate moagišani wa gago [go akaretša le bao ba phelago kgaufsi kudu le wena—ba lapa] go etša ge o ithata.” (Mateo 22:37-39) Ka gona, selo se segolo seo se dirago gore lapa le thabe ke go ba le tswalano e botse le Modimo ka gobane go rata Modimo go re tutueletša go ratana.

 Banna le basadi ba ka thabišana bjang?

Banna ba thabiša basadi ba bona ge ba latela mohlala wa Jesu. O be a e-na le moya wa boikgafo ge a be a rata Mosadi wa gagwe wa seswantšhetšo, e lego phuthego. (Baefeso 5:25) Jesu o itše: ‘Morwa wa motho ga se a tlela go direlwa, eupša o tletše go direla.’ (Mateo 20:28) Jesu ga se a ka a buša ka thata goba a ba bogale go bao ba lego ka tlase ga tlhokomelo ya gagwe eupša o be a ba lapološa. (Mateo 11:28) Ka gona, banna ba swanetše go diriša matla a bona a taolo ka tsela e bonolo yeo e holago lapa ka moka.

Basadi le bona ba ka holwa ke mohlala wa Jesu. Beibele e re: “Hlogo ya Kriste ke Modimo.” E bolela le gore “hlogo ya mosadi ke monna.” (1 Bakorinthe 11:3) Jesu ga se a ka a bona go ikokobeletša Modimo e le mo go mo nyenyefatšago. O be a hlompha Tatagwe ka mo go tseneletšego. Jesu o itše: “Ka mehla ke dira dilo tše di mo kgahlišago.” (Johane 8:29) Mosadi yo a ikokobeletšago bohlogo bja monna wa gagwe ka gobane a rata e bile a hlompha Modimo o dira mo gontši go dira gore bophelo bja lapa la gagwe e be bjo bo thabišago.

Batswadi ba ka ithuta’ng ponong ya Jesu ka bana?

Jesu o be a fetša nako le bana gomme a kgahlegela dikgopolo le maikwelo a bona. Beibele e re: “Jesu a biletša masea go yena, a re: ‘Lesang bana ba banyenyane ba tle go nna.’” (Luka 18:15, 16) Lebakeng le lengwe, batho ba ile ba kgalema bašemanyana ba bangwe bao ba bego ba bolela ka tumelo ya bona go Jesu. Eupša Jesu o ile a reta bašemanyana bao ge a be a botša baswaya-diphošo gore: “Na ga se la ka la bala gore, ‘O neile tumišo ka melomo ya bana le ba ba amušwago’?”—Mateo 21:15, 16.

Bana ba ka ithuta’ng go Jesu?

Jesu o beetše bana mohlala o mobotse wa go kgahlegela dilo tša moya. Ge a be a e-na le nywaga e 12, o ile a hwetšwa ka “tempeleng a dutše gare ga barutiši, a ba theeditše gomme a ba botšiša dipotšišo.” Ka mafelelo afe? “Bohle bao ba bego ba mo theeditše ba be ba dutše ba makatšwa ke kwešišo ya gagwe le dikarabo tša gagwe.” (Luka 2:42, 46, 47) Lega go le bjalo, tsebo ya Jesu ga se ya ka ya dira gore a ikgogomoše. Go e na le moo, e ile ya dira gore a hlomphe batswadi ba gagwe. Beibele e re: “A tšwela pele a ikokobeleditše bona.”—Luka 2:51.

Bakeng sa tsebišo e oketšegilego, bona kgaolo 14 ya puku ya Ke Eng Seo ge e le Gabotse Beibele e se Rutago? *

[Mengwalo ya tlase]