MOAPOSTOLA PAULO o ngwaletše Bakriste bao ba bego ba phela seripeng sa bobedi sa lekgolo la pele la nywaga C.E. gore: “Hlokomelang.” O be a ba nea temošo malebana le eng? “Mohlomongwe go ka ba le yo a le thopago ka filosofi le bofora bja lefeela go ya ka tlwaelo ya batho.”—Bakolose 2:8.

Go sa šetšwe temošo ya Paulo, go tloga magareng ga lekgolo la bobedi la nywaga C.E., Bakriste ba bangwe ba ile ba thoma go diriša dikgopolo tšeo di tšwago go bo-radifilosofi ba bogologolo ge ba hlalosa ditumelo tša bona. Ka baka la’ng? Ba be ba nyaka go amogelwa ke dirutegi tša Mmušong wa Roma gomme ka go rialo ba di sokolle.

Justin Martyr, yo mongwe wa bao ba tumilego ba Bakriste ba, o be a dumela gore Mmoleledi wa Modimo o be a iponagaditše go bo-radifilosofi ba Bagerika kgale pele ga ge Jesu a ka tla. Go ya ka Justin le barutiši ba naganago go swana le yena, go tsenywa ga filosofi le dinonwane Bokristeng go dirile gore mohuta wo wa bodumedi e be o amogelwago ka gohle.

Mohuta wa Bokriste wa Justin Martyr o ile wa atlega kudu go direng gore batho ba sokologe. Lega go le bjalo, go amogelwa ga nonwane e tee go dirile gore go tšweletšwe tše dingwe gomme gwa tšweletšwa le seo ga bjale go dumelwago gore ke thuto ya Bokriste. Gore o lemoge gore dilo tše ke dinonwane, bapiša seo ditšhupetšo tše di latelago di se bolelago le seo ge e le gabotse Beibele e se rutago.